ഐസ് ക്യൂബ് മസ്സാജ് ചർമ്മത്തിന് നൽകും ഈ ഗുണങ്ങൾ

ചർമ്മത്തിന്റെ സ്വാഭാവിക സൗന്ദര്യവും തിളക്കവും നഷ്ട്പ്പെടുത്തുന്ന പല കാര്യങ്ങളും ദിവസവും സംഭവിക്കുന്നുണ്ട്. പല തരത്തിലുള്ള മലിനീകരണം, അമിതമായി സൂര്യപ്രകാശമേൽക്കുന്നത്, ചർമ്മ സുഷിരങ്ങളിൽ സൂക്ഷ്മാണുക്കൾ പ്രവേശിക്കുന്നത് തുടങ്ങിയ പ്രശ്നങ്ങൾക്ക് നമ്മളെ എല്ലാ ദിവസവും ബാധിക്കാറുണ്ട്. ഇത് ചർമ്മത്തിന്റെ തിളക്കത്തെ ഇല്ലാതാക്കി വരണ്ടതും പ്രായക്കൂടുതൽ തോന്നിക്കുന്നതുമായി മാറ്റും. ഇതിനൊപ്പം അനാരോഗ്യകരമായ ഭക്ഷണരീതിയും സമ്മർദ്ദവും കൂടെ അനുഭവിക്കുന്നുവെങ്കിൽ മനോഹാരിത പൂർണമായും നഷ്ടപ്പെട്ട ഓജസില്ലാത്ത ചർമ്മമാണ് നിങ്ങൾക്കുണ്ടാവുക. ഏറെ വൈകിയുള്ള തിരിച്ചറിവ് ചര്മത്തെ പഴയ രൂപത്തിലേക്ക് തിരിച്ചെത്തിക്കാൻ സഹായിക്കുകയുമില്ല.



മുഖത്തിന്റെ ആകർഷണം നഷ്ടമാക്കുന്ന ഡാർക്ക് സർക്കിൾസ്, ചർമ്മത്തിന്റെ മങ്ങിയ അവസ്ഥ,ഓപ്പൺ പോർസ്, വീക്കം, നേർത്ത വരകൾ, ചുളിവുകൾ, മുഖക്കുരു തുടങ്ങിയ പ്രശ്നങ്ങൾ വളരെ നേരത്തെ തന്നെ കണ്ടു തുടങ്ങാൻ കാരണം ചർമത്തിന് വേണ്ടത്ര പരിചരണം നൽകാത്തതാണ്.

അധിക ചെലവില്ലാതെ പ്രകൃതിദത്ത ചേരുവകൾ ഉപയോഗിച്ചുള്ള പതിവായ സംരക്ഷണം നൽകിയാൽ പോലും ചർമ്മത്തിന്റെ തിളക്കം വീണ്ടെടുക്കാൻ സാധിക്കും. ഇതോടൊപ്പം റെഫ്രിജറേറ്ററിൽ നിന്ന് ഐസ് ക്യൂബുകൾ എടുത്ത് ചർമ സംരക്ഷണത്തിനായി ഉപയോഗിച്ചലോ? അതിശയിപ്പിക്കുന്ന മാറ്റം നിങ്ങളുടെ മുഖത്ത് കാണാൻ കഴിയുമെന്നുറപ്പ്.

മുഖത്തെ ചർമ കോശങ്ങൾക്ക് ഉന്മേഷം നൽകാനും, മുഖം ശുദ്ധീകരിക്കാനും രക്തചംക്രമണം വർദ്ധിപ്പിക്കാനും ഐസ് ക്യൂബുകൾ സഹായിക്കും. കൂടാതെ, ഐസ് ഒരു സ്വാഭാവിക മേക്കപ്പ് പ്രൈമർ ആണ്. മേക്കപ്പ് ചെയ്യുന്നതിന് മുൻപ് മുഖത്തെ സുഷിരങ്ങൾ പൂർണമായി അടയ്ക്കുന്നതിന് ഐസ് ക്യൂബുകൾ ഉപയോഗിക്കാറുണ്ട്. മുഖക്കുരു പൂർണമായി ഇല്ലാതാക്കാനും പാടുകൾ നീക്കം ചെയ്യാനും ഇതുവഴി സാധിക്കും.

