രണ്ടാം ഡോസ്: ഹജ്ജ് തീര്‍ഥാടകര്‍ക്ക് പ്രായപരിധിയില്ല
വാക്സിന് ക്ഷാമം കാരണം സൗദി അറേബ്യ രണ്ടാം ഡോസ് വാക്സിന് വിതരണം ഇടക്കാലത്ത് നിര്‍ത്തിവച്ചിരുന്നു. പിന്നീട് ആദ്യം 60 വയസ്സുള്ളവര്‍ക്കും കഴിഞ്ഞ ദിവസം മുതല്‍ 50ന് മുകളിലുള്ളവര്‍ക്കും വാക്സിന് വിതരണം പുനരാരംഭിക്കുകയുണ്ടായി. അതേസമയം, 50 വയസ്സിന് താഴെ പ്രായമുള്ളവര്‍ക്ക് നിലവില്‍ രണ്ടാം ഡോസ് നല്‍കുന്നില്ല. ഈ പശ്ചാത്തലത്തിലാണ് ഹജ്ജ് തീര്‍ഥാടകരില്‍ രണ്ടാം ഡോസ് എടുക്കാത്തവര്‍ക്ക് അത് എത്രയും വേഗം ലഭ്യമാക്കുന്നതിനുള്ള നടപടികള്‍ ഹജ്ജ് ഉംറ കാര്യ മന്ത്രാലയം കൈക്കൊള്ളുന്നത്. കൊവിഡ് പ്രതിരോധത്തിന്റെ ഭാഗമായി രണ്ട് ഡോസ് വാക്സിന് സ്വീകരിച്ചവര്‍ക്കു മാത്രമേ ഇത്തവണ ഹജ്ജിന് അനുമതി നല്‍കൂ എന്ന് ഹജ്ജ് ഉംറ മന്ത്രാലയവും ആരോഗ്യ മന്ത്രാലയവും നേരത്തേ വ്യക്തമാക്കിയിരുന്നു.
രജിസ്‌ട്രേഷന്‍ നടപടികള്‍ ജൂലൈ 9ന് പൂര്‍ത്തിയാവും
ഹജ്ജ് രജിസ്‌ട്രേഷനുമായി ബന്ധപ്പെട്ട നടപടിക്രമങ്ങള്‍ ജൂലൈ ഒന്‍പതോടെ പൂര്‍ത്തിയാവുമെന്നും ഡോ. അബ്ദുല്‍ ഫത്താഹ് മശാത്ത് അറിയിച്ചു. ഇത്തവണ ഹജ്ജിന് ലഭിച്ച 5.58 ലക്ഷം അപേക്ഷകളില്‍ നിന്ന് 60,000 പേര്‍ക്ക് മാത്രമായിരിക്കും ഹജ്ജിന് അവസരം നല്‍കുക. കൊവിഡിന്റെ പശ്ചാത്തലത്തില്‍ തീര്‍ഥാടകരുടെ എണ്ണം നിയന്ത്രിക്കുന്നതിന്റെ ഭാഗമായാണ് നിയന്ത്രണം. സൗദിയിലുള്ളവര്‍ക്ക് മാത്രമായിരിക്കും ഇത്തവണ ഹജ്ജിന് അവസരമെന്നും നേരത്തേ വ്യക്തമാക്കിയിരുന്നു. നിലവില്‍ ഹജ്ജിന് തെരഞ്ഞെടുക്കപ്പെട്ടതായി ലഭിക്കുന്ന സന്ദേശങ്ങള്‍ അന്തിമമല്ലെന്നും ആരോഗ്യ പരിശോധന ഉള്‍പ്പെടെയുള്ള നടപടിക്രമങ്ങള്‍ക്ക് വിധേയമായി മാത്രമേ ഇക്കാര്യത്തില്‍ അന്തിമ തീരുമാനമെടുക്കാനാവൂ എന്നും അദ്ദേഹം വ്യക്തമാക്കി.
അവസരം ലഭിക്കുക പ്രായത്തിന് അനുസരിച്ച്
ഹജ്ജിനുള്ള രജിസ്‌ട്രേഷന്‍ പൂര്‍ത്തിയായ വെള്ളിയാഴ്ച മുതല്‍ 50 വയസ്സിന് മുകളിലുള്ളവര്‍ക്കാണ് ആദ്യം സന്ദേശം അയച്ചുതുടങ്ങിയിരിക്കുന്നത്. അതിന് താഴെയുള്ളവര്‍ക്ക് ഓരോ പാക്കേജ് തിരിച്ചുള്ള സ്ഥല സൗകര്യത്തിന്റെ അടിസ്ഥാനത്തില്‍ അറിയിപ്പ് ലഭിക്കും. പ്രായത്തിന്റെ അടിസ്ഥാനത്തിലാണ് ഹജ്ജിന് അവസരം നല്‍കുന്നത്. സന്ദേശം ലഭിച്ച് മൂന്ന് മണിക്കൂറിനകം പാക്കേജ് ഫീസ് അടക്കുന്നത് ഉള്‍പ്പെടെയുള്ള നടപടിക്രമങ്ങള്‍ പൂര്‍ത്തിയാക്കാത്തവരുടെ രജിസ്‌ട്രേഷന്‍ കാന്‍സലാവുകയും തൊട്ടടുത്ത ആള്‍ക്ക് അവസരം നല്‍കുകയും ചെയ്യുമെന്നും അദ്ദേഹം അറിയിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : ministry of hajj announce issuance of hajj permit will facilitate taking second dose of vaccine
Malayalam News from malayalam.samayam.com, TIL Network
