Sumayya P | Samayam Malayalam | Updated: 28 Jun 2021, 12:00:20 PM
കുവൈറ്റ് മൊബൈല്‍ ഐഡി ആപ്പില്‍ പച്ചയോ ഓറഞ്ചോ സ്റ്റാറ്റസ് ഉള്ളവര്‍ക്കും ഇമ്യൂണ്‍ ആപ്പില്‍ വാക്‌സിനേഷന്‍ സ്റ്റാറ്റസ് ഉള്ളവര്‍ക്കും മാത്രമാണ് പ്രവേശനം .
വ്യാപാര സ്ഥാപനങ്ങളില്‍ പ്രവേശന നിയന്ത്രണം
കൊവിഡ് പ്രതിരോധ പ്രവര്‍ത്തനങ്ങള്‍ കര്‍ക്കശമാക്കുന്നതിന്റെ ഭാഗമായി കുവൈറ്റിലെ ഷോപ്പിംഗ് മാളുകള്‍ ഉള്‍പ്പെടെയുള്ള എല്ലാ വ്യാപാര സ്ഥാപനങ്ങളില്‍ ഞായറാഴ്ച മുതല്‍ പ്രവേശന നിയന്ത്രണം ഏര്‍പ്പെടുത്തിയിരുന്നു. ഷോപ്പിംഗ് മാളുകള്‍, റസ്റ്റൊറന്റുകള്‍, ഹെല്‍ത്ത് ക്ലബുകള്‍, സലൂണുകള്‍, ജിമ്മുകള്‍ തുടങ്ങിയ വ്യാപാര സ്ഥാപനങ്ങള്‍ക്ക് ഇത് ബാധകമാണ്. കുവൈറ്റ് മൊബൈല്‍ ഐഡി ആപ്പില്‍ പച്ചയോ ഓറഞ്ചോ സ്റ്റാറ്റസ് ഉള്ളവര്‍ക്കും ഇമ്യൂണ്‍ ആപ്പില്‍ വാക്‌സിനേഷന്‍ സ്റ്റാറ്റസ് ഉള്ളവര്‍ക്കും മാത്രമാണ് പ്രവേശനം അനുവദിക്കുക. തീരെ വാക്‌സിന്‍ എടുക്കാത്തവരുടെ സ്റ്റാറ്റസ് ചുവപ്പായിരിക്കും. ഇവര്‍ക്ക് വ്യാപാര സ്ഥാപനങ്ങളില്‍ പ്രവേശനം അനുവദിക്കില്ല.
പ്രത്യേക ഇളവ് നേടിയവര്‍ ഇവരാണ്
ആരോഗ്യമന്ത്രാലയത്തില്‍നിന്ന് പ്രത്യേക ഇളവ് നേടിയവര്‍, 16 വയസ്സില്‍ താഴെയുള്ള കുട്ടികള്‍, ഗര്‍ഭിണികള്‍, സ്ഥാപന ഉടമകള്‍ എന്നിവര്‍ക്ക് നിബന്ധനകളോടെ പ്രവേശനം ഉണ്ടാകുമെന്നും അധികൃതര്‍ അറിയിച്ചു. 6000 ചതുരശ്ര മീറ്ററില്‍ അധികം വിസ്തൃതിയുള്ള മാളുകള്‍ക്കാണ് നിയന്ത്രണം ബാധകമാകുക.
അതിനിടെ, നിയന്ത്രണം പാലിക്കപ്പെടുന്നുവെന്ന് ഉറപ്പുവരുത്തുന്നതിന്റെ ഭാഗമായി മാളുകള്‍ ഉള്‍പ്പെടെയുള്ള വ്യാപാര സ്ഥാപനങ്ങളില്‍ പോലിസിനെ വിന്യസിച്ചതായി ആഭ്യന്തര മന്ത്രാലയം അറിയിച്ചു.
തീരുമാനം പൂര്‍ണരീതിയില്‍ നടപ്പിലാക്കാന്‍ സുരക്ഷാ ഉദ്യോഗസ്ഥരെ നിയോഗിച്ചിട്ടുണ്ട്. ഇത് പാലിക്കപ്പെടുന്നുവെന്ന് ഉറപ്പുവരുത്താന്‍ വ്യാപക പരിശോധന നടത്തുമെന്നും അധികൃതര്‍ അറിയിച്ചു. ഇതിന്റെ ഭാഗമായി മാളുകളിലെ പ്രവേശന കവാടങ്ങളില്‍ പരിശോധന കര്‍ശനമാക്കി.
ജീവനക്കാര്‍ പ്രവേശിക്കുന്നതിന് മുമ്പ് പരിശോധന
20 ഗേറ്റുകളുള്ള 360 മാളില്‍ ഏഴ് ഗേറ്റുകളിലൂടെ മാത്രമാണ് സന്ദര്‍ശകര്‍ക്ക് പ്രവേശനം അനുവദിച്ചത്. അവന്യൂസിലെ 40 ഗേറ്റുകളില്‍ 17 എണ്ണം മാത്രമാണ് തുറന്നത്. സ്ഥാപനങ്ങളിലെ ജീവനക്കാര്‍ പ്രവേശിക്കുന്നതിന് മുമ്പ് അവരുടെ തിരിച്ചറിയല്‍ കാര്‍ഡും വര്‍ക്ക് ഐഡിയും ഒത്തുനോക്കണമെന്നും തൊഴില്‍ മന്ത്രാലയം നിര്‍ദ്ദേശിച്ചു. വാക്‌സിനെടുക്കാത്ത ജീവനക്കാര്‍ക്ക് പകരക്കാരെ ഉപയോഗിക്കുന്നത് തടയുന്നതിന് വേണ്ടിയാണിത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : facilities violating covid vaccine rules face kuwaiti dinar 5000 fine in kuwait
Malayalam News from malayalam.samayam.com, TIL Network
