Sumayya P | Samayam Malayalam | Updated: 26 Jun 2021, 10:01:27 AM
അഭിഭാഷകര്‍ ഇല്ലാത്തവര്‍ക്ക് തങ്ങളുടെ കേസുകള്‍ സ്വന്തമായി വാദിക്കാനും ഫാസ്റ്റ് ട്രാക്ക് കോടതിയില്‍ സൗകര്യമുണ്ടാകും
അബുദാബി: അബുദാബിയില്‍ ഫാസ്റ്റ് ട്രാക്ക് കോടതിയെന്നു പറഞ്ഞാല്‍ അത് ശരിക്കും ഫാസ്റ്റാണ്. പരാതി നല്‍കി അതിന്റെ ചൂടാറും മുമ്പേ കാര്യത്തില്‍ തീരുമാനമാവും. പരമാവധി 15 ദിവസമാണ് ഒരു കേസില്‍ വിധി തീര്‍പ്പാക്കാന്‍ പുതിയ ഫാസ്റ്റ് ട്രാക്ക് കോടതി എടുക്കുക. ഉപപ്രധാനമന്ത്രിയും പ്രസിഡന്‍ഷ്യല്‍ അഫയേഴ്‌സ് മന്ത്രിയുമായ ഷെയ്ഖ് മന്‍സൂര്‍ ബിന്‍ സായിദിന്റെ നിര്‍ദ്ദേശപ്രകാരമാണ് പുതിയ അതിവേഗ കോടതി നിലവില്‍ വന്നത്.
ഏതൊക്കെ കേസുകള്‍ പരിഗണിക്കും?
പുതുതായി നിലവില്‍ ഈ ഫാസ്റ്റ് ട്രാക്ക് കോടതി ക്രിമിനല്‍ കേസുകള്‍ ഉള്‍പ്പെടെ വലിയ കേസുകള്‍ പരിഗണിക്കില്ല. പകരം ഗൗരവം കുറഞ്ഞ കേസുകളില്‍ അതിവേഗം വിചാരണ നടത്തി തീര്‍പ്പ് കല്‍പ്പിക്കും. അഞ്ച് ലക്ഷം ദിര്‍ഹമില്‍ താഴെയുള്ള ക്ലെയിമുകള്‍ ഉള്‍പ്പെടുന്ന സാമ്പത്തിക കേസുകള്‍, തൊഴില്‍ തല്‍ക്കങ്ങള്‍, വേതനവുമായി ബന്ധപ്പെട്ട പരാതികള്‍ തുടങ്ങിയവയാണ് വന്ന ഫാസ്റ്റ് ട്രാക്ക് കോടതി പരിഗണിക്കുക. അബൂദാബി നീതിന്യായ വകുപ്പിന് മുമ്പാകെ എത്തുന്ന ഇത്തരം കേസുകള്‍ അവിടെ നിന്ന് ഫാസ്റ്റ് ട്രാക്ക് കോടതിയിലേക്ക് മാറ്റുകയാണ് ചെയ്യുക.
കേസുകള്‍ എങ്ങനെ ഫയല്‍ ചെയ്യാം?
പുതുതായി രൂപീകരിക്കപ്പെട്ട ഫാസ്റ്റ് ട്രാക്ക് കോടതികളിലേക്കുള്ള പരാതികള്‍ ഓണ്‍ലൈനായി ഫയല്‍ ചെയ്യാന്‍ സൗകര്യമുണ്ട്. ഇതിനായുള്ള പ്രത്യേക ഫോം വെബ്‌സൈറ്റിലുണ്ട്. അല്ലാത്തവര്‍ക്ക് കോടതിയിലെ പ്രത്യേക ഫാസ്റ്റ് ട്രാക്ക് ഡെസ്‌ക്കില്‍ ചെന്ന് നേരിട്ട് കേസ് ഫയല്‍ ചെയ്യാനും സൗകര്യമുണ്ട്. അറബിക്കു പുറമെ, ഇംഗ്ലീഷ്, ഉര്‍ദു, ഇറ്റാലിയന്‍, ഫ്രഞ്ച് ഭാഷകളിലും കേസ് ഫയല്‍ ചെയ്യാം. അഭിഭാഷകര്‍ ഇല്ലാത്തവര്‍ക്ക് തങ്ങളുടെ കേസുകള്‍ സ്വന്തമായി വാദിക്കാനും ഫാസ്റ്റ് ട്രാക്ക് കോടതിയില്‍ സൗകര്യമുണ്ടാകും. അറബി ഭാഷയിലാണ് കോടതി വ്യവഹാരമെന്നതിനാല്‍ അറബി ഭാഷ അറിയാത്തവര്‍ ഒരു പരിഭാഷകന്റെ സഹായം തേടേണ്ടിവരും.