ചർമ്മ സൗന്ദര്യം മെച്ചപ്പെടുത്തും ഈ ഹെർബൽ ബാത്ത് പൗഡർ

തിളങ്ങുന്ന ചർമ്മത്തിന്:



ചർമ്മത്തിൽ ഐസ് ക്യൂബ് ഉപയോഗിച്ച്‌ മസ്സാജ് ചെയ്യുമ്പോൾ താപനില വലിയ തോതിൽ കുറയുന്നതിനാൽ ആ സമയത്ത് രക്തയോട്ടം തടസ്സപ്പെടുന്നു. എന്നാൽ ഐസ് നീക്കം ചെയ്തുകഴിഞ്ഞാൽ, തണുപ്പ് കുറയുകയും രക്തക്കുഴലുകൾ വീണ്ടും വികസിക്കുകായും ചെയ്യും. ഈ സമയത്ത് മുഖത്തേക്ക് രക്തയോട്ടം വർദ്ധിക്കുന്നു. ഇങ്ങനെ മുഖത്തിന് സ്വാഭാവിക തിളക്കം ലഭിക്കും.

കൂടാതെ, നിർജീവ ചർമ കോശങ്ങളെ പുറംതള്ളുന്നതിനും സുഷിരങ്ങൾ വൃത്തിയാക്കുന്നതിനും ഐസ് സഹായിക്കുന്നു, ഇത് ചർമ്മത്തിന് മിനുസമാർന്ന രൂപം നൽകുന്നു.

കണ്ണുകൾക്ക് ചുറ്റുമുള്ള വീക്കം കുറയ്ക്കുന്നു:



ഉറക്കക്കുറവ് അല്ലെങ്കിൽ ഡിജിറ്റൽ സ്ക്രീനുകളുടെ തുടർച്ചയായ ഉപയോഗം എന്നിവ കാരണം കണ്ണുകൾക്ക് ചുറ്റും സാധാരണയായി വീക്കവും ഇരുണ്ട നിറവുമെല്ലാം കണ്ടുവരാറുണ്ട്. കൺതടത്തിലെ വീക്കം ചില ആളുകളിൽ വലിയ പ്രയാസമുണ്ടാക്കുന്നതാണ്. ഐസ് ക്യൂബ് ഉപയോഗിക്കുന്നത് രക്തക്കുഴലുകളെ ശാന്തമാക്കി വീക്കം നിയന്ത്രിക്കാൻ സഹായിക്കുന്നു. മാത്രമല്ല, ചർമ്മത്തിന് തിളക്കം നൽകാനും ഇത് സഹായിക്കും.

ഈ അവസ്ഥ മാറ്റാൻ ഐസ് ക്യൂബ് ഉപയോഗിച്ച് നിങ്ങളുടെ കണ്ണുകൾ മസാജ് ചെയ്യുക. ഇത് കണ്ണുൾക്ക് ചുറ്റുമുള്ള വീക്കം കുറയ്ക്കുകയും തണുത്തതും ശാന്തവുമായ പ്രഭാവം നൽകുകയും ചെയ്യും.

ആന്റിഓക്‌സിഡന്റുകളും കഫീനും അടങ്ങിയിരിക്കുന്നതിനാൽ ഗ്രീൻ ടീ ഐസ് ക്യൂബുകളുടെ രൂപത്തിലാക്കിയ ശേഷം മസാജ് ചെയ്യാം. ഇതുപോലെ ചാമോമൈൽ ടീയും ഉപയോഗിക്കാം. കണ്ണുകളുടെ പ്രയാസം അതിവേഗത്തിൽ പരിഹരിക്കാൻ മികച്ച മാർഗങ്ങളാണ് ഇവ.

ഇതോടൊപ്പം കണ്ണുകൾക്ക് ചുറ്റും കാണുന്ന ഡാർക്ക് സർക്കിളുകൾ ഇല്ലാതാക്കാൻ വെള്ളരിക്ക, കോഫി പൌഡർ എന്നിവ വെള്ളത്തിൽ കലർത്തി ഐസ് ക്യൂബ് രൂപത്തിൽ ഉപയോഗിക്കാം.

