5 ദിവസത്തിനിടെ വിതരണം ചെയ്തത് 3.3 കോടിയില്‍ അധികം ഡോസ് കൊവിഡ് വാക്സിൻ

ന്യൂഡല്‍ഹി: രാജ്യത്ത് കൊവിഡ് വാക്സിനേഷൻ പുതിയ ഘട്ടത്തിലേക്ക് കടന്നതിന് പിന്നാലെ വാക്സിൻ വിതരണത്തിൽ റെക്കോഡ് വർധനയെന്ന് റിപ്പോർട്ട്. പ്രതിവാര കൊവിഡ് വാക്സിൻ വിതരണത്തിലാണ് റെക്കോഡ് വർധനയുണ്ടായിരിക്കുന്നത്.



ജൂണ്‍ 21നു മാത്രം 80 ലക്ഷത്തില്‍ അധികം പേര്‍ക്കാണ് കൊവിഡ് വാക്‌സിന്‍ നല്‍കിയത്. സ്വിറ്റ്‌സര്‍ലന്‍ഡിലെ ആകെ ജനസംഖ്യയോളം ആളുകള്‍ക്കാണ് ഇന്ത്യ ഒരുദിനം മാത്രം വാക്‌സിന്‍ വിതരണം ചെയ്തതെന്ന് ഇംഗ്ലീഷ് വാർത്താ ചാനലായ ഹിന്ദുസ്ഥാൻ ടൈംസാണ് റിപ്പോർട്ട് ചെയ്തത്.

Also Read : വീണ്ടും 50,000 താഴെ കൊവിഡ് കേസുകള്‍; 5.95 ലക്ഷം സജീവ കേസുകള്‍



ജൂണ്‍ 21നും 26നും ഇടയില്‍ രാജ്യത്ത് വിതരണം ചെയ്തത് 3.3 കോടിയില്‍ അധികം ഡോസ് വാക്‌സിനാണെന്നും കേന്ദ്ര ആരോഗ്യ മന്ത്രാലയത്തെ ഉദ്ധരിച്ചുള്ള കണക്കുകള്‍ വ്യക്തമാക്കുന്നു. ഏപ്രില്‍ മൂന്നിനും ഒന്‍പതിനും ഇടയില്‍ 2.47 കോടി ഡോസ് വാക്സിൻ വിതരണം ചെയ്തതായിരുന്നു ഇതിനു മുന്‍പുള്ള റെക്കോഡ് വാക്‌സിനേഷന്‍.

അതേസമയം, മൂന്നുകോടിയില്‍ അധികം ഡോസുകള്‍ വിതരണം ചെയ്ത ആദ്യ സംസ്ഥാനമായി മഹാരാഷ്ട്ര മാറി. വെള്ളിയാഴ്ചയാണ് മഹാരാഷ്ട്രയിലെ കൊവിഡ് വാക്‌സിന്‍ ഡോസ് വിതരണം മൂന്നുകോടി കടന്നത്. ഉത്തര്‍ പ്രദേശ്, കര്‍ണാടക, ഗുജറാത്ത്, പശ്ചിമ ബംഗാള്‍ എന്നീ സംസ്ഥാനങ്ങള്‍ രണ്ടുകോടിയലധികം വാക്സിൻ ഡോസ് ഇതിനോടകം വിതരണം ചെയ്തിട്ടുണ്ട്.

Also Read : അൽപവസ്ത്രം ധരിച്ച് വിമാനത്താവളത്തിലെത്തി; യൂട്യൂബറെ തടഞ്ഞ് ജീവനക്കാർ

അതേസമയം രാജ്യത്ത് കഴിഞ്ഞ 24 മണിക്കൂറിനിടെ 48,698 കൊവിഡ് കേസുകളാണ് സ്ഥിരീകരിച്ചത്. ഇതോടെ ആകെ കൊവിഡ് ബാധിതരുടെ എണ്ണം 3,01,83,143 ആയി ഉയർന്നു. 5,95,565 ആക്ടീവ് കൊവിഡ് കേസുകളാണ് നിലവിൽ രാജ്യത്തുള്ളത്. 2,91,93,085 പേർക്ക് രോഗമുക്തി ലഭിച്ചതായും ആരോഗ്യ മന്ത്രാലയം വ്യക്തമാക്കി. കഴിഞ്ഞദിവസം 64,818 പേരാണ് രോഗം ഭേദമായി ആശുപത്രി വിട്ടത്.