‘എങ്കിൽ പിന്നെ അനുഭവിച്ചോ!’ ഭർതൃപീഡനം അറിയിക്കാൻ വിളിച്ച സ്ത്രീയോട് കയർത്തു വനിതാ കമ്മീഷൻ

കൊച്ചി: ഭര്‍തൃപീഡനവും സ്ത്രീധനപീഡനവും വിളിച്ചറിയിക്കാനായി നടത്തിയ ചാനൽ പരിപാടിയ്ക്കിടെ പരാതി പറയാൻ വിളിച്ച സ്ത്രീയോടു കയര്‍ത്തു സംസാരിച്ച് വനിതാ കമ്മീഷൻ അധ്യക്ഷ എംസി ജോസഫൈൻ. ഭര്‍ത്താവ് ഉദ്രവിക്കാറുണ്ടെന്നും എന്നാൽ ഇതുവരെ പോലീസിൽ വിളിച്ച് അറിയിച്ചില്ലന്നും പറഞ്ഞ സ്ത്രീയോടു അനുഭവിച്ചോ എന്നായിരുന്നു വനിതാ കമ്മീഷൻ അധ്യക്ഷയുടെ പെട്ടെന്നുള്ള മറുപടി. എന്തുകൊണ്ടാണ് പോലീസിൽ അറിയിക്കാതിരുന്നതെന്നും എം സി ജോസഫൈൻ ചോദിച്ചു. പരിപാടിയുടെ വീഡിയോ സമൂഹമാധ്യമങ്ങളിൽ വൈറലായതോടെ നിരവധി പേരാണ് പ്രതിഷേധവുമായി എത്തിയത്.



കൊല്ലം പോരുവഴിയിൽ മരിച്ച വിസ്മയ ഉള്‍പ്പെടെയുള്ള യുവതികള്‍ സ്ത്രീധന പീഡനം നേരിട്ടിരുന്നുവെന്ന റിപ്പോര്‍ട്ടുകളുടെ പശ്ചാത്തലത്തിലായിരുന്നു ചാനൽ പരിപാടി. എന്തിനു സഹിക്കണം എന്ന പേരിൽ മനോരമ ന്യൂസാണ് ബുധാനാഴ്ച വൈകിട്ട് പരിപാടി സംഘടിപ്പിച്ചത്. പരിപാടിയ്ക്കിടെ പ്രേക്ഷകരായ സ്ത്രീകള്‍ക്ക് ലൈവായി വിളിച്ച് വനിതാ കമ്മീഷൻ അധ്യക്ഷയെ പരാതികള്‍ ബോധിപ്പിക്കാനായിരുന്നു അവസരമുണ്ടായിരുന്നത്. ഈ പരിപാടിയ്ക്കിടെ നടന്ന സംഭാഷണശകലമാണ് സമൂഹമാധ്യമങ്ങളിൽ പ്രചരിക്കുന്നത്.

Also Read: വ്യാജന്മാർക്ക് പൂട്ടു വീഴുന്നു; വ്യാജ അക്കൗണ്ടുകളെക്കുറിച്ച് പരാതി ലഭിച്ചാൽ 24 മണിക്കൂറിനകം നീക്കം ചെയ്യാൻ നിർദേശം

എറണാകുളത്തു നിന്നു വിളിച്ച ഒരു സ്ത്രീയോടായിരുന്നു വനിതാ കമ്മീഷൻ അധ്യക്ഷയുടെ വിവാദ പരാമര്‍ശങ്ങള്‍. മകളുടെ വിവാഹം 2014ലാണ് കഴിഞ്ഞതെന്നും മകള്‍ വീട്ടിലുണ്ടെന്നുമായിരുന്നു അമ്മ അറിയിച്ചത്. ഇതോടെ മകള്‍ക്ക് ഫോൺ കൊടുക്കാൻ ജോസഫൈൻ ആവശ്യപ്പെടുകയായിരുന്നു. “ഒരാളുടെ അനുഭവം വേറൊരാള്‍ പറഞ്ഞാൽ? അതു ശരിയല്ല, ബീനയുടെ മകള്‍ പറയട്ടേന്ന്.” തുടര്‍ന്ന് പ്രേക്ഷക ഫോൺ മകൾക്ക് കൈമാറുകയായിരുന്നു.