ആദ്യ ഹിയറിംഗില്‍ തന്നെ വിധി
കേസിന്റെ ആദ്യ ഹിയറിംഗില്‍ തന്നെ വിധി പറയണമെന്നാണ് ഫാസ്റ്റ് ട്രാക്ക് കോടതി ലക്ഷ്യമിടുന്നത്. ഇതിനായി കേസ് കോടതിയില്‍ എത്തുന്നതിനു മുമ്പേ മറ്റെല്ലാ നടപടിക്രമങ്ങളും പൂര്‍ത്തിയാക്കി വിധി പ്രഖ്യാപനത്തിനായി തയ്യാറെടുക്കും. ഇതിനായി ഒരു ജഡ്ജിയുടെ നേതൃത്വത്തില്‍ പ്രത്യേക വിഭാഗം ഈ കോടതിയിലുണ്ടാവും. ഇവരാണ് കേസ് പഠിക്കുകയും തെളിവുകള്‍ പരിശോധിക്കുകയും സാക്ഷികളെ വിസ്തരിക്കുകയും ചെയ്യുക. 15 ദിവസത്തിനകം ഈ നടപടിക്രമങ്ങളെല്ലാം പൂര്‍ത്തിയാക്കും. സാധാരണഗതിയില്‍ ഈ നടപടിക്രമങ്ങളെല്ലാം ആരംഭിക്കുന്നത് ആദ്യ ഹിയറിംഗ് വേളയിലാണ്. പലപ്പോഴും കേസിനെ കുറിച്ചുള്ള കൃത്യമായ ധാരണയില്ലാതെയാണ് അഭിഭാഷകര്‍ കോടതിയിലെത്തുക. അതിനാല്‍ കേസ് പഠിക്കുന്നതിനും രേഖകള്‍ ഹാജരാക്കുന്നതിനും കേസ് നീട്ടിവയ്ക്കുകയാണ് പല കേസുകളിലും സംഭവിക്കാറ്. എന്നാല്‍ പുതിയ സംവിധാനത്തില്‍ ആദ്യ 15 ദിവസത്തിനകം ഈ നടപടികളെല്ലാം പൂര്‍ത്തിയാവും.
രണ്ടാം ഹിയറിംഗ് അനിവാര്യ ഘട്ടങ്ങളില്‍ മാത്രം
അതേസമയം, ആദ്യ ഹിയറിംഗില്‍ വിധി പ്രഖ്യാപിക്കാന്‍ പറ്റാത്ത അടിയന്തര സാഹചര്യം ഉയര്‍ന്നുവരുന്ന സാഹചര്യത്തില്‍ കേസ് മാറ്റിവയ്ക്കാന്‍ ജഡ്ജിക്ക് അധികാരമുണ്ടായിരിക്കും. എന്നാല്‍ ഒരു തവണ മാത്രമേ ഇതിന് അവസരമുള്ളൂ. ഇത്തരം സന്ദര്‍ഭങ്ങളില്‍ അടുത്ത 15 ദിവസത്തിനുള്ളില്‍ രണ്ടാം ഹിയറിംഗ് നടത്തി വിധി തീര്‍പ്പാക്കും. ഫാസ്റ്റ് ട്രാക്ക് കോടതി വിധിക്കെതിരേ അപ്പീലിന് പോവാന്‍ സംവിധാനമുണ്ടെങ്കിലും ഇത് നിബന്ധനയ്ക്ക് വിധേയമാണ്. 50,000 മുതല്‍ അഞ്ച് ലക്ഷം വരെ ദിര്‍ഹമുമായി ബന്ധപ്പെട്ട കേസാണെങ്കില്‍ മാത്രമേ അപ്പീല്‍ കോടതിയെ സമീപിക്കാവൂ. 50,000 ദിര്‍ഹമിന് താഴെയാണ് സംഖ്യയെങ്കില്‍ ഫാസ്റ്റ് ട്രാക്ക് കോടതിയുടെ വിധി അന്തിമമായിരിക്കും.
തൊഴില്‍ തര്‍ക്കങ്ങള്‍ തീര്‍ക്കാന്‍ ഏകദിന കോടതികളും
ചെറിയ തൊഴില്‍ തര്‍ക്കങ്ങള്‍ പരിഹരിക്കാന്‍ യുഎഇയിലെ ചില എമിറേറ്റുകള്‍ നേരത്തേ ഏകദിന കോടതികള്‍ സ്ഥാപിച്ചിരുന്നു. പരാതി നല്‍കിയ അന്നു തന്നെ അതില്‍ വിധി നല്‍കാനാവുമെന്നതാണ് ഈ കോടതിയുടെ സവിശേഷത. ഫാസ്റ്റ് ട്രാക്ക് കോടതിയില്‍ നിന്ന് വ്യത്യസ്തമായി 20,000 ദിര്‍ഹം വരെയുള്ള തൊഴില്‍ തര്‍ക്കങ്ങള്‍ മാത്രമേ ഏകദിന കോടതികള്‍ പരിഗണിക്കൂ. 2017 മുതല്‍ അബൂദാബി, ദുബായ്, റാസല്‍ഖൈമ തുടങ്ങിയ സ്ഥലങ്ങളില്‍ ഇത്തരം കോടതികള്‍ നിലവിലുണ്ട്. തൊഴില്‍ തര്‍ക്കങ്ങളില്‍ തീരുമാനം വൈകിയാല്‍ ജീവനക്കാരന് ദൈനംദിന ചെലവുകള്‍ പോലും കണ്ടെത്താല്‍ ബുദ്ധിമുട്ടാവും എന്ന വിലയിരുത്തലിന്റെ അടിസ്ഥാനത്തിലാണ് ഏകദിന കോടതികള്‍ നിലവില്‍ വന്നത്. ഇതേത്തുടര്‍ന്ന് മറ്റ് കോടതികളിലെത്തുന്ന തൊഴില്‍ കേസുകളുടെ എണ്ണത്തില്‍ 40 ശതമാനത്തിലേറെ കുറവുണ്ടായിട്ടുണ്ടെന്നാണ് കണക്കുകള്‍.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : abu dhabis fast-track court rulings within 15 days of a case being registered
Malayalam News from malayalam.samayam.com, TIL Network
