സമ്പന്ന രാഷ്ട്രങ്ങള്‍ വാക്‌സിന്‍ വാങ്ങിക്കൂട്ടുന്നതിനെ വിമര്‍ശിച്ച് ഖത്തര്‍ അമീര്‍; പാവപ്പെട്ടവര്‍ക്കും വാക്‌സിന്‍ ലഭിക്കണം

​കൊവിഡിനെതിരായ പോരാട്ടത്തെ തളര്‍ത്തും

അനാവശ്യമായി വാക്‌സിന്‍ വാങ്ങിക്കൂട്ടാന്‍ ചില രാജ്യങ്ങള്‍ മത്സരിക്കുന്നത് കൊവിഡ് മഹാമാരിക്കെതിരായ അന്താരാഷ്ട്ര പോരാട്ടങ്ങളെ തളര്‍ത്തുന്നതിന് കാരണമാകുന്നുണ്ടെന്ന് അദ്ദേഹം പറഞ്ഞു. ദരിദ്ര, വികസ്വര രാഷ്ട്രങ്ങളിലെ വാക്സിന്‍ വിതരണം അവതാളത്തിലാക്കാനും അതുവഴി രാജ്യത്തിന്റെ വളര്‍ച്ചയെ തന്നെ സാരമായി ബാധിക്കാനും ഇത് കാരണമാകുന്നു. ആഗോള വ്യവസായിക, വികസിത രാഷ്ട്രങ്ങളും രാഷ്ട്രത്തലവന്മാരും വികസ്വര, ദരിദ്ര രാജ്യങ്ങളിലേക്കും വാക്സിനേഷന്റെ സന്തുലിത വിതരണം ഉറപ്പാക്കണം. ലോകത്തിലെ മുഴുവന്‍ രാജ്യങ്ങളിലും വാക്സിന്‍ ലഭ്യമാക്കുന്നതിന് സമ്പന്ന രാജ്യങ്ങള്‍ കൈകോര്‍ക്കണമെന്നും അദ്ദേഹം പറഞ്ഞു.

​അടുത്ത ഘട്ടം കൂടുതല്‍ പ്രയാസകരമാവും

കൊവിഡ് വ്യാപനത്തിന്റെ അടുത്ത ഘട്ടം സംഭവിക്കുകയാണെങ്കില്‍ അത് സാമ്പത്തികമായും ധനപരമായും ഒരു രാജ്യത്തിനും അത്ര ആയാസകരമായിരിക്കില്ലെന്ന് അമീര്‍ അഭിപ്രായപ്പെട്ടു. വൈറസിന്റെ വകഭേദങ്ങള്‍ നിരന്തമായി ഉണ്ടായിക്കൊണ്ടിരിക്കെ കൊവിഡാനന്തര ലോകം എന്ന് പറയാന്‍ ഇനിയും കാത്തിരിക്കേണ്ടിവരും. അതുകൊണ്ടുതന്നെ ആഗോള സാമ്പത്തിക വ്യവസ്ഥയുടെ ഭാവി അത്ര ശുഭകരമാണെന്നു തോന്നുന്നില്ല. അതുകൊണ്ടുതന്നെ വികസിതരാജ്യങ്ങളും വികസ്വര രാജ്യങ്ങളും തമ്മിലുള്ള ചെറിയ വിടവുപോലും നികത്തി മഹാമാരിയെ പ്രതിരോധിക്കുന്നതില്‍ സഹകരണം സാധ്യമാക്കണം. വാക്സിന്‍ എല്ലാവര്‍ക്കും എത്തിക്കുന്നതിലും മഹാമാരിയുടെ ആഘാതങ്ങള്‍ കുറക്കുന്നതിനും ഈ സഹകരണം അനിവാര്യമാണെന്നും അദ്ദേഹം പറഞ്ഞു.

