പുതിയ പോലീസ് മേധാവി: പട്ടികയിൽ നിന്ന് തച്ചങ്കരി പുറത്ത്, ബി സന്ധ്യയും സുധേഷ്‌കുമാറും അനില്‍കാന്തും പരിഗണനയിൽ

തിരുവനന്തപുരം: സംസ്ഥാനത്തെ പുതിയ പോലീസ് മേധാവി സ്ഥാനത്തേക്കുള്ള മൂന്ന് പേരുടെ അന്തിമ പട്ടികയായി. സുധേഷ് കുമാർ, ബി സന്ധ്യ, അനിൽകാന്ത് എന്നിവരാണ് യൂണിയൻ പബ്ലിക് സർവീസ് കമ്മിഷൻ്റെ (യുപിഎസ്‌സി) അന്തിമ പട്ടികയിലുള്ളത്. ടോമിൻ തച്ചങ്കരിയെ പട്ടികയിൽ നിന്ന് ഒഴിവാക്കി. വ്യാഴാഴ്ച ചേർന്ന യുപിഎസ്‌സി സമിതി യോഗമാണ് അന്തിമ ചുരുക്ക പട്ടിക തയ്യാറാക്കിയത്.



ജോസഫൈനെതിരെ നടപടിക്ക് സാധ്യത; അതൃപ്തി പ്രകടിപ്പിച്ച് സിപിഎം

ഈ പേരുകളിൽ നിന്ന് ഒരാളെ സംസ്ഥാന സർക്കാരിന് പോലീസ് മേധാവിയായി നിയമിക്കാം. പട്ടികയിലുള്ള സുദേഷ് കുമാരിനും സന്ധ്യയ്ക്കും ഡിജിപി റാങ്കുണ്ട്. ആദ്യമായിട്ടാണ് യുപിഎസ്‌സി സമിതിക്ക് പാനൽ സമർപ്പിച്ച് അവർ നൽകുന്ന പേരുകളിൽ നിന്ന് ഒരാളെ പോലീസ് മേധാവിയായി നിയമിക്കേണ്ടി വരുന്നത്. സീനിയോറിറ്റി മറികടന്ന് ഇഷ്ടക്കാരെയാണ് സർക്കാരുകൾ ഇതുവരെ നിയമിച്ഛിരുന്നത്. എന്നാൽ, സുപ്രീം കോടതിയുടെ കർശന വിധി വന്നതോടെയാണ് സർക്കാരിന് യുപിഎസ്‌സിക്ക് മുന്നിൽ പട്ടിക സമർപ്പിക്കേണ്ടി വന്നു.

പോലീസ് മേധാവി സ്ഥാനത്തേക്ക് പരിഗണിക്കപ്പെട്ടവരിൽ പ്രമുഖനായിരുന്ന തച്ചങ്കരിക്ക് വിജിലൻസ് കേസുകളാണ് തിരിച്ചടിയായതെന്നാണ് റിപ്പോർട്ട്. കേരളത്തിൻ്റെ പട്ടികയിൽ ഉണ്ടായിരുന്ന അരുൺ കുമാർ സിൻ ഹ കേരളത്തിലേക്ക് മടങ്ങിവരാൻ ആഗ്രഹിക്കുന്നില്ലെന്ന് വ്യക്തമാക്കിയിരുന്നു. നിലവിൽ എസ്.പി.ജി മേധാവിയാണ് അരുൺ കുമാർ സിൻഹ. 12 പേരുടെ പട്ടികയാണ് സംസ്ഥാന സർക്കാർ നൽകിയിരുന്നത്.

‘ഒരമ്മയുടെ സ്വാതന്ത്ര്യത്തോടെയാണ് ചോദിച്ചത്’: ഖേദം പ്രകടിപ്പിച്ച് ജോസഫൈൻ

ഡൽഹിയിൽ നടന്ന യൂണിയൻ പബ്ലിക് സർവീസ് കമ്മിഷൻ യോഗത്തിൽ സംസ്ഥാന സർക്കാരിൻ്റെ പ്രതിനിധികളായി ചീഫ് സെക്രട്ടറി വി പി ജോയ്, ഡിജിപി ലോക്നാഥ് ബെഹ്റ എന്നിവർ പങ്കെടുത്തു. ബി സന്ധ്യയുടെ പേരു പട്ടികയിൽ വന്നതോടെ ഇതാദ്യമായിട്ടാണ് ഒരു വനിതയെ ക്രമസമാധന ചുമതലയുള്ള ഡിജിപി സ്ഥാനത്തേക്ക് പരിഗണിക്കുന്നത്. നിലവിൽ ഫർഫോഴ്സ് മേധാവിയാണ് സന്ധ്യ, സുധേഷ് കുമാർ വിജിലൻസ് ഡയറക്ടറും അനിൽകാന്ത് റോഡ് സേഫ്റ്റി കമ്മീഷണറുമാണ്. ജൂൺ മുപ്പതിന് ലോക്നാഥ് ബെഹ്റ വിരമിക്കുന്നതോടെ അടുത്ത പോലീസ് മേധാവി അധികാരമേൽക്കും.