പ്രസവത്തിനെ തുടർന്ന് ബിരുദധാന ചടങ്ങ് നഷ്ടപ്പെട്ട് യുവതി; ആശുപത്രി മുറിയിൽ ചടങ്ങ് നടത്തി കോളേജ് അധികൃതർ

ഡിലാർഡ് സർവകലാശാലയിലെ ഒരു വിദ്യാർഥിനിയുടെ വ്യത്യസ്തമായ ബിരുദധാരണമാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. ജാഡ സേയ്ൽസ് എന്ന വിദ്യാർഥിനിക്കാണ് കോളേജിൽ ബിരുദധാന ചടങ്ങിൽ പങ്കെടുക്കാൻ പറ്റാത്തിരുന്നത്. പ്രസവത്തിനായി പോയത് കാരണമാണ് ജാഡയ്ക്ക് ചടങ്ങിൽ പങ്കെടുക്കാൻ പറ്റാത്തിരുന്നത്.

എന്നാൽ ജാഡയുടെ സങ്കടം മാറ്റാൻ കോളേജ് അധികൃതർ ജാഡയുടെ ബിരുദധാന ചടങ്ങ് ആശുപത്രിയിൽ വച്ച് നടത്തിയതാണ് ശ്രദ്ധേയമായത്. ബിരുദധാന ചടങ്ങ് നടക്കുന്നതിന് തൊട്ട് മുൻപത്തെ ദിവസമാണ് പ്രസവ വേദനയെ തുടർന്ന് ജാഡയെ ആശുപത്രിയിലേക്ക് മാറ്റിയത്.

കുഞ്ഞിന് ജന്മം നൽകിയ സന്തോഷത്തിനൊപ്പം ഇരട്ടി സന്തോഷമായി കോളേജ് അധികൃതരുടെ ഈ പ്രവൃത്തി. ബിരുദധാന ചടങ്ങിനിടെയുള്ള തൊപ്പി മുകളിലേക്ക് വലിച്ചേറിയുന്ന പരിപാടിയൊക്കെ ജാഡയ്ക്ക് നഷ്ടമായതോടെയാണ് പ്രത്യേക അനുമതിയോടെ ആശുപത്രിയിൽ ഈ ചടങ്ങ് നടത്താൻ അവർ തീരുമാനിച്ചത്. ഡോ. കിംബ്രോ ആണ് ട്വിറ്ററിലൂടെ ഈ അസുലഭ മുഹൂർത്തം പങ്കുവച്ചത്.

Also read:ചുറുചുറുക്കോടെ നൃത്തമാടി വൃദ്ധൻ; കൈയ്യടിച്ച് സോഷ്യൽ മീഡിയ

വെള്ളിയാഴ്ച വൈകുന്നേരമാണ് ജാഡയെ പ്രസവ വേദനയെ തുടർന്ന് ആശുപത്രിയിൽ പ്രവേശിപ്പിച്ചത്. ശനിയാഴ്ച പുലർച്ചെയാണ് മെസേജ് അയച്ച് ഈ വിവരം ഞങ്ങളെ അറിയിച്ചത്. അവളുടെ ബിരുദധാന ചടങ്ങ് നടക്കുന്ന ദിവസം അവൾ ഒരു കുഞ്ഞിന് ജന്മം നൽകിയെന്നും അറിയാൻ കഴിഞ്ഞു. പിന്നീട് ഞങ്ങൾ ആശുപത്രിയിൽ എത്തിയാണ് ചടങ്ങ് നടത്തിയതെന്ന് വീഡിയോ ട്വിറ്ററിൽ പങ്കുവെച്ച ശേഷം ഡോക്ടർ കുറിച്ചു. ബിരുദധാനത്തിന് ഉപയോഗിക്കുന്ന ഗൗണും തൊപ്പിയുമൊക്കെ ധരിച്ചാണ് ജാഡാ ബിരുദം സ്വീകരിക്കുന്നത്.

18 വർഷത്തെ തന്റെ അക്കാദമിക് ജീവിതത്തിനിടയിൽ ഇതാദ്യമായാണ് ഇങ്ങനെ ഒരു ബിരുദധാനം നടത്തുന്നതെന്നും അദ്ദേഹം പറഞ്ഞു. എന്തായാലും സർവകലാശാലയുടെ ഈ പ്രവൃത്തി രണ്ട് കൈയും നീട്ടിയാണ് സോഷ്യൽ മീഡിയ സ്വീകരിച്ചത്. സാർ നിങ്ങളുടെ ദയയ്ക്കും സമയത്തിനും നന്ദി.. അർഹയായ ഈ സ്ത്രീയെ ബിരുദം നേടാൻ അനുവദിച്ചതിന് എന്നാണ് ഒരാൾ കമന്റ് ഇട്ടത്.

Also watch :