വളരെയധികം ആരോഗ്യ ഗുണങ്ങൾ അടങ്ങിയ പാനീയമാണ് ഗ്രീൻ ടീ. ഭാരം നിയത്രിക്കാനും കൊളസ്‌ട്രോൾ കുറയ്ക്കാനുമെല്ലാം ഗ്രീൻ ടീ സഹായിക്കുന്നുണ്ട്. ഗ്രീൻ ടീയുടെ ചില പ്രധാന ഗുണങ്ങൾ അറിയാം.
ഹൈലൈറ്റ്:
- ഗ്രീൻ ടീ ഹൃദയാരോഗ്യം മെച്ചപ്പെടുത്താൻ സഹായിക്കുന്നതെങ്ങനെ?
- ഗ്രീൻ ടീ പതിവാക്കിയാൽ ലഭിക്കുന്ന ചില ഗുണങ്ങൾ അറിയാം.
ഭാരം നിയന്ത്രിക്കാൻ
ശരീരഭാരം കുറയ്ക്കാൻ ശ്രമിക്കുന്നവരുടെ ഏറ്റവും പ്രിയപ്പെട്ട പാനീയമാണ് ഗ്രീൻ ടീ. ഇതിൽ അടങ്ങിയിട്ടുള്ള ആന്റിഓക്‌സിഡന്റുകൾ ശരീരഭാരം കുറയ്ക്കാൻ സഹായിക്കുന്നു. കൂടാതെ, ശരീരത്തിലെ മെറ്റബോളിസം മെച്ചപ്പെടുത്താൻ സഹായിക്കുന്ന എപിഗല്ലോകാറ്റച്ചിൻ ഗാലേറ്റ് ഗ്രീൻ ടീയിൽ അടങ്ങിയിരിക്കുന്നു.
കൊളസ്‌ട്രോൾ കുറയ്ക്കാൻ
ഹൃദ്രോഗത്തിന്റെ പ്രധാന കാരണങ്ങളിലൊന്ന് രക്തത്തിലെ ഉയർന്ന കൊളസ്ട്രോളിന്റെയും ട്രൈഗ്ലിസറൈഡിന്റെയും അളവാണ്. ആരോഗ്യകരമായി തുടരാൻ കൊളസ്‌ട്രോൾ നിയന്ത്രിച്ചേ മതിയാകൂ… ലോ ഡെൻസിറ്റി കൊളസ്‌ട്രോളിന്റെ (എൽഡിഎൽ) ഓക്‌സിഡേഷൻ ധമനികളിൽ പ്ലാക്ക് രൂപപ്പെടാൻ കാരണമാകും, ഇത് ഹൃദ്രോഗങ്ങൾക്കും പക്ഷാഘാതത്തിനും കാരണമാകുന്നു. ഗ്രീൻ ടീ, അതിന്റെ ആന്റിഓക്‌സിഡന്റ് ഗുണങ്ങളാൽ, എൽഡിഎല്ലിന്റെ ഓക്‌സിഡേഷൻ തടയുന്നു.
ഗ്രീൻ ടീ കുടിക്കുന്നത് രക്തത്തിലെ മൊത്തം കൊളസ്‌ട്രോളും ചീത്ത കൊളസ്‌ട്രോളും (എൽഡിഎൽ) കുറയ്ക്കുമെന്ന് പഠനങ്ങൾ തെളിയിക്കുന്നു.
പഴങ്ങളും പച്ചക്കറികളും കഴിക്കുമ്പോൾ ഈ കാര്യം മറക്കല്ലേ
സമ്മർദ്ദം കുറയ്ക്കാൻ
അമിതമായി സമ്മർദ്ദം അനുഭവിക്കുന്നത് മൊത്തം ആരോഗ്യത്തെ തന്നെ ബാധിക്കും എന്നത് പലർക്കും അറിയില്ല. എന്നാൽ ഗ്രീൻ ടീ കുടിക്കുന്നത് സമ്മർദ്ദം നിയന്ത്രിക്കാൻ സഹായിക്കുമെന്ന കാര്യം അറിയാമോ? ഗ്രീൻ ടീയിലെ പോളിഫെനോൾ തലച്ചോറിലേക്ക് ഗ്ലൂക്കോസിന്റെ സ്ഥിരമായ വിതരണം നൽകാനും സമ്മർദ്ദവും വിഷാദവും കുറയ്ക്കാനും സഹായിക്കുന്നു. കൂടാതെ ഗ്രീൻ ടീയിലെ ചില ഘടകങ്ങൾ ആന്റി ഡിപ്രസന്റായി പ്രവർത്തിക്കുകയും സമ്മർദ്ദം, ഉത്കണ്ഠ എന്നിവയിൽ നിന്ന് ആശ്വാസം നൽകുകയും ചെയ്യുന്നു.
വായയുടെ ആരോഗ്യത്തിന്
ഗ്രീൻ ടീ കുടിക്കുന്നത് പല്ലിന്റെ ആരോഗ്യം മെച്ചപ്പെടുത്തുന്നതിനും കാവിറ്റി ഉണ്ടാകാനുള്ള സാധ്യത കുറയ്ക്കുന്നതിനും സഹായിക്കുന്നു. പോളിഫിനോൾസ്, ആന്റിഓക്‌സിഡന്റുകൾ, സ്വാഭാവിക ഫ്ലൂറൈഡ് തുടങ്ങിയവ വായ്നാറ്റം, ദന്തക്ഷയം, കാവിറ്റി, വിവിധ മോണ രോഗങ്ങൾ എന്നിവയ്ക്ക് കാരണമാകുന്ന ബാക്ടീരിയകളെ ഫലപ്രദമായി നശിപ്പിക്കും. വായയുടെ ആരോഗ്യം മെച്ചപ്പെടുത്താൻ ഗ്രീൻ ടീൻ കുടിക്കുമ്പോൾ അതിൽ പഞ്ചസാര, തേൻ അല്ലെങ്കിൽ മറ്റ് മധുരങ്ങൾ ചേർക്കുന്നത് ഒഴിവാക്കുക.
പ്രമേഹം നിയന്ത്രിക്കാൻ
രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുന്ന മികച്ച പാനീയങ്ങളിലൊന്നാണ് ഗ്രീൻ ടീ. ഗ്രീൻ ടീ കുടിക്കുന്നത് ടൈപ്പ് 2 പ്രമേഹത്തിനുള്ള സാധ്യത കുറയ്ക്കാൻ സഹായിക്കുമെന്ന് ഗവേഷണങ്ങളിലൂടെ കണ്ടെത്തിയിട്ടുണ്ട്. എന്നിരുന്നാലും, സ്ഥിരമായി, അമിതമായ അളവിൽ ഗ്രീൻ ടീ കഴിക്കുന്നത് കരൾ തകരാറിന് കാരണമാകുമെന്ന് കണ്ടെത്തിയിട്ടുണ്ട്. അതുകൊണ്ട് തന്നെ പരിമിതമായ അളവിൽ ഗ്രീൻ ടീ കുടിക്കുന്നതാണ് എപ്പോഴും നല്ലത്.
നിരവധി ഗുണങ്ങളുള്ള ക്യാരറ്റ്-നെല്ലിക്ക ജ്യൂസ്
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : this is why you should drink green tea everyday
Malayalam News from Samayam Malayalam, TIL Network