എന്നാൽ യുവതിയുടെ ശബ്ദം ഫോണിൽ കേള്‍ക്കാതെ വന്നതോടെ വനിതാ കമ്മീഷൻ അധ്യക്ഷ സ്വരമുയര്‍ത്തി. “എന്താണ് വിശേഷം, പറയ്” എന്നു പറഞ്ഞതോടെ യുവതി അനുഭവം വിവരിക്കുകായയിരുന്നു. “2014ലാണ് എന്റെ കല്യാണം കഴിഞ്ഞത്. പിറ്റേ മാസം തന്നെ ഭര്‍ത്താവ് ദുബായ്ക്ക് പോയി. പിന്നീട് അമ്മായിയമ്മയും ഭര്‍ത്താവിൻ്റെ സഹോദരനും മാത്രമേ ഉണ്ടായിരുന്നുള്ളൂ. ഭര്‍ത്താവ് പോയതിൽ പിന്നെ അമ്മായിയമ്മയുടെ സ്വഭാവം മാറി.” യുവതി വിവരിച്ചു. എന്നാൽ സാങ്കേതിക തകരാര്‍ മൂലം ശബ്ദം വ്യക്തമാകാതെ വന്നതോടെ “കേള്‍ക്കുന്നില്ല”, “എന്താണ് അവിടെ ഒരു സൗണ്ട്” എന്നിങ്ങനെ എംസി ജോസഫൈൻ ഇടയ്ക്കിടെ ചോദിക്കുന്നുണ്ടായിരുന്നു. യുവതിയ്ക്ക് കുട്ടികളുണ്ടോ എന്ന ചോദ്യവും അവര്‍ക്ക് ആവര്‍ത്തിക്കേണ്ടി വന്നു.

Also Read: രാജ്യത്ത് 54,000 പുതിയ കൊവിഡ് കേസുകള്‍; പോസിറ്റിവിറ്റി നിരക്ക് 2.91%, വാക്സിനേഷൻ 30 കോടിയിൽ

തുടര്‍ന്ന് നിങ്ങളുടെ ഭര്‍ത്താവും അമ്മായിയമ്മയും ഉപദ്രവിക്കുന്നുണ്ടോ എന്നായിരുന്നു ചോദ്യം. ഉണ്ടെന്ന് യുവതി മറുപടി നല്‍കി. എന്നിട്ട്, എന്തുകൊണ്ട് പോലീസിൽ അറിയിച്ചില്ല എന്ന് എംസി ജോസഫൈൻ ചോദിച്ചു. “ഞാൻ ആരെയും അറിയിച്ചിരുന്നില്ല” എന്നായിരുന്നു താഴ്ന്ന സ്വരത്തിൽ യുവതിയുടെ മറുപടി. “എന്നാ പിന്നെ അനുഭവിച്ചോ.” ജോസഫൈൻ പ്രതികരിച്ചു.

ഭര്‍ത്താവിനൊപ്പം ഇനി ജീവിക്കാൻ താത്പര്യമില്ലെങ്കിൽ കുടുംബ കോടതി വഴി നല്ല വക്കീലിനെ ഉപയോഗിച്ച് പോകണമെന്നും കൊടുത്ത സ്ത്രീധനവും നഷ്ടപരിഹാരവും കിട്ടാനായി വാദിക്കണമെന്നും ഉപദേശിച്ചു. വനിതാ കമ്മീഷനിൽ പരാതി അറിയിക്കാമെങ്കിലും ഭര്‍ത്താവ് വിദേശത്താണെന്ന കാര്യവും വനിതാ കമ്മീഷൻ ഓര്‍മിപ്പിച്ചു.

അതേസമയം, പരിപാടിയുടെ വീഡിയോ വൈറലായതോടെ നിരവധി പേരാണ് വിമര്‍ശനവുമായി എത്തിയത്. പീഡിതരായ സ്ത്രീകളാണ് വിളിക്കുന്നത്, അവരോടു ഇങ്ങനെ തന്നെ സംസാരിക്കണമെന്നായിരുന്നു അഭിഭാഷകയായ കുക്കു ദേവസ്സിയുടെ പ്രതികരണം. ഭര്‍തൃഗൃഹമോ വനിതാ കമ്മീഷനോ ഭേദം എന്നായിരുന്നു എഴുത്തുകാരി ശാരദക്കുട്ടിയുടെ പ്രതികരണം.