​കൊവിഡ് ആഗോള ബന്ധങ്ങളെ മാറ്റിമറിച്ചു

ലോകത്ത് പടര്‍ന്നു പിടിച്ച കൊവിഡ് മഹാമാരി ആഗോള ബന്ധങ്ങളെ ഒന്നാകെ പൊളിച്ചെഴുത്തിന് വിധേയമാക്കിയിരിക്കുകയാണെന്നും അമീര്‍ അഭിപ്രായപ്പെട്ടു. ആധുനിക സമൂഹങ്ങള്‍ക്കിടയിലെ ബന്ധങ്ങളില്‍ അത് മാറ്റങ്ങളുണ്ടാക്കി. പൊതുജനാരോഗ്യത്തിന്റെ കാര്യത്തില്‍ രാഷ്ട്രത്തിന്റെ ഇടപെടലുകളെ കുറിച്ചുള്ള പൗരന്റെ കാഴ്ചപ്പാടില്‍ അത് മാറ്റങ്ങളുണ്ടാക്കി. സാമ്പത്തിക രംഗവുമായുള്ള ഭരണകൂടത്തിന്റെ ബന്ധങ്ങളെ അത് പുനര്‍നിര്‍വച്ചിച്ചു. സാമ്പത്തിക രംഗത്തിന്റെ വളര്‍ച്ചയാണോ ജനങ്ങളുടെ ആരോഗ്യ സുരക്ഷയാണോ വലുത് എന്ന ചോദ്യം വലിയ തോതില്‍ ഉയര്‍ന്നുവന്നു. ആഗോളവല്‍ക്കരണത്തിന്റെ ഈ കാലത്ത് പൊതുജനാരോഗ്യം ഉള്‍പ്പെടെയുള്ള കാര്യങ്ങളില്‍ നിന്ന് സര്‍ക്കാരുകള്‍ക്ക് ഒളിച്ചോടാന്‍ ആവില്ലെന്ന യാഥാര്‍ഥ്യം കൊവിഡ് നമ്മെ പഠിപ്പിച്ചു. രാജ്യാതിര്‍ത്തികള്‍ക്കതീതമായി പടര്‍ന്നുപിടിക്കുന്ന ഇത്തരം വെല്ലുവിളികളെ ചെറുക്കാന്‍ അന്താരാഷ്ട്ര സമൂഹം പരസ്പരം സഹകരിക്കേണ്ടതിന്റെ പ്രാധാന്യമാണ് കൊവിഡ് വിളിച്ചോതുന്നത്. ഒരു രാജ്യത്തിന് ഒറ്റയ്ക്കു നിന്ന് ഇത്തരം വെല്ലുവിളികളെ നേരിടാനാവില്ലെന്നാണ് കൊവിഡ് തെളിയിച്ചതെന്നും അദ്ദേഹം ഓര്‍മിപ്പിച്ചു.

​ഖത്തര്‍ സഹായമെത്തിച്ചത് 80 ലേറെ രാജ്യങ്ങളില്‍

കൊവിഡിനെതിരായ പോരാട്ടത്തില്‍ ലോകാരോഗ്യ സംഘടന, ഗ്ലോബല്‍ അലയന്‍സ് ഫോര്‍ വാക്സിന്‍ ആന്റ് ഇമ്യൂണൈസേഷന്‍ തുടങ്ങിയ ആഗോള സംഘടനക്ക് മികച്ച പിന്തുണയാണ് ഖത്തര്‍ നല്‍കിവരുന്നത്. ഇതിനകം 80ലധികം രാജ്യങ്ങള്‍ക്ക് കൊവിഡ് കാലത്ത് സഹായമെത്തിക്കാന്‍ ഖത്തറിന് സാധിച്ചു.

കോവിഡിനെ പ്രതിരോധിക്കുന്നതിനും പൊതുസമൂഹത്തിന്റെ സുരക്ഷ ഉറപ്പാക്കുന്നതിനും ഖത്തര്‍ വളരെ വേഗത്തില്‍ പ്രതികരിച്ചിട്ടുണ്ടെന്ന് അമീര്‍ പറഞ്ഞു. മൂന്ന് മേഖലകളിലൂന്നിയാണ് ഖത്തര്‍ പ്രവര്‍ത്തനങ്ങള്‍ നിയന്ത്രിച്ചത്. ഖത്തര്‍ നടപ്പാക്കിയ ദേശീയ വാക്സിനേഷന്‍ പ്രോഗ്രാം വിജയകരമായി മുന്നേറുകയാണ്. ഇതുവരെയായി രണ്ടര ദശലക്ഷത്തിലധികം ഡോസുകള്‍ വിതരണം ചെയ്തിട്ടുണ്ട്. 65 ശതമാനം ആളുകളും പൂര്‍ണമായും വാക്സിന്‍ സ്വീകരിച്ചിട്ടുമുണ്ട്. കൊവിഡിന്റെ ആഘാതം കുറക്കുന്നതിന് സ്വകാര്യമേഖലക്ക് പിന്തുണ നല്‍കുന്നതിന്റെ ഭാഗമായി 75 ബില്യന്‍ റിയാലിന്റെ സാമ്പത്തിക പാക്കേജാണ് പ്രഖ്യാപിച്ചത്. ലോക്ഡൗണ്‍ നടപ്പാക്കുന്നതില്‍ തീവ്രവാദപരമായ സമീപനമോ അതേസമയം അശ്രദ്ധയോ ഖത്തര്‍ കാണിച്ചിട്ടില്ല. ഖത്തര്‍ നേരത്തേ ആര്‍ജിച്ചെടുത്ത പരിചയസമ്പത്തും വളരെ വേഗത്തില്‍ പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കിയതും കൊവിഡിന്റെ രണ്ടാം വരവിനെ തടുക്കുന്നതില്‍ നിര്‍ണായകമായെന്നും അമീര്‍ പറഞ്ഞു.