‘എന്നും അംബാനിയേയോ അദാനിയേയോ അധിക്ഷേപിച്ചിട്ട് കാര്യമില്ല’; കോൺ​ഗ്രസിനെ വിമർശിച്ച് ഹർദ്ദിക് പട്ടേൽ

ഈ രണ്ട് വ്യവസായികളും കഠിനാധ്വാനത്തിലൂടെയാണ് മുന്നേറിയതെന്നും പ്രധാനമന്ത്രിയുടെ സ്വന്തം സംസ്ഥാനമായ ഗുജറാത്തിൽ നിന്നുള്ളവർ എന്നതുകൊണ്ട് മാത്രം അവരെ ലക്ഷ്യമിടാനാകില്ലെന്നും അദ്ദേഹം പറഞ്ഞു.

“ഒരു വ്യവസായി ഉയർന്ന് വരുന്നത് അവന്റേയോ അവളുടേയോ കഠിനാധ്വാനത്തിന്റെ ഫലമായാണ്. എല്ലായിപ്പോഴും അംബാനിയേയോ അദാനിയേയോ അധിക്ഷേപിച്ചിട്ട് കാര്യമില്ല. പ്രധാനമന്ത്രി ഗുജറാത്തിൽ നിന്നുള്ളയാളാണ് എന്നത് കൊണ്ട് അംബാനിയോടും അദാനിയോടും എന്തിനാണ് നിങ്ങളുടെ ദേഷ്യം തീർക്കുന്നത്? ഇത് ആളുകളെ തെറ്റിദ്ധരിപ്പിക്കാനുള്ള ഒരു മാർഗം മാത്രമായിരുന്നു,” അദ്ദേഹം പറഞ്ഞതായി വാർത്താ ഏജൻസിയായ എഎൻഐ റിപ്പോർട്ട് ചെയ്തു.

തന്റെ രാഷ്ട്രീയ ജീവിതത്തിന്റെ മൂന്ന് വർഷം കോൺഗ്രസിൽ നിന്നുകൊണ്ട് നശിപ്പിച്ചുവെന്നും അദ്ദേഹം വാർത്താ ഏജൻസിയോട് വ്യക്തമാക്കി. താൻ ഇപ്പോൾ പാർട്ടിക്കൊപ്പമില്ലെന്നും ഗുജറാത്തിന്റെ മുന്നേറ്റത്തിന് വേണ്ടി മികച്ച രീതിയിൽ പ്രവർത്തിക്കുമെന്നും അദ്ദേഹം പറഞ്ഞു.

Also Read : നവജ്യോത് സിങ്ങ് സിദ്ദുവിന് ഒരു വർഷത്തെ തടവ് ശിക്ഷ; ഉടൻ കീഴടങ്ങണമെന്ന് സുപ്രീം കോടതി

“പാർട്ടിയിലായിരിക്കുമ്പോൾ എനിക്ക് ഒരിക്കലും പ്രവർത്തിക്കാൻ അവസരം ലഭിച്ചിട്ടില്ല, കോൺഗ്രസ് എനിക്ക് ഒരു ജോലിയും തന്നിട്ടില്ല,” അദ്ദേഹം എഎൻഐയോട് പറഞ്ഞു.

അദ്ദേഹം ഇന്നലെയാണ് പാർട്ടി വിട്ടതായി പ്രഖ്യാപിച്ചത്. രാഹുൽ ഗാന്ധിയെ പേരെടുത്ത് പറയാതെ വിമർശിച്ചായായിരുന്നു അദ്ദേഹത്തിന്റെ രാജി. പ്രധാനമന്ത്രി നരേന്ദ്ര മോദിയുടെ നേതൃത്തിലുള്ള കേന്ദ്രസർക്കാരിന്റെ പ്രവർത്തികളെ കണ്ണടച്ച് എതിർക്കുക മാത്രമാണ് കോൺഗ്രസ് ചെയ്യുന്നതെന്ന് കത്തിൽ കുറിച്ചിരുന്നു.

സംസ്ഥാന കോൺഗ്രസ് ഘടകത്തിന്റെ ഒരു പരിപാടിയിലേക്കും തന്നെ ക്ഷണിക്കാറില്ലെന്നും രണ്ട് വർഷത്തോളം തന്നെ ഒരു ഉത്തരവാദിത്വവും ഏൽപ്പിച്ചിരുന്നില്ലെന്നും അദ്ദേഹം പറഞ്ഞു. കടലാസിൽ മാത്രമായിരുന്നു തന്റെ പദവിയെന്നും ഹാർദ്ദിക് പട്ടേൽ കുറ്റപ്പെടുത്തി.

അതിന് പുറമെ, ഇന്ന് രാവിലെ വിളിച്ചു ചേർത്ത വാർത്താസമ്മേളനത്തിലും കോൺഗ്രസിനെ കടുത്ത ഭാഷയിൽ തന്നെ അദ്ദേഹം വിമർശിച്ചിരുന്നു. രാജ്യത്ത് ഏറ്റവും അധികം ജാതീയതയും അഴിമതിയും നിറഞ്ഞ പാർട്ടി കോൺഗ്രസാണെന്നും അദ്ദേഹം വിമർശിച്ചു.

Also Read : മുട്ടോളം വെള്ളത്തിൽ ഇറങ്ങാൻ വയ്യ, പ്രളയ അവലോകനത്തിനെത്തിയ ബിജെപി എംഎൽഎ രക്ഷാപ്രവർത്തകന്റെ തോളിൽ കയറി; വിവാദം

രാഹുൽ ഗാന്ധി പങ്കെടുത്ത ഗുജറാത്തിലെ റാലിയിൽ 25,000 പേരാണ് പങ്കെടുത്തത്. എന്നാൽ, റാലിയുടെ ചെലവ് ബില്ല് വന്നപ്പോൾ റാലിയിൽ പങ്കെടുത്തത് 70,000 പേരായി വർദ്ധിച്ചു. ഇതാണ് അഴിമതിയുടെ കാര്യത്തിൽ കോൺഗ്രസ് പുലർത്തുന്ന നിലവാരമെന്ന് ഹാർദ്ദിക് പട്ടേൽ ആരോപിച്ചു.