Sumayya P | Samayam Malayalam | Updated: 23 Jun 2021, 11:06:51 AM
വാക്‌സനേഷനു പുറമെ, 72 മണിക്കൂറിനകം എടുത്ത പിസിആര്‍ പരിശോധനയിലെ നെഗറ്റീവ് സര്‍ട്ടിഫിക്കറ്റ് ഉള്ളവര്‍ക്കുമായിരിക്കും യാത്രാനുമതി നല്‍കുക
കുവൈറ്റ് സിറ്റി: ഇന്ത്യ ഉള്‍പ്പെടെയുള്ള രാജ്യങ്ങളില്‍ നിന്ന് തിരിച്ചുവരുന്ന പ്രവാസികള്‍ മൂന്നാമതൊരു രാജ്യത്ത് 14 ദിവസം ക്വാറന്റൈനില്‍ കഴിഞ്ഞ ശേഷമേ രാജ്യത്ത് പ്രവേശിക്കാവൂ എന്ന് വ്യവസ്ഥയില്ലെന്ന് ആരോഗ്യ മന്ത്രാലയം വൃത്തങ്ങളെ ഉദ്ധരിച്ച് അല്‍ ഖബസ് പത്രം റിപ്പോര്‍ട്ട് ചെയ്തു. ഇതുമായി ബന്ധപ്പെട്ട സംശയങ്ങള്‍ ഉയര്‍ന്ന സാഹചര്യത്തിലാണിത്. അതേസമയം വാക്‌സിനെടുക്കാത്ത കുട്ടികളുടെ കാര്യത്തില്‍ എന്തു ചെയ്യണമെന്ന കാര്യത്തില്‍ ഉടന്‍ തന്നെ തീരുമാനമെടുക്കുമെന്നും അധികൃതര്‍ അറിയിച്ചു.
വാക്സിന് എടുത്തവര്‍ക്ക് ആഗസ്ത് ഒന്ന് മുതല്‍ രാജ്യത്തേക്ക് പ്രവേശനം
പൂര്‍ണമായി വാക്‌സിനേഷന്‍ എടുത്ത വിദേശികള്‍ക്ക് ആഗസ്ത് ഒന്ന് മുതല്‍ രാജ്യത്തേക്ക് പ്രവേശനം നല്‍കാന്‍ കുവൈറ്റ് മന്ത്രിസഭ കഴിഞ്ഞ ദിവസം തീരുമാനിച്ചിരുന്നു. വാക്‌സനേഷനു പുറമെ, 72 മണിക്കൂറിനകം എടുത്ത പിസിആര്‍ പരിശോധനയിലെ നെഗറ്റീവ് സര്‍ട്ടിഫിക്കറ്റ് ഉള്ളവര്‍ക്കുമായിരിക്കും യാത്രാനുമതി നല്‍കുക. അതോടൊപ്പം, ഏഴ് ദിവസത്തെ ക്വാറന്റൈനും അതിനു ശേഷം ഒരു പിസിആര്‍ പരിശോധന കൂടി നടത്തി കൊവിഡ് നെഗറ്റീവാണെന്ന് ഉറപ്പുവരുത്തുകയും വേണം.
അതിനിടെ, കൊവിഡ് നിയന്ത്രണത്തിന്റെ ഭാഗമായുള്ള യാത്രാ വിലക്ക് മൂലം നാട്ടില്‍ കുടുങ്ങിയ പ്രവാസികളുടെ വിവരം കുവൈറ്റിലെ ഇന്ത്യന്‍ എംബസി ശേഖരിക്കുന്നു.
