ആർത്തവകാലത്തെ ശുചിത്വം: അറിഞ്ഞിരിക്കണം ഈ കാര്യങ്ങൾ

ആർത്തവദിനങ്ങൾ അടുക്കുമ്പോൾ തന്നെ ചില സ്ത്രീകൾക്കെങ്കിലും മോശം മാനസികാവസ്ഥയും പിരിമുറുക്കവുമെല്ലാം അനുഭവപ്പെട്ടേക്കാം. ഇത് കൂടാതെ ഈ ദിവസങ്ങളിലെ അസഹനീയമായ വേദന വേറെയും! എല്ലാ സ്ത്രീകൾക്കും ഈ അവസ്ഥകൾ ഇല്ലെങ്കിലും പലർക്കും എത്ര തന്നെ പരിശ്രമിച്ചാലും ശരീരം നൽകുന്ന ഇത്തരം അവസ്ഥകളിൽ നിന്നും ഒളിച്ചോടാൻ സാധിക്കില്ല. ഈ ദിവസങ്ങളിൽ ഓരോ സ്ത്രീയും പിന്തുടരേണ്ട ശുചിത്വ ശീലങ്ങൾ ഉണ്ട്. അത്തരം കാര്യങ്ങൾ മനസ്സിലാക്കിയിരിക്കാം.

വൃത്തിയാക്കുമ്പോൾ



ആർത്തവ ദിനങ്ങൾ ആണെങ്കിലും അല്ലെങ്കിലും, ദിവസവും രണ്ടുതവണയെങ്കിലും യോനീ ഭാഗം കഴുകേണ്ടതുണ്ട്. നിങ്ങളുടെ മാസമുറയുടെ ദിനങ്ങളിൽ ധാരാളം രക്തം പുറന്തള്ളപ്പെടുന്നതിനാൽ ഇത് യോനിയുടെ പുറം പാളികളിലിരുന്ന് വരണ്ടുപോകാനും നിങ്ങളുടെ ശുചിത്വത്തെയും ആരോഗ്യത്തെയും മോശമാക്കാനും സാധ്യതയുണ്ട്. നമ്മളിൽ പലരും യോനി ഭാഗം വൃത്തിയാക്കാൻ കാഠിന്യമേറിയ സോപ്പുകളും മറ്റു ഉൽപ്പന്നങ്ങളും ഉപയോഗിക്കുന്നുണ്ട്. എന്നാൽ കഴുകി വൃത്തിയാക്കാനായി ശുദ്ധമായ വെള്ളം മാത്രം ഉപയോഗിച്ചാൽ മതി.

പാഡ് മാറ്റേണ്ടത് എപ്പോൾ



ആർത്തവ ദിനങ്ങളിൽ ഉപയോഗശേഷം പാഡ് മാറ്റുന്നതിനെ കുറിച്ച് ഇന്നും പല സ്ത്രീകൾക്കും വ്യക്തമായ ധാരണയില്ല. പാഡ് ഉപയോഗിക്കുന്നവർ അത് എത്ര മണിക്കൂറിൽ മാറ്റി പുതിയത് ഉപയോഗിക്കണമെന്ന് പലർക്കും അറിവില്ല. കൂടാതെ ഉപയോഗിക്കുന്ന പാഡ് ദീർഘനേരം ഉപയോഗിക്കുന്നു. ചിലപ്പോൾ മടി മൂലവും ഇത് മാറ്റാതിരിക്കുന്നവരുണ്ട്. എന്തൊക്കെയായാലും ഇത് കടുത്ത അണുബാധയ്ക്ക് കാരണമാകും എന്ന് അറിഞ്ഞിരിക്കുക. അതുകൊണ്ട് നിങ്ങളുടെ പാഡ് അല്ലെങ്കിൽ ടാംപോൺ പതിവായി നീക്കം ചെയ്യുക. സാനിറ്ററി പാഡുകൾ 6 മണിക്കൂറിൽ കൂടുതലും ടാംപോണുകൾ 8 മണിക്കൂറിൽ കൂടുതലും ഉപയോഗിക്കാൻ പാടുള്ളതല്ല.

ആർത്തവ ദിനങ്ങളിലെ വേദനക്ക് തടയിടാൻ മഞ്ഞൾ!

