പാലക്കാട്ടെ 16കാരിയുടെ ആത്മഹത്യ: വ്യാജ പ്രൊഫൈൽ വഴി ബ്ലാക്ക് മെയിലിങ്; 44കാരൻ അറസ്റ്റിൽ

പാലക്കാട്: പാലക്കാട് ചാലിശ്ശേരിയിൽ സ്കൂള്‍ വിദ്യാര്‍ഥിനിയുടെ ആത്മഹത്യയിൽ എറണാകുളത്തു നിന്ന് 44കാരനെ അറസ്റ്റ് ചെയ്തു പോലീസ്. കളമശ്ശേരി കൈപ്പിടിയിൽ ദിലീപ് കുമാറാണ് അറസ്റ്റിലായത്. സൈബര്‍ സെല്ലിൻ്റെ സഹായത്തോടെ ചാലിശ്ശേരി പോലീസാണ് ഇയാളെ അറസ്റ്റ് ചെയ്തത്. 22കാരനായ കോളേജ് വിദ്യാര്‍ഥിയെന്ന് തെറ്റിദ്ധരിപ്പിച്ച് ഇയാള്‍ പെൺകുട്ടിയുമായി സമൂഹമാധ്യമങ്ങള്‍ വഴി ബന്ധപ്പെട്ടിരുന്നുവെന്നാണ് രിപ്പോര്‍ട്ട്.



Also Read: മൂന്നാം തരംഗം ഉടനില്ല; കുട്ടികൾക്ക് ഓഗസ്റ്റ് മുതൽ വാക്സിൻ നൽകുമെന്ന് ഐസിഎംആ‍ര്‍

ബന്ധുവായ യുവാവിൻ്റെ ചിത്രങ്ങള്‍ ഉപയോഗിച്ച് കുട്ടിയെ തെറ്റിദ്ധരിപ്പിച്ച് സൗഹൃദത്തിലായ ശേഷം ഭീഷണിപ്പെടുത്തിയെന്നാണ് പോലീസ് പറയുന്നത്. കോളേജ് വിദ്യാര്‍ഥിയെന്ന വ്യാജേന ദിലീപ് കുമാര്‍ ഇൻസ്റ്റഗ്രാമിൽ വ്യാജ പ്രൊഫൈൽ ഉണ്ടാക്കുകയായിരുന്നു. തന്നെ കണ്ടെത്താതിരിക്കാൻ മറ്റൊരു സ്ത്രീയുടെ പേരിലുള്ള സിം കാര്‍ഡാണ് ഉപയോഗിച്ചിരുന്നത്. ബാങ്കുദ്യോഗസ്ഥയായ അമ്മയെന്ന് തെറ്റിദ്ധരിപ്പിക്കാനായി പെൺകുട്ടിയോട് ഇയാള്‍ സുഹൃത്തായ സ്ത്രീയെക്കൊണ്ട് ഫോണിൽ സംസാരിപ്പിക്കുകയും ചെയ്തു. എന്നാൽ ഈ സൗഹൃദം മുതലെടുത്ത് കുട്ടിയുടെ ചിത്രങ്ങള്‍ ഇയാള്‍ കൈക്കലാക്കുകയും ഇവ ഉപയോഗിച്ച് ഭീഷണിപ്പെടുത്തുകയുമായിരുന്നു. ഈ ഭീഷണിയാണ് ആത്മഹത്യയിലെത്തിച്ചതെന്നാണ് പോലീസ് പറയുന്നത്.

Also Read: ഒസാമ ബിൻ ലാദൻ ‘രക്തസാക്ഷി’; ഇമ്രാൻ ഖാന് സംഭവിച്ചത് നാക്കുപിഴയെന്ന് പാക് മന്ത്രി

കഴിഞ്ഞ തിങ്കളാഴ്ചയായിരുന്നു ചാലിശ്ശേരി സ്വദേശിനിയായ പെൺകുട്ടി തൂങ്ങിമരിച്ചത്. കുട്ടിയുടെ മൊബൈൽ ഫോണിൽ നിന്നു ലഭിച്ച വിവരങ്ങളുടെ അടിസ്ഥാനത്തിലാണ് പോലീസ് അന്വേഷണം നടത്തിയത്. സമാനമായ രീതിയിൽ പ്രതി മറ്റു സ്ത്രീകളുമായും അടുപ്പം സ്ഥാപിച്ചിരുന്നതായി പോലീസ് കണ്ടെത്തിയിട്ടുണ്ട്.