തൃക്കാക്കരയിൽ ആം ആദ്മി സ്ഥാനാർഥി ഇല്ലാത്തത് അവരുടെ ആഭ്യന്തര കാര്യമെന്നാണ് യുഡിഎഫ് സ്ഥാനാർഥി ഉമ തോമസ് പറയുന്നത്. എന്നാൽ ആം ആദ്മി സഖ്യം മത്സരിക്കാത്തത് വോട്ടുകൾ ഭിന്നിച്ച് പോകാതിരിക്കാൻ ഗുണം ചെയ്യുമെന്ന പ്രതീക്ഷയിലാണ് പ്രതിപക്ഷ നേതാവ് വിഡി സതീശൻ. ആം ആദ്മിയുടെ നിലപാടിനെ സ്വാഗതം ചെയ്തുകൊണ്ടാണ് പ്രതിപക്ഷനേതാവിന്‍റെ വാക്കുകൾ. ശ്രീനിജൻ എംഎഎൽയെ ആയുധമാക്കി കിറ്റക്സ് എന്ന സ്ഥാപനത്തെ ഒഴിവാക്കാനുള്ള നീക്കത്തിന് യുഡിഎഫ് കൂട്ടുനിൽക്കില്ലെന്നും അദ്ദേഹം വ്യക്തമാക്കി.
Also Read : ശവക്കല്ലറയിൽ ചെരുപ്പിട്ട് കയറിയവർ മാപ്പ് പറയണം; സതീശന്‍റെ ലക്ഷ്യം മുഖ്യമന്ത്രി സ്ഥാനാർഥിത്വം: എം സ്വരാജ്
അതേസമയം ആം ആദ്മിയുടെയും ട്വന്‍റി 20യുടെയും നിലപാട് തനിക്ക് അനുകൂലമാകുമെന്നാണ് എൽഡിഎഫ് സ്ഥാനാർഥി ഡോ. ജോ ജോസഫ് പറയുന്നത്. കഴിഞ്ഞതവണ ട്വന്‍റി 20യ്ക്ക് വോട്ട് ചെയ്തവർ ഇത്തവണ തനിക്ക് വോട്ട് ചെയ്യും. ട്വന്‍റി 20യും ആം ആദ്മിയും ഉയർത്തിയ രാഷ്ട്രീയം ഇപ്പോൾ ആരാണ് ഉയർത്തുന്നതെന്ന് നോക്കിയാൽ മതി. വിജയത്തെക്കുറിച്ച് വലിയ ആത്മവിശ്വാസം ഉണ്ടെന്നും ജോ ജോസഫ് പറയുന്നു.
സമാനമായ പ്രതീക്ഷ പങ്കുവെച്ച് ബിജെപി സ്ഥാനാർഥിയായ എ എൻ രാധാകൃഷ്ണനും രംഗത്തെത്തിയിട്ടുണ്ട്. ട്വന്‍റി 20യും ആപ്പും മത്സരിക്കാൻ ഇല്ലാത്തത് ഗുണം ചെയ്യും. ഭരണവിരുദ്ധ വികാരം നിലനിൽക്കുന്നുണ്ട്. ത്രികോണ മത്സരത്തിൽ ഇത് ഗുണം ചെയ്യുമെന്നുമാണ് എ എന്‍ രാധാകൃഷ്ണന്‍റെ പ്രതികരണം.
Also Read : പി സി ജോ‍‍ർജ് ഇറങ്ങിയാൽ ബിജെപിക്ക് ഗുണം; തൃക്കാക്കരയിലേക്ക് ക്ഷണിക്കുമെന്ന് എ എൻ രാധാകൃഷ്ണൻ
ഇത്തവണ ആം ആദ്മിയും ട്വന്‍റി 20യും ഒരുമിച്ച് മത്സരിക്കുമെന്നാണ് നേതാക്കൾ പറഞ്ഞിരുന്നതെങ്കിലും തെരഞ്ഞെടുപ്പ് പ്രഖ്യാപനത്തിന് പിന്നാലെ നിലപാട് മാറ്റുകയായിരുന്നു. ഇതോടെ ഈ വോട്ടുകൾ എങ്ങോട്ട് മറിയുമെന്ന ആകാംക്ഷയിലാണ് രാഷ്ട്രീയ കേരളം. 2021ലെ നിയമസഭ തെരഞ്ഞെടുപ്പിൽ ട്വന്‍റെ 20 സ്ഥാനാർഥി ഡോ ടെറി തോമസിന് 10.18 ശതമാനം (13,897) വോട്ടുകൾ ലഭിച്ചിരുന്നു.
കല്ലറയിൽ ചെരുപ്പിട്ടു കയറി; ലക്ഷ്യം മുഖ്യമന്ത്രിപദം; വി ഡി സതീശനെതിരെ എം സ്വരാജ്
Web Title : thrikkakara by election 2022 candidates on aap twenty 20 votes
Malayalam News from Samayam Malayalam, TIL Network
