ഭർതൃവീട്ടിലെ ജനൽകമ്പിയിൽ യുവതിയെ തൂങ്ങിമരിച്ച നിലയിൽ കണ്ടെത്തിയ സംഭവം; ഭർത്താവ് അറസ്റ്റിൽ

കട്ടപ്പന: ഭർത്താവിന്‍റെ വീട്ടിൽ യുവതിയെ തൂങ്ങിമരിച്ച നിലയിൽ കണ്ടെത്തിയ സംഭവത്തിൽ ഭർത്താവ് അറസ്റ്റിൽ. ചേറ്റുകുഴി പടീശേരിൽ ജയപ്രകാശിന്‍റെ മകൾ ധന്യ (21) മരിച്ച കേസിലാണ് ഭർത്താവ് അമൽ ബാബു അറസ്റ്റിലായത്. മാർച്ച് 29നു പുലർച്ചെയായിരുന്നു ധന്യയെ മാട്ടുക്കട്ടയിലെ അമലിന്‍റെ വീട്ടിൽ മുറിയിലെ ജനൽക്കമ്പിയിൽ തൂങ്ങിമരിച്ച നിലയിൽ കണ്ടെത്തിയത്.



സ്വകാര്യ സ്ഥാപനത്തിൽ ജോലി ചെയ്യുന്ന അമൽ പുലർച്ചെ ജോലിക്കായി പോയ ശേഷമായിരുന്നു സംഭവമെന്നാണ് മലയാള മനോരമ റിപ്പോർട്ട് ചെയ്യുന്നത്. ദമ്പതികൾക്ക് 8 മാസം പ്രായമുള്ള കുട്ടിയുണ്ട്. തൂങ്ങിയ നിലയിൽ കണ്ടെത്തിയ ധന്യയെ ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു. വിവാഹശേഷം അമൽ മർദ്ദിച്ചിരുന്നതായി ധന്യ മാതാപിതാക്കളോട് പറഞ്ഞിരുന്നെന്നാണ് റിപ്പോർട്ട്.

പെരിന്തൽമണ്ണ ദൃശ്യ വധം: പ്രതി വിനീഷ് ജയിലിൽ ആത്മഹത്യക്ക് ശ്രമിച്ചു

2019 നവംബറിലായിരുന്നു ധന്യയുടേയും അമലിന്‍റെയും വിവാഹം. 27 പവന്‍റെ സ്വർണാഭരണങ്ങളും 2 ലക്ഷം രൂപയും നൽകിയായിരുന്നു വിവാഹം നടത്തിയതെന്നാണ് റിപ്പോർട്ട്. ഭർത്താവ് മർദ്ദിച്ചിരുന്നെന്നും കുടുംബാംഗങ്ങളിൽ നിന്ന് മാനസികപീഡനം ഏറ്റിരുന്നതായും മകൾ പറഞ്ഞതായി ജയപ്രകാശിനെ ഉദ്ധരിച്ചുള്ള മനോരമ റിപ്പോർട്ടിലുണ്ട്.

Also Read : മകന്‍റെ നിലവിളി കേട്ടു; ചെന്നുനോക്കുമ്പോൾ കിരൺ വിസ്മയയുടെ നെഞ്ചിൽ ശ്വാസം കിട്ടാനായി അമർത്തുകയായിരുന്നു; കിരണിന്‍റെ മാതാപിതാക്കൾ



മരിക്കുന്നതിന്‍റെ തലേദിവസം ഉച്ചകഴിഞ്ഞ് ധന്യ വിളിച്ചപ്പോൾ അമൽ മർദിച്ചതായി പറഞ്ഞിരുന്നു. പിറ്റേന്നു മാതാപിതാക്കൾ നേരിട്ടു ചെന്ന് മകളെ കൂട്ടിക്കൊണ്ടുവരാനിരിക്കെയായിരുന്നു മരണമെന്നാണ് റിപ്പോർട്ട്. മകളുടെ പോലും പൊക്കം ഇല്ലാത്ത ജനലിൽ തൂങ്ങിമരിച്ചെന്ന വാദവും മർദനവും കാട്ടി ജയപ്രകാശ് പോലീസിൽ പരാതി നൽകുകയായിരുന്നു. ഈ പരാതിയിലാണ് അമൽ അറസ്റ്റിലായത്. പീരുമേട് കോടതിയിൽ ഹാജരാക്കിയ അമലിനെ റിമാൻഡ് ചെയ്തു.