ഐടി മന്ത്രിക്ക് തിരിച്ചടിയായത് റഹ്മാൻ്റെ ‘മാ തു ജേ സലാം’; അക്കൗണ്ട് ലോക്കായത് ഇങ്ങനെ, വിശദീകരിച്ച് ട്വിറ്റർ

ന്യൂഡൽഹി: കേന്ദ്ര ഐടി മന്ത്രി രവിശങ്കര്‍ പ്രസാദിൻ്റെ ട്വിറ്റര്‍ അക്കൗണ്ട് ഒരു മണിക്കൂറോളം ലോക്ക് ചെയ്തതിന് കാരണം സോണി മ്യൂസിക്കിന് പവര്‍പ്പവകാശമുള്ള സംഗീത സംവിധായകൻ എ ആര്‍ റഹ്‌മാന്റെ ‘മാ തു ജേ സലാം’ എന്ന ഗാനം ഉപയോഗിച്ചതിനെ തുടർന്നെന്ന് ട്വിറ്റർ വ്യക്തമാക്കിയതായി ദേശീയ മാധ്യമങ്ങൾ റിപ്പോർട്ട് ചെയ്തു.



‘യുഎസ് നിയമം ലംഘിച്ചു’; കേന്ദ്രമന്ത്രി രവിശങ്കർ പ്രസാദിനെ വിലക്കി ട്വിറ്റർ; ‘വിചിത്രനടപടി’

രവിശങ്കര്‍ പ്രസാദ് ഈ പാട്ട് ഉപയോഗിച്ചതോടെ പകർപ്പവകാശ നയത്തിന്റെ ലംഘനമാണെന്ന് സംഭവിച്ചതെന്ന് ട്വിറ്റർ വ്യക്തമാക്കി. സോണി മ്യൂസിക്കിന് വേണ്ടി ഇൻ്റർനാഷണൽ ഫെഡറേഷൻ ഓഫ് ദ് ഫോണോഗ്രഫിക് ഇൻഡസ്ട്രി 2017 ഡിസംബർ 16ന് രവിശങ്കർ പ്രസാദ് പങ്കുവച്ച ഒരു ട്വീറ്റ് തടഞ്ഞു വെച്ചിരുന്നതായും ഇതിന്മേലുള്ള നടപടിയാണ് കഴിഞ്ഞ ദിവസം ഉണ്ടായതെന്നും ലുമെൻ വ്യക്തമാക്കി. ഇന്ത്യൻ സൈന്യത്തിന് ട്രിബ്യൂട്ട് ചെയ്ത് തയ്യാറാക്കിയ വീഡിയോയിൽ റഹ്മാന്റെ ഗാനം പശ്ചാത്തലത്തിൽ ഉപയോഗിച്ചതാണ് തിരിച്ചടിയായത്. 1971ലെ യുദ്ധ വിജയത്തിന്റെ വാർഷികത്തിലാണ് ഇത് പോസ്റ്റ് ചെയ്തത്.

സമാനമായ സംഭവങ്ങൾ ഇനിയും ഉണ്ടായാൽ തുടർന്നും അക്കൗണ്ട് പൂട്ടുമെന്ന മുന്നറിയിപ്പ് ട്വിറ്റർ നൽകിയതായും ദേശീയ മാധ്യമങ്ങൾ റിപ്പോർട്ട് ചെയ്യുന്നുണ്ട്. കേന്ദ്ര സർക്കാരും ട്വിറ്ററും തമ്മിലുള്ള ഏറ്റുമുട്ടൽ തുടരുന്നതിനിടെയാണ് കേന്ദ്ര ഐടി മന്ത്രിയുടെ അക്കൗണ്ട് പൂട്ടിയത്.

കേന്ദ്രമന്ത്രിയുടെ അക്കൗണ്ടിന് ബ്ലോക്ക് ചെയ്തതിന് പുറമെ; ശശി തരൂരിന്റെ പോസ്റ്റിനെതിരേയും ട്വിറ്റ് നടപടി

ട്വിറ്റര്‍ വാദിക്കുന്നതു പോലെ അവര്‍ക്ക് അഭിപ്രായ സ്വാതന്ത്ര്യമല്ല പ്രധാനമെന്നും അവരുടെ അജണ്ടകള്‍ക്കാണ് ട്വിറ്റര്‍ പ്രാധാന്യം കൊടുക്കുന്നതെന്നും രവിശങ്കര്‍ പ്രസാദ് ആരോപിച്ചു. കേന്ദ്രത്തിൻ്റെ പുതിയ ഐടി നിയമങ്ങള്‍ ട്വിറ്റര്‍ അനുസരിക്കാത്തിനു കാരണം ഇതാണെന്നും മന്ത്രി ആരോപിച്ചു. ട്വിറ്റര്‍ വരയ്ക്കുന്ന വര ഭേദിച്ചാൽ നിങ്ങളെ പ്ലാറ്റ്ഫോമിൽ നിന്നു നീക്കം ചെയ്യുമെന്നാണ് ട്വിറ്റര്‍ വ്യക്തമാക്കുന്നതെന്നും മന്ത്രി ചൂണ്ടിക്കാട്ടി. കേന്ദ്രം കൊണ്ടുവന്ന പുതിയ ഐടി നിയമങ്ങള്‍ അഭിപ്രായ സ്വാതന്ത്ര്യത്തിനെതിരാണെന്നാണ് ട്വിറ്റര്‍ ആരോപിക്കുന്നത്. ഈ നിയമങ്ങള്‍ അനുസരിക്കാൻ തയ്യാറല്ലെന്ന് യുഎസ് കമ്പനി കഴിഞ്ഞ ദിവസം വ്യക്തമാക്കുകയും ചെയ്തിരുന്നു.