നാലു വര്‍ഷത്തിനു ശേഷം സൗദി അംബാസഡര്‍ വീണ്ടും ഖത്തറില്‍

റിയാദ്/ദോഹ: അറബ് ഉപരോധത്തെ തുടര്‍ന്ന സംഘര്‍ഷ ഭരിതമായ കാലഘട്ടം അവസാനിച്ചതോടെ ഉഭയ കക്ഷി ബന്ധങ്ങള്‍ കൂടുതല്‍ മെച്ചപ്പെടുത്തുന്നതിനുള്ള നീക്കങ്ങളുമായി സൗദിയും ഖത്തറും. ഇതിന്റെ ഭാഗമായി നാലു വര്‍ഷത്തിനു ശേഷം ഖത്തറിലേക്കുള്ള അംബാസഡറെ സൗദി വീണ്ടും നിയോഗിച്ചു. പ്രിന്‍സ് മുന്‍സൂര്‍ ബിന്‍ ഖാലിദ് അല്‍ സൗദാണ് ഖത്തറിലെ പുതിയ അംബാസഡര്‍. ഇദ്ദേഹത്തിന്റെ നിയമനവുമായി ബന്ധപ്പെട്ട രേഖകള്‍ ഖത്തര്‍ ഉപപ്രധാന മന്ത്രിയും വിദേശകാര്യമന്ത്രിയുമായ ശെയ്ഖ് മുഹമ്മദ് ബിന്‍ അബ്ദുര്‍റഹ്മാന്‍ അല്‍താനി സ്വീകരിച്ചു.



അറബ് രാജ്യങ്ങളുടെ ഖത്തറുമായുള്ള ഉപരോധം അവസാനിപ്പിക്കാന്‍ തീരുമാനിച്ചതിന് ശേഷം ഇതാദ്യമായാണ് സൗദി ഖത്തറിലേക്ക് അംബാസഡറെ നിയോഗിക്കുന്നത്. അദ്ദേഹത്തിന്റെ പുതിയ ഉദ്യമത്തിന് എല്ലാ ആശംസകളും നേര്‍ന്ന ഖത്തര്‍ വിദേശകാര്യമന്ത്രി, ഇരുരാജ്യങ്ങള്‍ക്കുമിടയിലെ ബന്ധം കൂടുതല്‍ ഊഷ്മളമാക്കുന്നതിനുള്ള എല്ലാ പിന്തുണയും തന്റെ ഭാഗത്തു നിന്ന് ഉണ്ടാവുമെന്നും അദ്ദേഹം വാഗ്ദാനം ചെയ്തതായി ഖത്തര്‍ ന്യൂസ് ഏജന്‍സി അറിയിച്ചു. ഇരുരാജ്യങ്ങളും തമ്മിലെ സാഹോദര്യ ബന്ധം കൂടുതല്‍ ശക്തമാക്കാന്‍ പസാധിക്കട്ടെ എന്നും അദ്ദേഹം ആശംസിച്ചു.

Also Read: നമസ്‌കാര സമയത്തെ കടയടപ്പ് ഒഴിവാക്കല്‍; ചര്‍ച്ച സൗദി ശൂറാ കൗണ്‍സില്‍ നീട്ടിവച്ചു

2017ലാണ് സൗദിയുടെ നേതൃത്വത്തില്‍ യുഎഇ, ഈജിപ്ത്, ബഹ്‌റൈന്‍ എന്നീ രാജ്യങ്ങള്‍ ചേര്‍ന്ന് ഖത്തറിനെതിരേ ഉപയോധം പ്രഖ്യാപിച്ചത്. മൂന്നര വര്‍ഷത്തെ ഉപരോധത്തിന് ശേഷം ഈ വര്‍ഷം ആരംഭത്തില്‍ റിയാദില്‍ ചേര്‍ന്ന ജിസിസി ഉച്ചകോടിയില്‍ ഖത്തറിനെതിരായ ഉപരോധം പിന്‍വലിക്കാനും ബന്ധം കൂടുതല്‍ ഊഷ്മളമാക്കാനും രാഷ്ട്ര നേതാക്കള്‍ തീരുമാനം എടുക്കുകയായിരുന്നു.