ഉമ്മൻചാണ്ടിയെ കല്ലെറിയുമെന്ന ഭയം വേണ്ട; ‘ഉളുപ്പുണ്ടെങ്കിൽ രാജിവയ്ക്കണം’: വി ഡി സതീശൻ

പിണറായി വിജയൻ മുഖ്യമന്ത്രിസ്ഥാനത്തു നിന്ന് മാറി നിൽക്കണമെന്നും പ്രതിപക്ഷ നേതാവ് ആരോപിച്ചു. മുഖ്യമന്ത്രി പേടിക്കേണ്ട. മുൻ മുഖ്യമന്ത്രി ഉമ്മൻ ചാണ്ടിയെ സിപിഎം കല്ലെറിഞ്ഞപ്പോലെ പിണറായിയെ കോൺഗ്രസുകാർ കല്ലെറിയില്ല. സ്വപ്നയുടെ ആരോപണങ്ങൾ കേന്ദ്ര അന്വേഷണ എജൻസി അന്വേഷിക്കാത്തത് ബിജെപി സിപിഎം ധാരണമൂലമാണെന്നും സതീശൻ ആരോപിച്ചു.

സ്വപ്ന സുരേഷ് കോടതിയിൽ നൽകിയ മൊഴി കള്ളമാണെങ്കിൽ ഇന്ത്യൻ ശിക്ഷാ നിയമം അനുസരിച്ച് അവരെ ഏഴ് വർഷം വരെ ശിക്ഷിക്കാം. അതേ കോടതിയിൽ മുഖ്യമന്ത്രിക്ക് പരാതി നൽകാം. എന്ത് കൊണ്ടാണ് കോടതിയിൽ പോകാത്തത്? വി ഡി സതീശൻ ചോദിക്കുന്നു.

Also Read : പദവികൾ തരണമോ എന്ന് മുഖ്യമന്ത്രി തീരുമാനിക്കും; പിണറായി വിജയനുമായി കൂടിക്കാഴ്ച നടത്തി കെ വി തോമസ്

മുഖ്യമന്ത്രിക്കും മന്ത്രിമാർക്കും എതിരെ അപകീർത്തികരമായ ആരോപണം വന്നാൽ സെഷൻസ് കോടതിയെ സമീപിക്കാം. അതിനും തയ്യാറായില്ലല്ലോ എന്നും അദ്ദേഹം ചോദിക്കുന്നു.

ഒത്തുതീർപ്പിന് സമീപിച്ചെന്ന് പ്രതിയായ സ്ത്രീ പറയുന്ന മുൻ മാധ്യമ പ്രവർത്തകൻ പോലീസ് വിട്ട ഇടനിലക്കാരൻ ആയിരുന്നോ? വേണ്ടാത്തത് എന്തോ നടന്നിട്ടുണ്ട്. ഒത്തുതീർപ്പിനുള്ള ശ്രമം നടന്നിട്ടുണ്ട്. നിയമം കയ്യിലെടുത്ത് സർക്കാരും പാർട്ടിയും മുന്നോട്ട് പോകുന്നു.

Also Read : സ്വപ്ന പുറത്തുവിട്ടത് എഡിറ്റ് ചെയ്ത ശബ്ദരേഖ; യഥാർത്ഥ ഓഡിയോ പുറത്തുവിടുമെന്ന് ഷാജ് കിരൺ

പ്രതിയായ സ്ത്രീയുടെ വെളിപ്പെടുത്തൽ വരുന്നത് അറിഞ്ഞപ്പോൾ തന്നെ ബി.ജെ.പി സംസ്ഥാന അധ്യക്ഷനെതിരായ മഞ്ചേശ്വരം തെരഞ്ഞെടുപ്പ് കേസിൽ ജാമ്യമില്ലാ വകുപ്പ് കൂടി ചേർത്തു. ഇനി ഈ രണ്ട് കേസുകളിലും ബി.ജെ.പിയും സി.പി.എമ്മും തമ്മിൽ ഒത്തുതീർപ്പുണ്ടാക്കുമെന്നും അദ്ദേഹം ആരോപിച്ചു.