സ്വർണകടത്ത് കേസ് വിശദീകരിക്കും; ബദൽ പ്രചാരണത്തിന് സിപിഎം

സംസ്ഥാന സർക്കാരിനെ അസ്ഥിരപ്പെടുത്താനുള്ള നീക്കമാണെന്ന് വിലയിരുത്തിയ സിപിഎം സംസ്ഥാന സെക്രട്ടേറിയേറ്റ് അതിനെതിരെ വിപുലമായ പ്രചാരണ പരിപാടികൾ നടത്താൻ തീരുമാനിച്ചു. എൽഡിഎഫിൽ ചർച്ച ചെയ്ത് മുന്നണിയുടെ പൊതു പരിപാടിയായി നടത്താനാണ് ഉദ്ദേശിക്കുന്നത്.

ബിജെപിയും കോൺഗ്രസും ചേർന്നുള്ള രാഷ്ട്രീയ ഗൂഡാലോചനയാണ് ഇപ്പോഴത്തെ വിവാദത്തിന് പിന്നിലെന്നാണ് സിപിഎം സെക്രട്ടേറിയേറ്റ് യോഗം വിലയിരുത്തിയത്.

സർക്കാരിനെ പ്രവർത്തിക്കാൻ അനുവദിക്കില്ലെങ്കിൽ ജനങ്ങളെ അണിനിരത്തി നേരിടുമെന്ന് ഇന്നലെ വാർത്താസമ്മേളനത്തിൽ കൊടിയേരി ബാലകൃഷ്ണൻ വ്യക്തമാക്കി. സർക്കാർ ഇതിന് പിന്നിലുള്ള ഗൂഡാലോചന സർക്കാർ അന്വേഷിക്കണമെന്നും ആവശ്യപ്പെട്ടു. ആസൂത്രീത നീക്കം ഉയർന്നു വരുമ്പോൾ കയ്യും കെട്ടി നോക്കി നിൽക്കാൻ കഴിയില്ല.

Also Read : ഉമ്മൻചാണ്ടിയെ കല്ലെറിയുമെന്ന ഭയം വേണ്ട; ‘ഉളുപ്പുണ്ടെങ്കിൽ രാജിവയ്ക്കണം’: വി ഡി സതീശൻ

മുഖ്യമന്ത്രി പിണറായി വിജയന്റേയും സർക്കാരിന്റെയും പ്രതിച്ഛായ മോശപ്പെടുത്തുകയെന്ന ലക്ഷ്യമാണ് ആരോപണങ്ങൾക്ക് പിന്നിൽ. കേന്ദ്ര ഭരിക്കുന്ന ബിജെപി രാഷ്ട്രീയ ലക്ഷ്യങ്ങൾക്കായി കേന്ദ്ര ഏജൻസികളെ ഉപയോഗിക്കുകയാണ്. അടുത്ത് വരാനിരിക്കുന്ന ലോക്സഭാ തെരഞ്ഞെടുപ്പിനെ മുന്നിൽ കണ്ടാണോ ഇപ്പോഴത്തെ വിവാദങ്ങളെന്ന് സംശയിക്കേണ്ടിയിരിക്കുന്നു.

ആരോപണങ്ങൾ അടിസ്ഥാന രഹിതമാണെന്ന് വസ്തുതകൾ നിരത്തി ജനങ്ങളോട് വിശദീകരിക്കണം. ഓരോ ജില്ലകളിലും ചേരുന്ന വിശദീകരണയോഗങ്ങളിൽ പ്രധാന നേതാക്കൾ പങ്കെടുക്കുമെന്നുമാണ് അറിയിച്ചിരിക്കുന്നത്.

പ്രാദേശിക അടിസ്ഥാനത്തിലും വിവാദങ്ങളെ പ്രചിരോധിക്കാൻ പാർട്ടി നടപടിയെടുക്കും. ഇതിനേക്കാൾ വലിയ ആരോപണങ്ങളെ പ്രതിരോധിച്ചാണ് നിയമസഭാ തെരഞ്ഞെടുപ്പിൽ വിജയിച്ച് തുടർച്ചയായി രണ്ടാം തവണ അധികാരത്തിലെത്തിയതെന്നും ഈ വിവാദങ്ങളേയും കൂട്ടായി നേരിടണമെന്നും യോഗത്തിൽ അഭിപ്രായമുയർന്നുവെന്നും മാധ്യമറിപ്പോർട്ടിൽ പറയുന്നു.

ആരോപണം ഉന്നയിച്ചതിനു പിന്നാലെ കേരളത്തിലാകെ മുഖ്യമന്ത്രിയുടെ കോലം കത്തിക്കുന്നതും സംഘർഷം ഉണ്ടാക്കുന്നതും ആസൂത്രണമാണ് വ്യക്തമാക്കുന്നത്. പ്രതിഷേധിക്കാൻ എല്ലാവർക്കും അവകാശമുണ്ട്. എന്നാൽ, അത് അക്രമത്തിലേക്കു നീങ്ങാൻ പാടില്ല. പ്രതിഷേധങ്ങളെ ഭയക്കുന്നില്ലെന്നും ഇന്നലെ കോടിയേരി പറഞ്ഞിരുന്നു.

Also Read : പദവികൾ തരണമോ എന്ന് മുഖ്യമന്ത്രി തീരുമാനിക്കും; പിണറായി വിജയനുമായി കൂടിക്കാഴ്ച നടത്തി കെ വി തോമസ്

ഇവിടെ യുഡിഎഫും ബിജെപിയും മത്സരിച്ച് പ്രതിഷേധം സംഘടിപ്പിക്കുകയാണ്. ഇതിന്റെയൊന്നും ഗുണം ബിജെപിക്ക് കിട്ടാൻ പോകുന്നില്ലെന്നാണ് അവരുടെ നേതാക്കൾ മനസ്സിലാക്കേണ്ടത്. സോണിയ ഗാന്ധിക്കും രാഹുൽ ഗാന്ധിക്കും ഇഡി നോട്ടിസ് ലഭിച്ചിട്ടും ഒരു പ്രകടനവും കേരളത്തിൽ കണ്ടില്ല. കോൺഗ്രസുകാർക്ക് പിണറായി വിജയനെ പിടിച്ചാൽ മതിയെന്നും ഇന്നലെ അദ്ദേഹം പറഞ്ഞു.