ഒരു നായ്ക്കുട്ടി കാർ ഓടിച്ചാൽ എങ്ങനെ ഉണ്ടായിരിക്കും? ഓസ്‌ട്രേലിയലിലെ ലെക്‌സി എന്ന നായ്ക്കുട്ടിയാണ് അടുത്തിടെ സോഷ്യൽ മീഡിയയുടെ മനം കവർന്ന താരം. ജാക്ക് റസൽ ഇനത്തിൽപ്പെട്ട നായ്ക്കുട്ടിയാണിത്. കർഷകനായ ക്യാമറോൺ ആണ് ലെക്‌സിയെ വാഹനം ഓടിക്കാൻ പഠിപ്പിക്കുന്നത്. കൃഷിയിടത്തിലെ ആടുകളെ മേയിക്കാനായി ഉപയോഗിക്കുന്ന വാഹനമാണ് ലെക്‌സി വളരെ സിമ്പിളായി ഓടിക്കുന്നത്.
വിക്‌ടോറിയയിലെ ഹാമിൾട്ടൺ ഗ്രാമത്തിലെ കർഷകനാണ് ക്യാമറോൺ. കൃഷി സ്ഥലത്തെ ആടുകളെ മേയ്ക്കുന്ന പിക്ക് അപ്പ് പോലെ ഉള്ള വാഹനത്തിലാണ് ലെക്‌സിയുടെ കറക്കം. ഫസ്റ്റ് ഗിയർ ഇട്ട ശേഷം പതുക്കെ സ്റ്റിയറിങ് അനക്കുകയാണ് നായ്ക്കുട്ടി ചെയ്യുന്നത്. നായ്ക്കുട്ടി ആയത് കൊണ്ട് ലെക്‌സിക്ക് ഇത് ചെയ്യാൻ കഴിയില്ല എന്ന ചിന്ത മാറ്റാനാണ് അവളെ ഡ്രൈവിംഗ് പഠിപ്പിച്ചതെന്നാണ് ഉടമസ്ഥൻ ക്യാമറോൺ പറയുന്നത്.
PC: Abc Australia
ആടുകളെ മേയിക്കുന്നതാണ് തന്റെ ജോലിയെന്നാണ് ലെക്‌സി കരുതിയിരിക്കുന്നത്. പക്ഷെ ഉയരമില്ലാത്തതാണ് ആളുടെ പ്രധാന പ്രശ്‌നം. പണ്ട് കൃഷിയിടത്ത് വച്ചുണ്ടായ ഒരു അപകടത്തിൽ ലെക്‌സിക്ക് സാരമായ പരിക്ക് പറ്റിയിരുന്നു. അങ്ങനെയാണ് വാഹനം ഓടിക്കാൻ ലെക്‌സിയെ പഠിപ്പിക്കാൻ ക്യാമറോൺ തീരുമാനിച്ചത്. സുരക്ഷതമായി വാഹനത്തിനുള്ളിൽ ഇരുന്ന അവൾക്ക് ആടുകളെ നിയന്ത്രിക്കാൻ കഴിയും.
ലെക്‌സി ഇപ്പോൾ ഫാമിലെ പല ജോലികളിലും സഹായിക്കാറുണ്ട്. ക്യാമറോൺ ആടുകളെ പുല്ല് തീറ്റുമ്പോൾ കാറിന്റെ മുഴുവൻ കൺട്രോളും ലെക്‌സിക്കാണ്. ഇതൊരു ടീം വർക്കാണെന്ന് തന്നെ പറയണം.
ഇത് ആദ്യമായിട്ടല്ല നായ്ക്കുട്ടി കാർ ഓടിക്കുന്ന വീഡിയോ വൈറലാകുന്നത്. 2012ൽ പോർട്ടർ, മോൺടി എന്ന് പേരുള്ള നായ്ക്കുട്ടികൾ കാർ ഓടിച്ച് വൈറലായിട്ടുണ്ട്. ഡ്രൈവിംഗ് ഡോക്‌സ് എന്നാണ് ഇവരെ വിളിച്ചിരുന്നത്.
തെരുവ് നായ്ക്കളെ സംരക്ഷിക്കാൻ നടത്തിയ ക്യാമ്പെയ്‌ന്റെ ഭാഗമായാണ് ന്യൂസിലാൻഡിലെ ഓക്ക്‌ലാൻഡിലുള്ള സൊസൈറ്റി ഫോർ ദി പ്രിവൻഷൻ ഓഫ് ക്രുവൽറ്റി ടു ആനിമൽസ് തെരുവ് നായ്ക്കളെ വാഹനം ഓടിക്കാൻ പരിശീലിപ്പിച്ചത്. തെരുവ് നായ്ക്കളും മറ്റ് നായ്ക്കളെ പോലെ ബുദ്ധിയും അനുസരണയും ഉള്ളവരാണെന്ന് തെളിയിക്കുകയായിരുന്നു ഇതിന്റെ ലക്ഷ്യം.
Web Title : man teaches dog how to drive on farm
Malayalam News from Samayam Malayalam, TIL Network
