നടിയെ ആക്രമിച്ച കേസിലെ തുടരന്വേഷണം അന്തിമഘട്ടത്തിലേയ്ക്ക് കടക്കുന്ന സാഹചര്യത്തിലാണ് കേസിലെ പുതിയ വെളിപ്പെടുത്തലുകള്‍ സംബന്ധിച്ച് പ്രതികളെ പോലീസ് ചോദ്യം ചെയ്യുന്നത്.
ഹൈലൈറ്റ്:
- മറ്റു പ്രതികളെയും ചോദ്യം ചെയ്യും
- ആക്രമണദൃശ്യങ്ങൾ കണ്ടിട്ടില്ലെന്ന് ദിലീപ്
- ബാലചന്ദ്രകുമാറിനെ വിളിപ്പിച്ച് ഉദ്യോഗസ്ഥര്‍
നടിയെ ആക്രമിച്ച ദൃശ്യങ്ങള്‍ ദിലീപിൻ്റെ കൈവശമുണ്ടോ എന്ന കാര്യത്തിലാണ് പ്രധാനമായും അന്വേഷണം നടക്കുന്നത്. തന്‍റെ കൈയ്യിൽ ദൃശ്യങ്ങള്‍ ഇല്ലെന്നു ദിലീപ് ആവര്‍ത്തിക്കുന്നുണ്ടെങ്കിലും പുതുതായി ലഭിച്ച വെളിപ്പെടുത്തലുകളുടെ അടിസ്ഥാനത്തിൽ വിശദമായ അന്വേഷണത്തിനാണ് പോലീസ് പദ്ധതിയിടുന്നത്. ഇന്നലെയാണ് ചോദ്യം ചെയ്യൽ ആരംഭിച്ചത്. ഏപ്രിൽ 15നു മുൻപായി തുടരന്വേഷണം പൂര്‍ത്തിയാക്കി റിപ്പോര്‍ട്ട് സമര്‍പ്പിക്കാനാണ് കോടതിയുടെ നിര്‍ദേശം.
ക്രൈം ബ്രാഞ്ച് മേധാവിയായ എസ് ശ്രീജിത്താണ് അന്വേഷണത്തിന് നേതൃത്വം നല്‍കുന്നത്. ഇന്നലെ ഏഴു മണിക്കൂറോളം ചോദ്യം ചെയ്ത ശേഷമാണ് ദിലീപിനെ വിട്ടയച്ചത്. ശേഷം ഇന്നു ചോദ്യം ചെയ്യലിനായി വീണ്ടും വിളിപ്പിച്ചു. അതേസമയം, 2018 നവംബര്‍ 15ന് ആലുവയിലെ വീട്ടിൽ വെച്ച് ദിലീപ് ആക്രമണ ദൃശ്യങ്ങള്‍ കണ്ടെന്ന സംവിധായകൻ ബാലചന്ദ്രകുമാറിൻ്റെ വെളിപ്പെടുത്തലാണ് ദിലീപിനു മുന്നിലെ കുരുക്ക്. എന്നാൽ ഈ വാദം തള്ളിയ ദിലീപ് ദൃശ്യങ്ങള്‍ തന്‍റെ കൈവശമില്ലെന്നും വ്യക്തമാക്കി. എന്നാൽ ഇക്കാര്യം അന്വേഷണസംഘം വിശ്വാസത്തിലെടുത്തിട്ടില്ല. ഈ സാഹചര്യത്തിൽ ബാലചന്ദ്രകുമാറിൻ്റെ ഒപ്പമിരുത്തി ദിലീപിനെ വീണ്ടും ചോദ്യം ചെയ്യാനാണ് അന്വേഷണസംഘത്തിൻ്റെ തീരുമാനമെന്നാണ് റിപ്പോര്‍ട്ടുകള്‍.