കുളിക്കുമ്പോൾ



ആർത്തവത്തിൻ്റെ നാളുകളിൽ വേദനകളും മറ്റ് ബുദ്ധിമുട്ടുകളും ഉണ്ടാവുന്നത് വളരെ സാധാരണമാണ്. പല സ്ത്രീകളും അതിശക്തമായ വേദന മൂലം ദിവസം മുഴുവൻ തളർന്നു കിടക്കുന്നു. ക്ഷീണവും തളർച്ചയുമൊക്കെ നിങ്ങളെ വേട്ടയാടുന്നുണ്ടെങ്കിൽ പോലും കിടക്കയിൽ നിന്ന് എഴുന്നേൽക്കാതെ ചടഞ്ഞിരിക്കാൻ പാടില്ല. ഈ ദിവസങ്ങളിൽ രക്തം കടുതൽ പുറത്തു പോകാൻ സാധ്യതയുള്ളതിനാൽ കുളിക്കുന്ന ശീലം മുടക്കാതിരിക്കാൻ ശ്രദ്ധിക്കുക.

കൈകളുടെ ശുചിത്വം



ആർത്തവദിനങ്ങൾ ആണെങ്കിലും അല്ലെങ്കിലും കൈകൾ വൃത്തിയായി സൂക്ഷിക്കേണ്ടതുണ്ട്. ആർത്തവ ദിനങ്ങളിൽ പ്രത്യേകിച്ചും. ആർത്തവവുമായി ബന്ധപ്പെട്ട് നിങ്ങൾ ഉപയോഗിക്കുന്ന അനുബന്ധ ഉൽപ്പന്നങ്ങളുടെ ഉപയോഗത്തിന് മുൻപും ശേഷവും കൈകൾ രണ്ടും വൃത്തിയായി കഴുകണം. ഒരു പാഡ്, അല്ലെങ്കിൽ ടാംപോൺ അതല്ലെങ്കിൽ ഒരു മെൻസ്ട്രൽ കപ്പ്, ഇത്തരത്തിൽ ഏതൊരു ഉല്പന്നവും കൈകാര്യം ചെയ്യുന്നതിനു മുമ്പ് കൈ കഴുകി വൃത്തിയാക്കാൻ മടി കാണിക്കരുത്.

ഈ ദൈനംദിന പ്രശ്നങ്ങൾക്കൊക്കെ പരിഹാരമാണ് ഒലിവ് ഓയിൽ

ശരീരം തുടയ്ക്കാൻ ഉപയോഗിക്കുന്ന തുണികൾ



നിങ്ങളുടെ യോനിയുടെ ഭാഗം കഴുകിയ ശേഷം തുടച്ച് വൃത്തിയാക്കാൻ ഉപയോഗിക്കുന്ന ടവൽ കൃത്യമായി വൃത്തിയാക്കാൻ മറക്കരുത്. ചിലരെങ്കിലും ഒരേ ടവൽ വൃത്തിയാക്കാതെ ദീർഘനാൾ ഉപയോഗിക്കാറുണ്ട്. ആർത്തവ ദിനങ്ങളിൽ നിങ്ങളുടെ യോനി തുടച്ചു ശുദ്ധീയക്കാൻ നിങ്ങൾ ഉപയോഗിക്കുന്ന തോർത്ത്, ടവൽ, എന്നിവ എല്ലാ ദിവസവും തുടർച്ചയായി മാറ്റുകയും കഴുകി വൃത്തിയാക്കുകയും വേണം.

ആർത്തവദിനങ്ങളിൽ ഉപയോഗിക്കുന്ന ഉൽപ്പന്നങ്ങൾ



നിങ്ങളുടെ യോനിയുടെ ഭാഗങ്ങളിൽ സുഗന്ധം അടങ്ങിയിട്ടുള്ള ഉൽപ്പന്നങ്ങളിൽ ഉപയോഗിക്കുന്നതിൽ നിന്നും വിട്ടുനിൽക്കാൻ ശ്രദ്ധിക്കുക. സുഗന്ധം അടങ്ങിയിട്ടുള്ള ഏതൊരു ശുദ്ധീകരണ ഉൽപ്പന്നമോ ആർത്തവ ഉൽ‌പ്പന്നമോ ആയിക്കൊള്ളട്ടെ. അവ ഉപയോഗിക്കുമ്പോൾ നിങ്ങളുടെ യോനിയിൽ കൂടുതൽ അണുബാധകൾ ഉണ്ടാകാൻ സാധ്യതയുണ്ട്.