കുവൈറ്റിലെ കൊടുംചൂടിനെ ശപിച്ച് ടിക് ടോക് വീഡിയോ; പ്രവാസി അറസ്റ്റില്‍

കുവൈറ്റ് സിറ്റി: കുവൈറ്റിലെ കൊടുംചൂടിനെ ശപിച്ചും പരിഹസിച്ചും സാമൂഹ്യ മാധ്യമത്തില്‍ വീഡിയോ പോസ്റ്റ് ചെയ്ത പ്രവാസിയെ കുവൈറ്റ് പോലിസ് അറസ്റ്റ് ചെയ്തു. വീഡിയോ പോസ്റ്റ് ചെയ്യുന്നതിനലൂടെ കുവൈറ്റിലെ അപകീര്‍ത്തിപ്പെടുത്താന്‍ ശ്രമിച്ചുവെന്ന് ആരോപിച്ചാണ് അറസ്റ്റ്.



കുവൈറ്റിലെ അതിശക്തമായ ചൂടില്‍ പൊടിക്കാറ്റിനിടയിലൂടെ കാറില്‍ യാത്ര ചെയ്യുന്നതിന്റെ വീഡിയോ ആണ് ഈജിപ്തുകാരനായ പ്രവാസി ടിക് ടോക്കില്‍ പോസ്റ്റ് ചെയ്തത്. അസഹ്യമായ ചൂടിനെ കുറിച്ച് പരാതി പറഞ്ഞും കുവൈറ്റിലെ കാലാവസ്ഥയെ പരിഹസിച്ചും ചൂടിനെ ശപിച്ചുമൊക്കെ സംസാരിച്ചു കൊണ്ടുള്ളതായിരുന്നു വീഡിയോ. സോഷ്യല്‍ മീഡിയയില്‍ വൈറലായ പ്രവാസിയുടെ വീഡിയോയ്ക്ക് പിന്നാലെ നിരവധി പേര്‍ ഇത്തരം വീഡിയോകളുമായി രംഗത്തുവന്നിരുന്നു. പോലീസ് അറസ്റ്റ് ചെയ്ത ഇയാളെ നിയമനടപടിക്ക് ശേഷം ഈജിപ്തിലേക്ക് നാടുകടത്തുമെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.

Also Read: അബുദാബിയിലും വാക്‌സിന്‍ എടുക്കാത്തവര്‍ക്ക് പൊതു ഇടങ്ങളില്‍ നിയന്ത്രണം വരുന്നു

കുവൈറ്റിലെ ചില പ്രദേശങ്ങളില്‍ 50 ഡിഗ്രി സെല്‍ഷ്യല്‍സിന് മുകളിലാണ് താപനില. കഴിഞ്ഞ ദിവസം ലോകത്ത് ഏറ്റവും കൂടുതല്‍ താപനില രേഖപ്പെടുത്തിയ ആദ്യ 11 പ്രദേശങ്ങളില്‍ എട്ടെണ്ണവും കുവൈറ്റില്‍ലായിരുന്നു. ആഗോള കാലാവസ്ഥാ നിരീക്ഷണ വെബ്സൈറ്റായ എല്‍ഡൊറാഡോ വെതറിന്റെ റിപ്പോര്‍ട്ട് പ്രകാരമാണിത്.

ജൂണ്‍ 23 ലെ റിപ്പോര്‍ട്ട് പ്രകാരം കുവൈറ്റിലെ നുവൈസീബ് പ്രദേശത്താണ് ലോകത്തെ ഏറ്റവും കൂടുതല്‍ ചൂട് അനുഭവപ്പെട്ടത്. 53 ഡിഗ്രി സെല്‍ഷ്യസായിരുന്നു ബുധനാഴ്ചത്തെ ഇവിടത്ത് താപനില. തൊട്ടു താഴെ 49.7 ഡിഗ്രിയുമായി കുവൈറ്റിലെ തന്നെ ജഹ്റ പ്രദേശവും 49.2 ഡിഗ്രി സെല്‍ഷ്യസുമായി സുലൈബിയ്യ മേഖലയുമാണ്. ഇറാഖിലെ അമാറ, കുവൈറ്റിലെ മുത്രിബ എന്നിവയാണ് തൊട്ടടുത്ത സ്ഥാനങ്ങളില്‍. 49 ഡിഗ്രിയാണ് ഇവിടത്തെ താപനില. കുവൈറ്റിലെ തന്നെ അന്താരാഷ്ട്ര വിമാനത്താവളം (48.8), അബ്ദാലി (48.7), ഇറാഖിലെ ബസറ എയര്‍പോര്‍ട്ട് (48.6) തുടങ്ങിയവയാണ് തൊട്ടുപിറകില്‍.