മിനിയാപോളിസ്: അമേരിക്കയിലെ ജോര്‍ജ് ഫ്ലോയിഡ് കൊലക്കേസിൽ കുറ്റക്കാരനായ പോലീസുകാരന് കടുത്ത ശിക്ഷ നൽകി കോടതി. കഴുത്തിൽ കാൽമുട്ട് കുത്തിപ്പിടിച്ച് ശ്വാസംമുട്ടിച്ച് കൊലപ്പെടുത്തിയ മുൻ മിനിയാപോളിസ് പോലീസ് ഉദ്യോഗസ്ഥനായ ഡെറക് ഷോവിന് ഇരുപത്തിരണ്ട് വര്‍ഷം തടവ് ശിക്ഷയാണ് ലഭിച്ചത്.

ആവശ്യപ്പെട്ടത് 30 വര്‍ഷത്തെ തടവ്

മിനിയാപോളിസ് കോടതി ജ‍ഡജി പീറ്റര്‍ കാഹിലാണ് ഇത്തരത്തിൽ 22.5 വര്‍ഷത്തെ തടവ് ശിക്ഷയ്ക്ക് വിധിച്ചത്. 30 വര്‍ഷത്തെ തടവാണ് പ്രോസിക്യൂട്ടര്‍മാർ ആവശ്യപ്പെട്ടത്. എന്നാൽ, അതിൽ കുറവാണ് വെള്ളിയാഴ്ച നൽകിയ ശിക്ഷ. അതേസമയം, നല്ലനടപ്പിന് 45 കാരനായ ഷോവിന് ശിക്ഷയുടെ 15 വര്‍ഷം കഴിയുമ്പോഴോ മൂന്നിൽ രണ്ട് ഭാഗമാകുമ്പോഴോ പരോൾ ലഭിക്കുകയും ചെയ്യാമെന്നും വിധി പ്രസ്ഥാവനയിൽ പറയുന്നു.

കോടതി പരാമര്‍ശങ്ങള്‍

കഴിഞ്ഞ ഏപ്രിലിലാണ് ഷോവിൻ കുറ്റക്കാരനാണെന്ന് കോടതി കണ്ടെത്തിയത്. കുറ്റവാളിയായ മുൻ പോലീസ് ഉദ്യോഗസ്ഥൻ വിധി പ്രസ്ഥാവനയുടെ സമയത്ത് കോടതി മുറിയിൽ നിശബ്ദമായി നിൽക്കുകയായിരുന്നുവെന്ന് അമേരിക്കൻ മാധ്യമങ്ങള്‍ റിപ്പോര്‍ട്ട് ചെയ്യുന്നു. കോടതി ഫ്ലോയിഡിന്റെ കുടുംബത്തിന് അനുശോചനം രേഖപ്പെടുത്തി. ഫ്ലോയിഡിന്റെ കുടുംബത്തിന്റെ വേദന തിരിച്ചറിയണമെന്ന് ജഡ്ജി പറഞ്ഞു. അധികാരത്തിന്റെ ദുരുപയോഗം ഒരാളുടെ മരണത്തിന് ഇടയാക്കിയത് നിയമത്തിന്റെ അടിസ്ഥാനത്തിലാണ് ശിക്ഷ വിധിച്ചത് എന്നും വിധി ന്യായത്തിൽ ജഡ്ജി പറയുന്നു.

പ്രോസിക്യൂഷൻ വാദം

പ്രതി പോലീസ് ഉദ്യോഗസ്ഥൻ എന്ന പദവിയുടെ വിശ്വാസവും അധികാരവും കളങ്കപ്പെടുത്തി. ഫ്ലോയിഡിനോട് അതീവ ക്രരമായി പെരുമാറി. കുട്ടികളുടെ മുന്നിൽ വച്ചാണ് കുറ്റകൃത്യം നടത്തിയത് എന്നിങ്ങനെയുള്ള പ്രോസിക്യൂഷന്റെ പ്രധാന കുറ്റാരോപണങ്ങള്‍ കോടതി ശരിവച്ചു.

സംഭവം

2020 മേയ് 25നാണ് ജോര്‍ജ് ഫ്ലോയിഡ് കൊല്ലപ്പെട്ടത്. പൊതുനിരത്തിൽ ഒൻപത് മിനിട്ടോളം സമയം. കഴുത്തിൽ കാൽമുട്ട് അമര്‍ത്തി ഫ്ലോയ്ഡിനെ ശ്വാസം മുട്ടിച്ചാണ് കൊലപ്പെടുത്തിയത്. ഇതിന്റെ വീഡിയോ പുറത്തുവന്നതോടെയാണ് സംഭവം വിവാദമാകുന്നത്. വീഡിയോയിൽ എനിക്ക് ശ്വാസം മുട്ടുന്നു എന്ന പറയുന്നുണ്ടായിരുന്നു. പിന്നീട് ഇത് ഒരു മുദ്രാവാക്യമാക്കി പ്രതിഷേധിക്കുകയും ചെയ്തിരുന്നു.