സോഷ്യൽ മീഡിയയിൽ വൈറലായ ഒരു വീഡിയോ കണ്ട് ഈ നൂറ്റാണ്ടിലും ദിനോസർ കുഞ്ഞുങ്ങളുണ്ടോയെന്നാണ് പലർക്കും ഇപ്പോൾ സംശയം. കടൽ തീരത്ത് ഓടി കളിക്കുന്ന ദിനോസർ കുഞ്ഞുങ്ങളുടെ വീഡിയോയാണ് സോഷ്യൽ മീഡിയയിൽ പ്രചരിക്കുന്നത്.
നീളമുള്ള കഴുത്തും തടിച്ച ശരീരവുമുള്ള ജീവിയെയാണ്‌ വീഡിയോയിൽ കാണാൻ സാധിക്കുന്നത്. സൗറോപോഡാ ഇനത്തിൽപ്പെട്ട ദിനോസറിന്റെ കുഞ്ഞുങ്ങളായാണ് ഇതിനെ കണ്ടാൽ തോന്നുന്നത്.
ട്വിറ്ററിലൂടെയാണ് ഈ വീഡിയോ ആദ്യം പ്രചരിച്ചത്. 14 സെക്കൻഡ് ദൈർഘ്യമുള്ള ഈ വീഡിയോ നിമിഷ നേരം കൊണ്ട് തന്നെ വൈറലായി. പലരും പേടിച്ചത് ദിനോസറുകൾ വീണ്ടും ഉണ്ടായെന്നാണ്. ഇത് സംബന്ധിച്ച നിരവധി കമന്റുകളും വീഡിയോയ്ക്ക് താഴെ വന്നിരുന്നു. വളരെ ചെറിയ തലയും നീളമുള്ള കഴുത്തുമാണ് ഈ ദിനോസറുകൾക്ക് ഉള്ളത്. ദിനോസറുകളുടെ ഇനത്തിൽ കരയിലുള്ളതിൽ ഏറ്റവും വലുത്തായിരുന്നു സൗറോപോഡാ. 62 ടൺ വരെയാണ് ഇവയുടെ ഭാരം.
‘യാഥാർത്ഥ്യം മനസിലാക്കാൻ കുറച്ച് നിമിഷമെടുത്തു’ എന്നാണ് വീഡിയോയ്ക്ക് നൽകിയിരിക്കുന്ന അടിക്കുറിപ്പ്. അതേ, ഒറ്റനോട്ടത്തിൽ ദിനോസറുകൾ ആണെന്നു തോന്നുമെങ്കിലും സൂക്ഷമതയോടെ നോക്കിയാൽ കാര്യം മനസിലാക്കാം. ഇതൊരു റിവേഴ്സ് വീഡിയോയാണ്. വീഡിയോയുടെ അവസാന ഭാഗത്ത് എത്തുമ്പോൾ ഒരു ജീവി ഓടുന്നത് റിവേഴ്സ് ചെയ്തിരിക്കുന്നതാണെന്ന് മനസിലാക്കാൻ സാധിക്കും.
കോട്ടിസ് എന്ന് വിളിക്കുന്ന സസ്തനിയാണ് വീഡിയോയിൽ ഉള്ളതെന്നാണ് പലരും കമന്റ് ചെയ്തിരിക്കുന്നത്. മധ്യ അമേരിക്കയിലും ദക്ഷിണാഫ്രിക്കയിലും മെക്‌സിക്കോയിലുമാണ് സാധരണയായി ഈ ജീവിയെ കണ്ടുവരുന്നത്. എന്തായാലും സോഷ്യൽ മീഡിയ ആദ്യം ഒന്ന് പേടിച്ചെങ്കിലും കാര്യം പിടികിട്ടയപ്പോൾ ചിരിയാണ് വന്നത്.
Web Title : baby dinosours running on a beach goes viral netizens confused
Malayalam News from Samayam Malayalam, TIL Network