ചർമ്മ സുഷിരങ്ങൾ ചുരുക്കാം:



എണ്ണമയമുള്ള ചർമം അല്ലെങ്കിൽ കോമ്പിനേഷൻ ചർമ്മമുണ്ടെങ്കിൽ വളരെ പെട്ടെന്ന് കാണാൻ കഴിയുന്ന ചർമ്മ സുഷിരങ്ങൾ രൂപപ്പെടാറുണ്ട്. ഈ സുഷിരങ്ങളിൽ അഴുക്കും മാലിന്യങ്ങളും അടിഞ്ഞുകൂടുകയും അത് മുഖക്കുരു, കറുത്ത പാടുകൾ എന്നിവയായി മാറുകയും ചെയ്യും. ഈ പ്രശ്നം ഒഴിവാക്കാൻ ചർമം വൃത്തിയാക്കിയ ശേഷം ഐസ് ക്യൂബുകൾ ഉപയോഗിച്ച മസാജ് ചെയ്ത് സുഷിരങ്ങൾ ചുരുക്കാം. ഇങ്ങനെ പതിവായി ചെയ്യുന്നത് മുഖത്തിന് വലിയ തോതിൽ ഗുണം ചെയ്യും.

മുടി സമൃദ്ധമായി വളരാൻ അരി കഴുകിയ വെള്ളം + ഗ്രീൻ ടീ ഹെയർ വാഷ്

മുഖക്കുരു നിയന്ത്രിക്കാം:



ചർമത്തിൽ അമിതമായി എണ്ണ ഉത്പാദിപ്പിക്കപ്പെടുന്നത് മുഖക്കുരു വർധിക്കാൻ കാരണമാകും. ചർമ സുഷിരങ്ങളിൽ എണ്ണയോടൊപ്പം അഴുക്കും അടിഞ്ഞുകൂടിയാണ് വേദനയോടുകൂടിയ വലിയ മുഖക്കുരു രൂപംകൊള്ളുന്നത്. എന്നാൽ ദിവസവും ഐസ് മസാജ് ചെയ്യുന്നത് അമിത എണ്ണ ഉദ്പാദനം നിയന്ത്രിക്കാൻ സഹായിക്കും. മുൻപ് വന്ന മുഖക്കുരുക്കളുടെ പാടുകൾ ഇല്ലാതാക്കാനും ഈ ഐസ് മസാജ് സഹായിക്കും.

വെയിലേറ്റ പാടുകൾ മാറ്റാം:



കടുത്ത വെയിലേൽക്കുന്നത് ചർമത്തിൽ വീക്കം, വേദന എന്നിവയ്ക്ക് കാരണമാകുന്നു. ഇവയെല്ലാം ഐസ് മസാജിന്റെ സഹായത്തോടെ മാറ്റിയെടുക്കാം. വെയിലേറ്റ ഭാഗങ്ങളിൽ ഐസ് പുരട്ടുന്നത് വേദന കുറയ്ക്കുന്നു,മാത്രമല്ല, വീക്കം, ചുവപ്പ് എന്നിവ നിയന്ത്രിക്കാനും ഇതുവഴി സാധിക്കും. സാധാരണ ഐസ് ക്യൂബ് ഉപയോഗിക്കുന്നതിനേക്കാൾ കറ്റാർവാഴ ജെൽ എടുത്ത് വെള്ളത്തിൽ കലർത്തി ഐസ് ക്യൂബ് ആയി ഉപയോഗിച്ചാൽ ഗുണം ഇരട്ടിയാകും.

നിർജീവ കോശങ്ങൾ നീക്കം ചെയ്യാം:



മുഖ ചർമ്മത്തെ ഏറ്റവും മികച്ച രീതിയിൽ ശുദ്ധീകരിക്കാൻ കഴിവുള്ളതാണ് പാൽ. അതിനാൽ പാൽ ഉപയോഗിച്ചു തയ്യാറാക്കിയ ഐസ് ക്യൂബുകൾ മൃത ചർമ്മത്തെ നീക്കം ചെയ്യാൻ സഹായിക്കും. പാലിൽ അടങ്ങിയ ലാക്റ്റിക് ആസിഡ് പ്രകൃതിദത്ത മിതമായ എക്സ്ഫോളിയേറ്ററാണ്. മാത്രമല്ല, ഇത് ഈർപ്പം നിലനിർത്തുകയും ഹൈപ്പർപിഗ്മെന്റേഷൻ നിയന്ത്രിക്കുകയും ചെയ്യും.