മസ്‌ക്കറ്റ്: ഒമാനില്‍ കൊവിഡ് വ്യാപനം രൂക്ഷമായിരിക്കെ ഗുരുതര സ്വഭാവമുള്ള രോഗികളുടെ എണ്ണം കൂടിവരുന്നതായി റിപ്പോര്‍ട്ട്. ഇതേത്തുടര്‍ന്ന് സര്‍ക്കാര്‍, സ്വകാര്യ മേഖലകളിലെ ആശുപത്രികളെല്ലാം താങ്ങാനാവുന്നതിലേറെ രോഗികളെയാണ് പ്രവേശിപ്പിച്ചിരിക്കുന്നതെന്നും ആരോഗ്യ മന്ത്രി ഡോ. അഹ്മദ് ബിന്‍ മുഹമ്മദ് അല്‍ സഈദി പറഞ്ഞു. കൊവിഡ് മഹാമാരി പൊട്ടിപ്പുറപ്പെട്ടതിന് ശേഷം രാജ്യത്തിന്റെ ആരോഗ്യ മേഖല ഇത്ര വലിയ പ്രതിസന്ധിയെ നേരിടേണ്ടിവരുന്നത് ഇതാദ്യമാണെന്നും അദ്ദേഹം അറിയിച്ചു. തുടക്കത്തില്‍ 148 ഐസിയു ബെഡ്ഡുകളാണ് രാജ്യത്തെ ആശുപത്രികളില്‍ ഉണ്ടായിരുന്നത്. എന്നാല്‍ ഇന്നത് 460 ലേറെയായി വര്‍ധിച്ചു. രണ്ടായിരത്തിലേറെ ഡോക്ടര്‍മാര്‍ കഴിഞ്ഞ ഏതാനും മാസങ്ങളായി വിശ്രമമില്ലാതെ ജോലി ചെയ്തുവരികയാണെന്നും മന്ത്രി പറഞ്ഞു. രാജ്യത്ത് ആവശ്യത്തിന് വെന്റിലേറ്ററുകള്‍ ഇല്ലെന്ന വാര്‍ത്തകള്‍ ശരിയല്ലെന്നും 1100ലേറെ വെന്റിലേറ്ററുകള്‍ നിലവില്‍ ആശുപത്രികളിലുണ്ടെന്നും അദ്ദേഹം കൂട്ടിച്ചേര്‍ത്തു.

​കൊവിഡ് മരണങ്ങളും വര്‍ധിച്ചു

ഗുരുതര കേസുകളുടെ എണ്ണം വര്‍ധിച്ചതനുസരിച്ച് രാജ്യത്തെ കൊവിഡ് മരണങ്ങളും വര്‍ധിച്ചതായി മന്ത്രി അറിയിച്ചു. നിലവില്‍ ദിനംപ്രതി 30ലേറെ മരണങ്ങളാണ് റിപ്പോര്‍ട്ട് ചെയ്യപ്പെട്ടുകൊണ്ടിരിക്കുന്നത്. മരണപ്പെട്ടവരില്‍ കൂടുതല്‍ പേരും 60 കഴിഞ്ഞവരും വാക്‌സിന്‍ എടുക്കാത്തവരുമാണ്. പ്രായമായവര്‍ക്ക് പല തവണ വാക്‌സിന്‍ എടുക്കാന്‍ അവസരം നല്‍കിയെങ്കിലും അതിന് തയ്യാറാവാത്തവരാണ് കൊവിഡ് ബാധിതരായി മരണത്തിന് കീഴടങ്ങയതെന്നും മന്ത്രി പറഞ്ഞു. വാക്‌സിന്‍ എടുത്തവരില്‍ നാമമാത്രമായ ആളുകള്‍ക്കു മാത്രമാണ് തീവ്രമായ രോഗലക്ഷണങ്ങള്‍ റിപ്പോര്‍ട്ട് ചെയ്യപ്പെടുന്നത്. ഇവരില്‍ മരണപ്പെടുന്നവരുടെ ശതമാനവും വളരെ കുറവാണ്.