വാക്‌സിനേഷന്‍ സംബന്ധിച്ച ആശങ്കകള്‍
വാക്സിന് സ്വീകരിച്ച ഇന്ത്യക്കാര്‍ ഉള്‍പ്പെടെയുള്ള വിദേശികള്‍ക്ക് ആഗസ്ത് ഒന്നു മതുല്‍ കുവൈറ്റ് യാത്രാനുമതി നല്‍കാന്‍ തീരുമാനിച്ച പശ്ചാത്തലത്തിലാണ് വിവരശേഖരണം. നാട്ടില്‍ കുടുങ്ങിയ കുവൈറ്റ് പ്രവാസികളെ കുറിച്ചുള്ള കൃത്യമായ വിവരങ്ങള്‍ ലഭ്യമാക്കുന്നതിനും ആവശ്യമായ ഇടപെടലുകള്‍ നടത്തുന്നതിനും വേണ്ടിയാണിതെന്ന് എംബസി അറിയിച്ചു. വാക്‌സിനേഷന്‍ സര്‍ട്ടിഫിക്കറ്റുകള്‍ സംബന്ധിച്ചും ആരോഗ്യ മന്ത്രാലയത്തില്‍ രജിസ്റ്റര്‍ ചെയ്ത് യാത്രയ്ക്കുള്ള അംഗീകാരം വാങ്ങുന്നത് സംബന്ധിച്ചും പ്രവാസികള്‍ക്കിടയില്‍ ആശയക്കുഴപ്പം നിലനില്‍ക്കുന്ന പശ്ചാത്തലത്തിലാണ് എംബസി വിവരശേഖരണം നടത്തുന്നത്. രണ്ട് ഡോസ് വാക്‌സിനേഷന്‍ പൂര്‍ത്തിയാക്കിയ വിദേശികള്‍ക്ക് ആഗസ്ത് ഒന്ന് മുതല്‍ പ്രവേശനം അനുവദിക്കുമെന്ന് കുവൈറ്റ് വ്യക്തമാക്കിയിട്ടുണ്ടെങ്കിലും വാക്‌സിനേഷന്‍ സംബന്ധിച്ച ആശങ്കകള്‍ പ്രവാസികള്‍ക്കുണ്ട്.
കൊവാക്‌സിന്‍ കുവൈറ്റ് അംഗീകരിച്ചിട്ടില്ല
കുവൈറ്റ് അംഗീകരിച്ച ഓക്‌സ്‌ഫോഡ് ആസ്ട്രസെനക്ക തന്നെയാണ് കൊവിഷീല്‍ഡ് എന്ന പേരില്‍ ഇന്ത്യയില്‍ നല്‍കുന്നത്. എന്നാല്‍ കൊവാക്‌സിന്‍ കുവൈറ്റ് അംഗീകരിച്ചിട്ടില്ല. ഇതിനു പുറമെ, ഇന്ത്യയില്‍ കുടുങ്ങിയ പ്രവാസികളില്‍ വിസ കാലാവധി കഴിഞ്ഞവര്‍, തിരികെയെത്താനാവാതെ ജോലി നഷ്ടമായവര്‍, കുടുംബാംഗങ്ങള്‍ കുവൈറ്റില്‍ കുടുങ്ങിയവര്‍, ജോലിയില്‍ തിരികെ പ്രവേശിക്കേണ്ടവര്‍, ശമ്പളം ലഭിക്കാത്തവര്‍ തുടങ്ങിയവരുടെ വിവരങ്ങളും എംബസി ശേഖരിക്കുന്നുണ്ട്. എംബസി വെബ്‌സൈറ്റില്‍ നല്‍കിയിട്ടുള്ള ലിങ്ക് വഴി ഗൂഗ്ള്‍ ഫോമിലാണ് വിവരങ്ങള്‍ നല്‍കേണ്ടത്. ഇതുമായി ബന്ധപ്പെട്ട കാര്യങ്ങള്‍ കുവൈറ്റ് അധികൃതരുമായി ചര്‍ച്ച ചെയ്ത് പരിഹാരം കാണുന്നതിന്റെ ഭാഗമായാണ് നടപടി.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : kuwait travel restrictions covid tests and quarantine requirements
Malayalam News from malayalam.samayam.com, TIL Network
