ഓര്‍ക്കാം കൊവിഡ് കാലത്തെ നിസ്വാര്‍ത്ഥ സേവനം: ജൂലൈ 1 ഇന്ത്യയിൽ ഡോക്ടര്‍മാരുടെ ദിനം

ന്യൂഡൽഹി: കൊവിഡ് 19 മഹാമാരിയുടെ കാലത്തും അതിനു മുൻപും ആരോഗ്യപ്രവര്‍ത്തകര്‍ വലിയ സേവനമാണ് പ്രതിദിനം ലോകജനതയ്ക്കായി ചെയ്യുന്നത്. ഇതിനിടെയും രാജ്യത്തെ ആശുപത്രികളിൽ ഡോക്ടര്‍മാര്‍ ഉള്‍പ്പെടെയുള്ള അവശ്യസര്‍വീസ് ജീവനക്കാര്‍ അതിക്രമങ്ങള്‍ നേരിടുന്ന വാര്‍ത്തയാണ് തുടര്‍ച്ചയായി പുറത്തു വരുന്നത്. ആരോഗ്യമേഖല നേരിടുന്ന കടുത്ത പ്രതിസന്ധികള്‍ക്കിടയിലും രാജ്യത്തെ ഡോക്ടര്‍മാര‍് നല്‍കുന്ന സേവനങ്ങള്‍ക്ക് രാജ്യം വലിയ മൂല്യമാണ് കൽപിക്കുന്നത്.

1. എന്നാണ് ഇന്ത്യയിൽ ഡോക്ടര്‍മാരുടെ ദിനം ആഘോഷിക്കുന്നത്?
   
   ലോകത്ത് പലയിടത്തും പല ദിവസങ്ങളാണ് ഡോക്ടര്‍മാരുടെ ദിനമായി ആചരിക്കുന്നത്. ഇന്ത്യയിൽ എല്ലാ വര്‍ഷവും ജൂലൈ മാസം ഒന്നാം തീയതിയാണ് ഡോക്ടര്‍മാരുടെ ദിനം. ഇന്ത്യൻ മെഡിക്കൽ അസോസിയേഷനാണ് ഡോക്ടര്‍മാരുടെ ദിനാചരണത്തിന് മുൻകൈയെടുക്കുന്നത്. കൊവിഡ് സാഹചര്യത്തിൽ രാജ്യത്ത് വൈറസിനെതിരായ പോരാട്ടത്തിൽ മുൻനിര പോരാളികളായി പ്രവര്‍ത്തിക്കുന്ന ഡോക്ടര്‍മാരും ആരോഗ്യപ്രവര്‍ത്തകരുമാണ് ഈ വര്‍ഷത്തെ ഡോക്ടര്‍മാരുടെ ദിനത്തിൻ്റെ ശ്രദ്ധാകേന്ദ്രം. മഹാമാരിയുടെ കാലത്ത് രോഗികളുടെ ആരോഗ്യം കാത്തുസൂക്ഷിക്കുന്നതോടൊപ്പം സ്വയം ആരോഗ്യം സംരക്ഷിക്കേണ്ട ഉത്തരവാദിത്തം കൂടി ആരോഗ്യപ്രവര്‍ത്തകര്‍ക്കുണ്ടെന്നാണ് ഡോക്ടര്‍മാര്‍ പറയുന്നത്.
2. എന്തുകൊണ്ടാണ് രാജ്യത്ത് ജൂലൈ 1 ഡോക്ടര്‍മാരുടെ ദിനമായി ആചരിക്കുന്നത്?
   
