Sumayya P | Samayam Malayalam | Updated: Mar 29, 2022, 3:44 PM
താലിബാന്‍ അഫ്ഗാനിസ്താനില്‍ അധികാരം പിടിച്ച ശേഷവും ഖത്തര്‍ കേന്ദ്രമായി ഇരുവിഭാഗങ്ങളും നടത്തിവന്ന ചര്‍ച്ചകള്‍ തുടരുകയായിരുന്നു.
ദോഹ: ഹൈസ്‌കൂളില്‍ പെണ്‍കുട്ടികള്‍ക്ക് പ്രവേശനം നല്‍കാമെന്ന വാഗ്ദാനത്തില്‍ നിന്ന് താലിബാന്‍ പിറകോട്ടുപോയ സാഹചര്യത്തില്‍ അഫ്ഗാന് ഇടക്കാല സര്‍ക്കാര്‍ പ്രതിനിധികളുമായി അമേരിക്ക ദോഹയില്‍ നടത്താനിരുന്ന ചര്‍ച്ച റദ്ദാക്കി. അഫ്ഗാന്റെ സാമ്പത്തിക പുരോഗതിയുമായി ബന്ധപ്പെട്ട കാര്യങ്ങള്‍ ഉള്‍പ്പെടെയുള്ള സുപ്രധാന വിഷയങ്ങള്‍ ഉള്‍പ്പെടെ ചര്‍ച്ച ചെയ്യാനിരുന്ന യോഗമാണ് റദ്ദാക്കിയതെന്ന് യുഎസ് സ്‌റ്റേറ്റ് ഡിപ്പാര്‍ട്ട്‌മെന്റ് പ്രതിനിധികളെ ഉദ്ധരിച്ച് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.
നിലവില്‍ പെണ്‍കുട്ടികള്‍ക്ക് പ്രവേശനം ആറാം ക്ലാസ്സ് വരെ
സെക്കന്‍ഡറി ക്ലാസ്സുകളില്‍ പെണ്‍കുട്ടികള്‍ക്ക് പ്രവേശനം അനുവദിക്കാമെന്ന വാഗ്ദാനത്തില്‍ നിന്ന് താലിബാന്‍ പിന്‍മാറിയതിനെ തുടര്‍ന്നാണ് നടപടി. നിലവില്‍ ആറാം ക്ലാസ്സ് വരെ മാത്രമേ പെണ്‍കുട്ടികള്‍ക്ക് സ്‌കൂളില്‍ ഹാജരാവാന്‍ താലിബാന്‍ അനുവാദം നല്‍കുന്നുള്ളൂ. അതായത് 11 വയസ്സ് കഴിഞ്ഞ കുട്ടികള്‍ക്ക് സ്‌കൂളില്‍ പ്രവേശനം അനുവദിക്കുന്നില്ല. എന്നാല്‍ മാര്‍ച്ച് അവസാന വാരം മുതല്‍ ഏഴാം ക്ലാസ്സ് മുതലുള്ള ക്ലാസ്സുകളില്‍ പഠിക്കുന്ന പെണ്‍കുട്ടികള്‍ക്കും സ്‌കൂളില്‍ പോവാന്‍ അനുവാദം നല്‍കുമെന്ന് താലിബാന്‍ വാഗ്ദാനം ചെയ്തിരുന്നു. എന്നാല്‍ അവസാന നിമിഷം താലിബാന്‍ വാക്കു മാറ്റിയതാണ് അമേരിക്കയെ ചൊടിപ്പിച്ചതെന്നാണ് റിപ്പോര്‍ട്ട്.
യോഗം റദ്ദാക്കിയത് സമ്മര്‍ദ്ദ തന്ത്രത്തിന്റെ ഭാഗമായി
അഫ്ഗാന് ജനതയ്ക്കും അന്താരാഷ്ട്ര സമൂഹത്തിനും താലിബാന്‍ നല്‍കിയ വാക്ക് പാലിക്കാന്‍ ഇടക്കാല സര്‍ക്കാരിന് മേല്‍ സമ്മര്‍ദ്ദം ചെലുത്തുകയെന്ന ലക്ഷ്യത്തോടെയാണ് സുപ്രധാന വിഷയങ്ങള്‍ ചര്‍ച്ച ചെയ്യാനിരുന്ന യോഗം അമേരിക്ക വേണ്ടെന്നു വച്ചത്. രണ്ടു പതിറ്റാണ്ടിലേറെ നീണ്ട അമേരിക്കയും താലിബാനും തമ്മിലുള്ള സംഘര്‍ഷം ലഘൂകരിക്കാന്‍ താലിബാന്റെ ദോഹ ഓഫീസ് വഴിയായിരുന്നു ഖത്തര്‍ ഇരുവിഭാഗത്തെയും ചര്‍ച്ചകളിലേക്ക് കൊണ്ടുവന്നത്.