​സമ്പൂര്‍ണ ലോക്ക് ഡൗണ്‍ അനിവാര്യ ഘട്ടത്തില്‍ മാത്രം

കൊവിഡ് വ്യാപനം രൂക്ഷമാണെങ്കിലും രാജ്യത്ത് സമ്പൂര്‍ണ ലോക്ക് ഡൗണ്‍ നടപ്പിലാക്കുന്നതിനെ കുറിച്ച് നിലവില്‍ ആലോചിച്ചിട്ടില്ലെന്നും ആരോഗ്യ മന്ത്രി വാര്‍ത്താ സമ്മേളനത്തില്‍ അറിയിച്ചു. ജനങ്ങളുടെ ആരോഗ്യ സുരക്ഷയ്ക്ക് അതല്ലാതെ മറ്റ് വഴികളില്ലെന്ന് വരുമ്പോള്‍ മാത്രമാണ് അറ്റകൈ പ്രയോഗം എന്ന രീതിയില്‍ സമ്പൂര്‍ണ ലോക്ക് ഡൗണിലേക്ക് നീങ്ങുകയെന്നും അദ്ദേഹം അറിയിച്ചു. അതേപോലെ വിമാനത്താവളങ്ങള്‍ പൂര്‍ണമായി അടച്ചിടാനും ഇപ്പോള്‍ പദ്ധതിയില്ല. കൊവിഡ് വ്യാപനത്തിന്റെ തോത് വിലയിരുത്തിയ ശേഷം ഇക്കാര്യത്തില്‍ തീരുമാനമെടുക്കും. കൊവിഡ് വ്യാപനത്തിന്റെ പശ്ചാത്തലത്തില്‍ ഒമാന്‍ രാത്രികാല ലോക്ക്ഡൗണ്‍ കഴിഞ്ഞയാഴ്ച പുനസ്ഥാപിച്ചിരുന്നു.

​രണ്ട് വാക്‌സിനുകള്‍ക്കു കൂടി അനുമതി

അതിനിടെ, ഒമാനില്‍ അടിയന്തര ഉപയോഗത്തിനായി രണ്ട് വാക്‌സിനുകള്‍ക്ക് കൂടി ആരോഗ്യ മന്ത്രാലയം അനുമതി നല്‍കി. സ്പുട്‌നിക്, സിനോവാക് വാക്‌സിനുകള്‍ക്കാണ് പുതുതായി അനുമതി നല്‍കിയത്. ഫൈസര്‍ ബയോണ്‍ടെക്, ഓക്‌സ്‌ഫോഡ് ആസ്ട്രാസെനക്ക വാക്‌സിനുകള്‍ക്ക് പുറമെയാണത്. 32 ലക്ഷം ഡോസ് കോവിഡ് വാക്‌സിന്‍ കൂടി ലഭിക്കുമെന്നും ആരോഗ്യ മന്ത്രി പറഞ്ഞു. ആഗസ്റ്റ് അവസാനത്തിനുള്ളില്‍ മുന്‍ഗണനാ പട്ടികയിലുള്ള എല്ലാവര്‍ക്കും ഒരു ഡോസ് വാക്‌സിനെങ്കിലും നല്‍കുകയാണ് ലക്ഷ്യം. ഇതുവരെ 15.15 ലക്ഷം ഡോസ് വാക്‌സിനാണ് ഒമാനില്‍ നല്‍കിയത്. 45 വയസ്സിനു മുകളിലുള്ളവര്‍ക്കുള്ള വാക്‌സിനേഷന്‍ കഴിഞ്ഞ ആഴ്ച ആരംഭിച്ചിരുന്നു. ഗര്‍ഭിണികള്‍ക്കും വാക്‌സിന്‍ ലഭ്യമാക്കിത്തുടങ്ങിയതായും മന്ത്രി വ്യക്തമാക്കി.