ഇത് ഒറിജിനലാണോ, ഡ്യൂപ്പാണോ? സംശയിച്ച് സോഷ്യൽ മീഡിയ, വൈറലായി ഷാറൂഖ് ഖാന്റെ ഡ്യൂപ്പ്

ജന്മനാ ലഭിച്ച ഷാറൂഖ് ഖാനുമായുള്ള മുഖ സാദൃശ്യം ആഘോഷമാക്കുകയാണ് ഇബ്രാഹിം ഖാദ്രി. ഷാറൂഖ് ഖാന്റെ റെയ്‌സ് സിനിമ കണ്ട ശേഷമാണ് കൂട്ടുകാർക്ക് ഇബ്രാഹിമിന് എസ്ആർകെയുടെ രൂപ സാദൃശ്യമുണ്ടെന്ന് കൂട്ടുകാർക്ക് തോന്നി തുടങ്ങിയത്. പിന്നെ ഒന്നും നോക്കിയില്ല. അടിമുടി എസ്ആർകെ സ്‌റ്റൈലിലായി ഇബ്രാഹിം. ആരു കണ്ടാലും ഒറ്റ നോട്ടത്തിൽ ഷാറൂഖ് ഖാനാണെന്നെ പറയൂ.

ഷാറൂഖ് ഖാന്റെ ലുക്ക് ഇബ്രാഹിം ആഘോഷിക്കുകയാണ്. ദിവസവും ഇബ്രാഹിമിനെ കാണാൻ നിരവധി ആളുകളാണ് വരുന്നത്. ഇതോടെ ഷാറൂഖ് ഖാന്റെ രീതികളും സ്‌റ്റൈലുമെല്ലാം ഇബ്രാഹിം അതേപടി പിന്തുടരാൻ തുടങ്ങി. ഷാറൂഖിന്റെ സിനിമകളും അഭിമുഖങ്ങളും കണ്ട് രീതികൾ മനസിലാക്കി. കൂടാതെ ഓരോ സിനിമയിലെ ലുക്കും ഇബ്രാഹിം പിന്തുടരുന്നു. ഈ ലുക്ക് ഒരു അനുഗ്രഹമാണെന്നും ഇബ്രാഹിമിന് തോന്നാറുണ്ട്. കാരണം നിരവധി പേരാണ് വിവാഹത്തിനും മറ്റ് വിശേഷങ്ങൾക്കും ഇബ്രാഹിമിനെ വിശിഷ്ട അതിഥിയായി ക്ഷണിക്കുന്നത്. പരിപാടികൾക്ക് പോയി ആളുകൾക്കൊപ്പം ദിൽസെ സിനിമയിലെ ചൈയ്യ ചൈയ്യ പാട്ടിന് ഡാൻസ് കളിക്കുന്നത് തനിക്ക് വളരെ ഇഷ്ടമാണെന്നും ഇബ്രാഹിം പറയുന്നു.

പക്ഷെ പലപ്പോഴും ഈ ലുക്ക് ഇബ്രാഹിമിന് പണിയും കൊടുത്തിട്ടുണ്ട്. എസ്ആർകെ ആണെന്ന് കരുതി ആളുകൾ ആവേശത്തോടെ കെട്ടി പിടിച്ച് ഇബ്രാഹിമിന്റെ ഷർട്ട് പോലും കീറി പോയിട്ടുണ്ട്. എസ്ർകെയുടെ രൂപ സാദൃശ്യം കൊണ്ടാണ് ഇപ്പോൾ പ്രശസ്തനായത് എങ്കിലും സ്വന്തം പേരിൽ പ്രശസ്തനാകണമെന്നാണ് ഇയാളുടെ ആഗ്രഹം.

എസ്ആർകെയുടെ രൂപ സാദൃശ്യമുണ്ടെങ്കിലും ഒരിക്കൽ പോലും ഇബ്രാഹിമിന് അദ്ദേഹത്തെ നേരിട്ട് കാണാൻ സാധിച്ചിട്ടില്ല. ജീവിതത്തിൽ ഒരിക്കൽ എങ്കിലും എസ്ആർകെയെ നേരിട്ട് കാണമെന്നാണ് ഇബ്രാഹിമിന്റെ ആഗ്രഹം.