വ്യാഴാഴ്ച മുതല്‍ സൗദിയില്‍ പുറത്തിറങ്ങണമെങ്കില്‍ വാക്‌സിനേഷന്‍ നിര്‍ബന്ധമാകും

റിയാദ്: ആഗസ്ത് ഒന്നു മുതല്‍ വാക്‌സിന്‍ എടുക്കാത്തവര്‍ക്ക് സൗദിയില്‍ പുറത്തിറങ്ങി നടക്കാന്‍ കഴിയാത്ത സ്ഥിതി വരും. നേരത്തേ ഇതുമായി ബന്ധപ്പെട്ട് റിപ്പോര്‍ട്ടുകള്‍ വന്നിരുന്നെങ്കിലും ഇപ്പോള്‍ ആഭ്യന്തര മന്ത്രാലയം തന്നെ ഇക്കാര്യം സ്ഥിരീകരിച്ചിരിക്കുകയാണ്. സര്‍ക്കാര്‍-സ്വകാര്യ ഓഫീസുകള്‍, വ്യാപാര സ്ഥാപനങ്ങള്‍, സാംസ്‌കാരിക-വിനോദ-കായിക പരിപാടികള്‍, സാമ്പത്തിക പ്രവര്‍ത്തനങ്ങള്‍, മറ്റ് പൊതു ചടങ്ങുകള്‍ എന്നിവിടങ്ങളില്‍ പ്രവേശിക്കുന്നതിനും പൊതുഗതാഗത സംവിധാനങ്ങള്‍ ഉപയോഗിക്കുന്നതിനും വാക്‌സിനേഷന്‍ നിര്‍ബന്ധമാണെന്ന് മന്ത്രാലയം വക്താവ് ലഫ്റ്റനന്റ് കേണല്‍ തലാല്‍ അല്‍ ശല്‍ഹൂബ് വാര്‍ത്താ സമ്മേളനത്തില്‍ അറിയിച്ചു.



രാജ്യത്തെ വ്യാപാര സ്ഥാപനങ്ങളിലും പൊതു ഇടങ്ങളിലും കൊവിഡ് പെരുമാറ്റച്ചട്ട ലംഘനങ്ങള്‍ വന്‍തോതില്‍ വര്‍ധിച്ചു വരുന്ന സാഹചര്യത്തിലാണ് തീരുമാനം. കഴിഞ്ഞ ഒരാഴ്ചയ്ക്കിടയില്‍ മാത്രം 17,800 നിയമ ലംഘനങ്ങളാണ് രാജ്യത്ത് റിപ്പോര്‍ട്ട് ചെയ്യപ്പെട്ടതെന്ന് അദ്ദേഹം പറഞ്ഞു. ആഘോഷ പാര്‍ട്ടികളിലും മറ്റും പങ്കെടുക്കുന്നവര്‍ക്ക് 40,000 റിയാലാണ് പിഴയിടും. അതേസമയം അത്തരം ചടങ്ങുകള്‍ സംഘടിപ്പിക്കുന്നവരില്‍ നിന്ന് 50,000 റിയാല്‍ പിഴ ഈടാക്കുമെന്നും അദ്ദേഹം മുന്നറിയിപ്പ് നല്‍കി.

Also Read: വന്ധ്യതാ ചികിത്സയില്‍ ഭര്‍ത്താവിന് താല്‍പര്യമില്ല; വിവാഹ മോചനം തേടി യുവതി ഫുജൈറ കോടതിയില്‍

അതിനിടെ, സൗദി അറേബ്യയില്‍ ഇന്നലെ 1218 പേര്‍ക്ക് കൊവിഡ് ബാധ സ്ഥിരീകരിച്ചതായി ആരോഗ്യമന്ത്രാലയം അറിയിച്ചു. രോഗബാധിതരില്‍ 1,252 പേര്‍ സുഖം പ്രാപിച്ചു. രാജ്യത്ത് ഇതുവരെ വൈറസ് ബാധ റിപ്പോര്‍ട്ട് ചെയ്തത് 4,83,221 പേര്‍ക്കാണ്. ഇതില്‍ 4,64,256 പേര്‍ സുഖം പ്രാപിച്ചു. രാജ്യത്ത് വിവിധ ഭാഗങ്ങളില്‍ ചികിത്സയില്‍ കഴിയുന്നവരില്‍ 15 പേര്‍ കൂടി ഇന്നലെ മരണപ്പെട്ടു. ആകെ കൊവിഡ് മരണസംഖ്യ 7,775 ആയി. നിലവില്‍ 11,190 പേരാണ് രാജ്യത്തെ വിവിധ ആശുപത്രികളിലും മറ്റുമായി ചികിത്സയില്‍ കഴിയുന്നത്. റിയാദിലാണ് ഇന്നലെ ഏറ്റവും കൂടുതല്‍ രോഗബാധ റിപോര്‍ട്ട് ചെയ്തത്. 369 പേര്‍ക്കാണ് ഇവിടെ മാത്രം രോഗം സ്ഥിരീകരിച്ചത്.