ആക്രമണദൃശ്യങ്ങൾ ദിലീപിൻ്റെ വീട്ടിലെത്തിച്ചു നല്‍കിയത് ഒരു വിഐപിയാണെന്നാണ് ബാലചന്ദ്രകുമാറിൻ്റെ മൊഴി. ഇത് ദിലീപിൻ്റെ സുഹൃത്തായ ശരത്താണെന്ന് ക്രൈം ബ്രാഞ്ച് കരുതുന്നു. ഇദ്ദേഹത്തെ കളമശേരി ക്രൈം ബ്രാഞ്ച് ഓഫീസിലെത്തിച്ച് ചോദ്യം ചെയ്യൽ തുടരുകയാണ്. എന്നാൽ കേസ് അന്വേഷിക്കുന്ന ഉദ്യോഗസ്ഥരെ വധിക്കാൻ ഗൂഢാലോചന നടത്തിയെന്ന കേസിലാണ് ഇദ്ദേഹത്തെ ചോദ്യം ചെയ്യുന്നതെന്നാണ് ക്രൈം ബ്രാഞ്ച് വിശദീകരിക്കുന്നത്. ഈ കേസിൽ ആറാം പ്രതിയാണ് വ്യവസായിയും ദിലീപിൻ്റെ അടുത്ത സുഹൃത്തുമായ ശരത്ത്.
ഇതിനിടെ സൈബര്‍ വിദഗ്ധനായ സായ് ശങ്കറിൻ്റെ സഹായത്തോടെ ദിലീപ് തന്‍റെ കൈവശമുള്ള ഫോണുകളിലെ ചില സുപ്രധാന വിവരങ്ങൾ മായ്ച്ചു കളഞ്ഞതായി ക്രൈം ബ്രാഞ്ചിന് വിവരം ലഭിച്ചിരുന്നു. അന്വേഷണത്തിൻ്റെ ഭാഗമായി ഫോണുകള്‍ കോടതിയിൽ സമര്‍പ്പിക്കുന്നതിനു മുൻപായിരുന്നു സംഭവം. ഇത്തരത്തി. നശിപ്പിച്ച വിവരങ്ങളിൽ വിചാരണക്കോടതിയിലെ ചില രഹസ്യസ്വഭാവമുള്ള രേഖകളും ഉണ്ടായിരുന്നുവെന്നും ഇവ ഒരു നമ്പറിൽ നിന്ന് വാട്സാപ്പ് വഴിയാണ് എത്തിയതെന്നുമാണ് ക്രൈം ബ്രാഞ്ച് വൃത്തങ്ങൾ പറയുന്നത്. ഈ രേഖകളിൽ ചിലത് വീണ്ടെടുക്കാൻ കഴിഞ്ഞിട്ടുണ്ടെന്നും ഉദ്യോഗസ്ഥര്‍ പറയുന്നു. ഇത്തരത്തിൽ ദിലീപിന് ആരാണ് രേഖകള്‍ ചോര്‍ത്തി നല്‍കിയതെന്നും പോലീസ് പരിശോധിക്കുന്നുണ്ട്.
അതേസമയം, ജയിലിൽ സുരക്ഷാഭീഷണിയുണ്ടെന്നും ജാമ്യം വേണമെന്നും കാണിച്ച് കേസിലെ ഒന്നാം പ്രതിയായ പള്‍സര്‍ സുനി നല്‍കിയ ജാമ്യാപേക്ഷ ഹൈക്കോടതി തള്ളി. കേസിലെ തുടരന്വേഷണം നടക്കുന്ന സാഹചര്യത്തിൽ ഇപ്പോള്‍ ജാമ്യം അനുവദിക്കാൻ കഴിയില്ലെന്ന് കോടതി വ്യക്തമാക്കി.
തിരുവനന്തപുരത്തെ ഈ ഗ്രാമങ്ങളിൽ പണിമുടക്കില്ല!
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : kerala crime branch questions actor dileep along with balachandra kumar in actress case
Malayalam News from Samayam Malayalam, TIL Network
