ജിമ്മുകള്‍ക്ക് പ്രവർത്തനാനുമതി ഇല്ല; മദ്യവില്‍പ്പനശാലയ്ക്ക് മുന്നില്‍ പുഷ് അപ്പ് എടുത്ത് പ്രതിഷേധം

തൃശൂർ: സംസ്ഥാനത്ത് കൊവിഡ് രണ്ടാം തരംഗത്തിലെ കേസുകളിൽ കുറവു വന്നതോടെ സർക്കാർ ലോക്ക് ഡൗൺ നിയന്ത്രണങ്ങളിൽ ഇളവ് നൽകിയിരുന്നു. മദ്യശാലകൾക്കും മറ്റും നിയന്ത്രണങ്ങളോടെ പ്രവർത്തനാനുമതി നൽകിയെങ്കിലും ജിമ്മുകൾക്കും മറ്റും പ്രവർത്തനനാനുമതി ലഭിച്ചില്ല. നാളുകളായി ജിമ്മുകൾ അടച്ചിട്ടിട്ടും ഇളവുകൾ ലഭിക്കാതെ വന്നതോടെ പ്രതിഷേധവുമായി രംഗത്തെത്തിയിരിക്കുകയാണ് തൃശൂരിലെ ജിം നടത്തിപ്പുകാർ.



തൃശൂർ മതിലകത്തെ ബെവ്കോ ഔട്ട്‍ലെറ്റിന് മുന്നിലാണ് ജിം നടത്തിപ്പുകാരുടെ വേറിട്ട പ്രതിഷേധം. മദ്യവിൽപ്പനശാലയ്ക്ക് മുന്നിൽ പുഷ് അപ്പ് എടുത്തും മറ്റ് വർക്ക് ഔട്ട് നടത്തിയാണ് ജിം ട്രെയ്നർമാർ പ്രതിഷേധിച്ചത്. പ്രതിഷേധം അധികൃതരുടെ ശ്രദ്ധയിൽപ്പെടുന്നതിന് വേണ്ടിയാണ് ബെവ്കോ ഔട്ട്‍ലെറ്റുകളുടെ മുന്നിൽ തന്നെ പ്രതിഷേധം സംഘടിപ്പിച്ചതെന്നാണ് ഇവർ പറയുന്നത്.

Also Read : പ്രതിപക്ഷ നേതാക്കളുടെ യോഗം വിളിച്ച് പവാര്‍; ‘കേന്ദ്രം പരാജയം’; ബിജെപി വിരുദ്ധ ചേരി ശക്തിപ്പെടുത്താൻ ‘രാഷ്ട്രീയ മഞ്ച്

കഴിഞ്ഞ ലോക്ക് ഡൗൺ കാലത്ത് വന്ന കടബാധ്യത തന്നെ വീട്ടാൻ കഴിഞ്ഞില്ലെന്നും നിയന്ത്രണങ്ങൾ നീട്ടിക്കൊണ്ടുപോകുന്നത് പ്രതിസന്ധിയുണ്ടാക്കുന്നെന്നുമാണ് പ്രതിഷേധക്കാർ ഏഷ്യാനെറ്റ് ന്യൂസിനോട് പ്രതികരിച്ചത്. ജിമ്മുകൾ പ്രവർത്തിക്കുന്നില്ലെങ്കിലും വാടകയും ലോണും അടയ്ക്കേണ്ട അവസ്ഥയിലാണെന്നും പ്രവർത്തനം നിലച്ചതോടെ മെഷീനുകളും മറ്റും തുരുമ്പെടുക്കുകയാണെന്നും ഇവർ ചൂണ്ടിക്കാട്ടുന്നു.

Also Read : ഫാദേഴ്സ് ഡേ സന്ദേശം അയച്ചതിനു ഫോൺ തല്ലിപ്പൊട്ടിച്ചു; തൂങ്ങിമരിച്ചതിന്റെ അടയാളങ്ങളില്ല; വെളിപ്പെടുത്തി വിസ്മയയുടെ അച്ഛൻ



കൊവിഡ് പ്രോട്ടോക്കോൾ പാലിച്ചുകൊണ്ട് ജിമ്മുകൾക്ക് പ്രവർത്തനാനുമതി നൽകണമെന്ന പ്ലക്കാർഡ് ഉയർത്തിയായിരുന്നു മദ്യവില്‍പ്പനശാലയ്ക്ക് മുന്നില്‍ ഇവർ പ്രതിഷേധിച്ചത്. കഴിഞ്ഞതവണ ലോക്ക് ഡൗണിൽ ഇളവുകൾ അനുവദിച്ചപ്പോൾ നിയന്ത്രണങ്ങളോടെ നൽകിയ പ്രവർത്തനാനുമതി നൽകണമെന്നും ഇവർ ആവശ്യപ്പെടുന്നു.