   പ്രശസ്ത ഡോക്ടറും പശ്ചിമ ബംഗാളിൻ്റെ രണ്ടാമത്തെ മുഖ്യമന്ത്രിയുമായ ബിധാൻ ചന്ദ്ര റോയിയുടെ ജന്മദിനമാണ് ജൂലൈ 1. ഇദ്ദേഹത്തിൻ്റെ ഓര്‍മയെന്ന നിലയിലാണ് ജൂലൈ 1ന് ഇന്ത്യയിൽ ഡോക്ടര്‍മാരുടെ ദിനം ആചരിക്കുന്നത്. 1882 ജൂലൈ ഒന്നിനായിരുന്നു ബിധാൻ ചന്ദ്ര റോയ് ജനിച്ചത്. 1962ൽ ഇതേ ദിവസം തന്നെ 80-ാം വയസ്സിലായിരുന്നു റോയിയുടെ മരണം. സ്വാതന്ത്ര്യസമര സേനാനി കൂടിയായ അദ്ദേഹത്തിന് ഭാരതരത്നം അടക്കമുള്ള പുരസ്കാരങ്ങളും ലഭിച്ചിട്ടുണ്ട്.
3. എന്താണ് ഇത്തവണത്തെ ഡോക്ടര്‍മാരുടെ ദിനത്തിൻ്റെ പ്രത്യേകത?
   
   ജൂലൈ 1ന് രാജ്യം ഡോക്ടര്‍മാരുടെ ദിനം ആഘോഷിക്കുകയാണെന്നും കൊവിഡ് മഹാമാരിയുടെ കാലത്ത് രാജ്യത്തെ ഡോക്ടര്‍മാര്‍ സമൂഹത്തിനായി നിസ്വാര്‍ത്ഥ സേവനമാണ് ചെയ്യുന്നതെന്നും പ്രധാനമന്ത്രി പ്രതിമാസ പരിപാടിയായ മൻ കി ബാത്തിൽ പറഞ്ഞു. രാഷ്ട്രനിര്‍മാണത്തിന് ഡോക്ടര്‍മാര്‍ വലിയ പങ്കു വഹിക്കുന്നുണ്ടെന്നും അദ്ദേഹം ചൂണ്ടിക്കാട്ടി. കൊവിഡ് കാലത്ത് രാജ്യത്തിനായി ഡോക്ടര്‍മാര്‍ ചെയ്യുന്ന സേവനത്തോട് രാജ്യത്തിന് നന്ദിയുണ്ടെന്നും സ്വന്തം ജീവനു പ്രാധാന്യം കൊടുക്കാതെയാണ് ഡോക്ടര്‍മാര്‍ ഇപ്പോള്‍ സേവനം നടത്തുന്നതെന്നും പ്രധാനമന്ത്രി പറഞ്ഞു.
4. ആരായിരുന്നു ബിധാൻ ചന്ദ്ര റോയ്?
   
   ഇന്ത്യൻ ഉപഭൂഖണ്ഡത്തിലെ ആദ്യ മെഡിക്കൽ കൺസൾട്ടൻ്റ് എന്നായിരുന്നു ബ്രിട്ടീഷ് മെഡിക്കൽ ജേണൽ ബിസി റോയിയെ വിശേഷിപ്പിച്ചത്. ആധുനിക പശ്ചിമ ബംഗാളിൻ്റെ ശിൽപി എന്നാണ് ബിധാൻ ചന്ദ്ര റോയ് അറിയപ്പെടുന്നത്. കൽക്കട്ട മെഡിക്കൽ കോളേജിൽ പഠനം പൂർത്തിയാക്കിയ അദ്ദേഹം സംസ്ഥാനത്തെ പല മുൻനിര സ്ഥാപനങ്ങൾക്കും തുടക്കമിട്ടു. കൂടാതെ ദുർഗാപൂർ, കല്യാണി, ബിധാൻനഗർ, അശോകനഗർ, ഹാബ്ര എന്നീ നഗരങ്ങൾ സ്ഥാപിച്ചതും ബിധാൻ ചന്ദ്ര റോയിയുടെ കാലത്താണ്. ഇന്ത്യൻ മെഡിക്കൽ അസോസിയേഷൻ, മെഡിക്കൽ കൗൺസിൽ ഓഫ് ഇന്ത്യ തുടങ്ങി പല പ്രമുഖ സ്ഥാപനങ്ങൾക്കു അദ്ദേഹം തുടക്കമിട്ടു. 1948 മുതൽ 1962ൽ മരിക്കുന്നതു വരെ അദ്ദേഹമായിരുന്നു പശ്ചിമ ബംഗാൾ മുഖ്യമന്ത്രി.