ദോഹയില്‍ നടക്കാനിരുന്നത് സുപ്രധാന യോഗം
അഫ്ഗാന് സെന്‍ട്രല്‍ ബാങ്കിനുള്ള അംഗീകാരം, അഫ്ഗാന് പുതിയ കറന്‍സി അടിച്ചിറക്കല്‍ തുടങ്ങിയ സുപ്രധാന സാമ്പത്തിക വിഷയങ്ങളുമായി ബന്ധപ്പെട്ട ചര്‍ച്ചകളായിരുന്നു ഇരു വിഭാഗവും തമ്മില്‍ നടത്താനിരുന്നത്. ദോഹയില്‍ കഴിഞ്ഞ ശനി, ഞായര്‍ ദിവസങ്ങളില്‍ നടക്കേണ്ടിയുന്ന യോഗത്തില്‍ വേള്‍ഡ് ബാങ്കിന്റെയും യുഎന്നിന്റെയും പ്രതിനിധികളും പങ്കെടുക്കുന്‍ തീരുമാനിച്ചിരുന്നു. എന്നാല്‍ പെണ്‍കുട്ടികളുടെ വിദ്യാഭ്യാസ കാര്യത്തില്‍ താലിബാന്‍ നിലപാടില്‍ പ്രതിഷേധിച്ച് യോഗം വേണ്ടെന്നു വയ്ക്കുകയായിരുന്നുവെന്ന് അമേരിക്ക വ്യക്തമാക്കി.
താലിബാന്‍ തീരുമാനത്തില്‍ ഖത്തര്‍ നടുക്കം പ്രകടിപ്പിച്ചു
താലിബാന്റെ തീരുമാനം അപലപനീയമാണെന്നും പെണ്‍കുട്ടികളെ തിരികെ സ്‌കൂളില്‍ പ്രവേശിപ്പിക്കാമെന്ന വാഗ്ദാനം താലിബാന്‍ ലംഘിച്ചിരിക്കുകായണെന്നും അഫ്ഗാനിലെ യുഎസ് പ്രത്യേക പ്രതിനിധി തോമസ് വെസ്റ്റ് കുറ്റപ്പെടുത്തി. എന്നാല്‍ പ്രതീക്ഷ പൂര്‍ണമായും അവസാനിച്ചിട്ടില്ലെന്നും ഈ തീരുമാനം താലിബാന്‍ പുനപ്പരിശോധിക്കുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേര്‍ത്തു. ഹൈസ്‌കൂളില്‍ പെണ്‍കുട്ടികള്‍ക്ക് പ്രവേശനാനുമതി നിഷേധിച്ച താലിബാന്‍ നിലപാടില്‍ ഖത്തറും നടുക്കം രേഖപ്പെടുത്തി. ഈ നടപടി അംഗീകരിക്കാനാവില്ലെന്ന് ഖത്തര്‍ വിദേശകാര്യ മന്ത്രി ശെയ്ഖ് മുഹമ്മദ് ബിന്‍ അബ്ദുല്‍ റഹ്മാന്‍ അല്‍ താനി വ്യക്തമാക്കി. ഈ തീരുമാനത്തില്‍ നിന്ന് പിന്‍മാറാനും പെണ്‍കുട്ടികള്‍ക്ക് ഹൈസ്‌കൂള്‍ ക്ലാസ്സുകളില്‍ പ്രവേശനം അനുവദിക്കാനും താലിബാന്‍ ഭരണകൂടം തയ്യാറാകണമെന്നും അദ്ദേഹം പറഞ്ഞു
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : us cancels doha meetings with taliban after u turn on girls education
Malayalam News from Samayam Malayalam, TIL Network
