നീരവ് മോദിയ്ക്ക് തിരിച്ചടി; യുകെ ഹൈക്കോടതി ഹര്‍ജി തള്ളി; സ്വത്തുക്കൾ കണ്ടുകെട്ടി ഇന്ത്യ

ലണ്ടൻ: ഇന്ത്യയിൽ നിന്ന് ശതകോടികളുടെ സാമ്പത്തിക തട്ടിപ്പ് നടത്തി മുങ്ങിയ നീരവ് മോദിയ്ക്ക് യുകെ ഹൈക്കോടതിയിൽ നിന്ന് തിരിച്ചടി. ഇന്ത്യയിലേയ്ക്ക് നാടുകടത്താനുള്ള ശ്രമം തടയണമെന്ന് ആവശ്യപ്പെട്ട് നീരവ് മോദി നല്‍കിയ ഹര്‍ജി യുകെ ഹൈക്കോടതി തള്ളി. കഴിഞ്ഞ മാസമായിരുന്നു നീരവ് മോദി ലണ്ടനിലെ കോടതിയിൽ ഹര്‍ജി നല്‍കിയത്.



ഈ വര്‍ഷം ഏപ്രിൽ 15നായിരുന്നു യുകെ ഹോം സെക്രട്ടറി പ്രീതി പട്ടേൽ നീരവ് മോദിയെ ഇന്ത്യയിലേയ്ക്ക് നാടുകടത്താൻ ഉത്തരവിട്ടത്. ഇതിനു പിന്നാലെയായിരുന്നു ഇതിനെതിരെ നീരവ് മോദി നിയമയുദ്ധം തുടങ്ങിയത്. പഞ്ചാബ് നാഷണൽ ബാങ്കിൽ നിന്ന് 14,000 കോടി രൂപയോളം തട്ടിച്ച ശേഷമാണ് നീരവ് മോദി ഇന്ത്യയിൽ നിന്ന് രക്ഷപെട്ടത്. തട്ടിപ്പുകേസിലെ മുഖ്യപ്രതികളായ നീരവ് മോദിയെയയും ബന്ധുവായ മെഹുൽ ചോക്സിയെയും ഇന്ത്യയിൽ തിരിച്ചെത്തിക്കാൻ കേന്ദ്രസര്‍ക്കാര്‍ ശ്രമം തുടരുന്നതിനിടെയാണ് യുകെ ഹൈക്കോടതി വിധി.

Also Read: സംസ്ഥാനത്ത് ഇതുവരെ വാക്സിൻ സ്വീകരിച്ചത് ഒരു കോടിയിലധികം ആളുകള്‍; കൂടുതലും സ്വീകരിച്ചത് സ്ത്രീകള്‍

നീരവ് മോദിയുടെ ഹര്‍ജി ഹൈക്കോടതി തള്ളിയിട്ടുണ്ടെന്നും എന്നാൽ നീരവ് മോദിയ്ക്ക് ഇനിയും കോടതിയെ സമീപിക്കാൻ അവസരമുണ്ടെന്നും ബന്ധപ്പെട്ട വൃത്തങ്ങള്‍ വാര്‍ത്താ ഏജൻസിയോടു പറഞ്ഞു. 2018 ജനുവരി ഒന്നിന് ഇന്ത്യയിൽ നിന്ന് രക്ഷപെട്ട നീരവ് മോദി 2019 മാര്‍ച്ച് 19ന് യുകെയിൽ വെച്ച് അറസ്റ്റിലാകുകയായിരുന്നു. തുടര്‍ന്ന് വാൻഡ്സ്വര്‍ത്ത് ജയിലിലാണ് ഇദ്ദേഹത്തെ പാര്‍പ്പിച്ചിട്ടുള്ളത്. ജാമ്യം ആവശ്യപ്പെട്ട് പല തവണ നീരവ് മോദി കോടതിയെ സമീപിച്ചെങ്കിലും ആവശ്യം അംഗീകരിക്കപ്പെട്ടിരുന്നില്ല.

Also Read: ‘വിസ്മയയുടെ വീട്ടുകാരുടെ നിസഹകരണമാണ് എല്ലാത്തിനും കാരണം’: കിരണിന്റെ പിതാവ്

അതേസമയം, നീരവ് മോദി, മെഹുൽ ചോക്സി, വിജയ് മല്യ എന്നിവരുടെ 18,170 കോടി രൂപ മൂല്യം വരുന്ന സ്വത്തുക്കള്‍ ഇന്ത്യയിൽ കണ്ടുകെട്ടി. ഇതിൽ 9371 കോടി രൂപ പണം നഷ്ടപ്പെട്ട ബാങ്കുകള്‍ക്കും കേന്ദ്രസര്‍ക്കാരിനും കൈമാറി. മൂന്നു പേര്‍ വഴി 22000 കോടിയിലധികം രൂപയുടെ നഷ്ടം രാജ്യത്തിന് ഉണ്ടായിട്ടുണ്ടെന്നാണ് കണക്കുകള്‍.