അബുദാബി: ഇരുരാജ്യങ്ങളും തമ്മില്‍ കഴിഞ്ഞ വര്‍ഷം ആരംഭിച്ച സഹകരണം അരക്കിട്ടുറപ്പിക്കുന്നതിന്റെ ഭാഗമായി ഇസ്രായേല്‍ വിദേശകാര്യമന്ത്രി യായെര്‍ ലാപിദ് ഇന്ന് യുഎഇയിലെത്തും. അറബ് ലോകത്ത് ഇസ്രായേല്‍ വിദേശകാര്യ മന്ത്രി നടത്തുന്ന ആദ്യ ഔദ്യോഗിക സന്ദര്‍ശനമായിരിക്കും ഇത്. കഴിഞ്ഞ സപ്തംബറില്‍ യുഎഇയും ബഹ്‌റൈനും ഇസ്രായേലുമായി നയതന്ത്ര ബന്ധം സ്ഥാപിക്കുന്നതിന് അബ്രഹാം അക്കോഡ് എന്ന പേരില്‍ കരാറില്‍ ഒപ്പുവച്ചിരുന്നു.
ഇസ്രായേല്‍ എംബസി ഉദ്ഘാടനം ചെയ്യും
രണ്ട് ദിവസത്തെ സന്ദര്‍ശനത്തിനെത്തുന്ന ഇസ്രായേല്‍ യുഎഇ വിദേശകാര്യമന്ത്രി ഷെയ്ഖ് അബ്ദുല്ല ബിന്‍ സായിദ് അല്‍ നഹ്യാനുമായി കൂടിക്കാഴ്ച നടത്തും. അതോടൊപ്പം അബുദാബിയില്‍ പുതുതായി സ്ഥാപിച്ച ഇസ്രായേല്‍ എംബസിയും ദുബായിലെ ഇസ്രായേല്‍ കോണ്‍സുലേറ്റും ഉദ്ഘാടനം ചെയ്യും.
256 ഫലസ്തീനികളും 13 ഇസ്രായേലികളും കൊല്ലപ്പെട്ട ഇസ്രായേല്‍-ഗസാ ആക്രമണത്തിന് ശേഷമുള്ള ഇസ്രായേല്‍ വിദേശകാര്യമന്ത്രിയുടെ ആദ്യ സന്ദര്‍ശനമെന്ന പ്രത്യേകതയും ഈ സന്ദര്‍ശനത്തിനുണ്ട്. ജെറൂസലേമില്‍ നിന്ന് ഫലസ്തീന്‍ താമസക്കാരെ കുടിയിറക്കാനുള്ള ഇസ്രായേലിന്റെ തീരുമാനത്തെ നേരത്തേ യുഎഇ അപലപിച്ചിരുന്നു. ഇസ്രായേലിന്റെ ഈ നീക്കമായിരുന്നു പിന്നീട് സംഘര്‍ഷത്തില്‍ കലാശിച്ചത്.
ഗാസ സംഘര്‍ഷം ബന്ധത്തെ ബാധിച്ചില്ല
ഗാസയ്‌ക്കെതിരേ ഇസ്രായേല്‍ നടത്തിയ ആക്രമണങ്ങള്‍ക്ക് തടയിടാന്‍ സാധിക്കാത്തതിന് അറബ് രാജ്യങ്ങളില്‍ നിന്ന് യുഎഇ ഏറെ പഴി കേട്ടിരുന്നു. ഇസ്രായേല്‍-ഗസ സംഘര്‍ഷത്തിന്റെ പശ്ചാത്തലത്തില്‍ യുഎഇ-ഇസ്രായേല്‍ ബന്ധം ഉലയുമെന്നും വിലയിരുത്തപ്പെട്ടിരുന്നു. എന്നാല്‍ ഗസ സംഘര്‍ഷത്തിനു ശേഷം ഇരു രാജ്യങ്ങളും തമ്മിലുള്ള ബന്ധത്തില്‍ വിള്ളലുണ്ടായിട്ടില്ലെന്ന് തെളിയിക്കുന്നതാണ് വിദേശകാര്യ മന്ത്രിയുടെ സന്ദര്‍ശനമെന്നാണ് വിലയിരുത്തപ്പെടുന്നത്. ആദ്യ കൊടുങ്കാറ്റിനെ അതിജീവിക്കാന്‍ ഇരു രാജ്യങ്ങള്‍ക്കും സാധിച്ചുവെന്നതാണ് ഈ ചരിത്ര സന്ദര്‍ശനം വ്യക്തമാക്കുന്നതെന്ന് ദുബായിലെ പ്രമുഖ രാഷ്ട്രീയ നിരീക്ഷകന്‍ അബ്ദുല്‍ ഖാലിഖ് അബ്ദുല്ല അഭിപ്രായപ്പെട്ടു. ഇസ്രായേലുമായുള്ള ബന്ധം തുടരുന്നതോടൊപ്പം ഫലസ്തീനികളുടെ അവകാങ്ങള്‍ക്കു വേണ്ടി നിലകൊള്ളുകയെന്ന നിലപാടാണ് യുഎഇ സ്വീകരിക്കുന്നത്. അതേസമയം, യുഎഇയിലെ ജനങ്ങള്‍ക്കിടയില്‍ ശക്തമായ പ്രതിഷേധം നിലനില്‍ക്കുന്നുണ്ടെന്ന് സോഷ്യല്‍ മീഡിയ സന്ദേശങ്ങളില്‍ നിന്ന് വ്യക്തമാണെന്ന് ബിബിസി റിപ്പോര്‍ട്ട് ചെയ്തു.
ഗാസ സംഘര്‍ഷം ബന്ധത്തെ ബാധിച്ചില്ല
ഗാസയ്‌ക്കെതിരേ ഇസ്രായേല്‍ നടത്തിയ ആക്രമണങ്ങള്‍ക്ക് തടയിടാന്‍ സാധിക്കാത്തതിന് അറബ് രാജ്യങ്ങളില്‍ നിന്ന് യുഎഇ ഏറെ പഴി കേട്ടിരുന്നു. ഇസ്രായേല്‍-ഗസ സംഘര്‍ഷത്തിന്റെ പശ്ചാത്തലത്തില്‍ യുഎഇ-ഇസ്രായേല്‍ ബന്ധം ഉലയുമെന്നും വിലയിരുത്തപ്പെട്ടിരുന്നു. എന്നാല്‍ ഗസ സംഘര്‍ഷത്തിനു ശേഷം ഇരു രാജ്യങ്ങളും തമ്മിലുള്ള ബന്ധത്തില്‍ വിള്ളലുണ്ടായിട്ടില്ലെന്ന് തെളിയിക്കുന്നതാണ് വിദേശകാര്യ മന്ത്രിയുടെ സന്ദര്‍ശനമെന്നാണ് വിലയിരുത്തപ്പെടുന്നത്. ആദ്യ കൊടുങ്കാറ്റിനെ അതിജീവിക്കാന്‍ ഇരു രാജ്യങ്ങള്‍ക്കും സാധിച്ചുവെന്നതാണ് ഈ ചരിത്ര സന്ദര്‍ശനം വ്യക്തമാക്കുന്നതെന്ന് ദുബായിലെ പ്രമുഖ രാഷ്ട്രീയ നിരീക്ഷകന്‍ അബ്ദുല്‍ ഖാലിഖ് അബ്ദുല്ല അഭിപ്രായപ്പെട്ടു. ഇസ്രായേലുമായുള്ള ബന്ധം തുടരുന്നതോടൊപ്പം ഫലസ്തീനികളുടെ അവകാങ്ങള്‍ക്കു വേണ്ടി നിലകൊള്ളുകയെന്ന നിലപാടാണ് യുഎഇ സ്വീകരിക്കുന്നത്. അതേസമയം, യുഎഇയിലെ ജനങ്ങള്‍ക്കിടയില്‍ ശക്തമായ പ്രതിഷേധം നിലനില്‍ക്കുന്നുണ്ടെന്ന് സോഷ്യല്‍ മീഡിയ സന്ദേശങ്ങളില്‍ നിന്ന് വ്യക്തമാണെന്ന് ബിബിസി റിപ്പോര്‍ട്ട് ചെയ്തു.
യുഎഇക്ക് സുരക്ഷയും ഇസ്രായേലിന് വ്യാപാരവും മുഖ്യം
ഇരുരാജ്യങ്ങളും തമ്മില്‍ സഹകരണം മെച്ചപ്പെടുത്താനുള്ള തീരുമാനത്തിനു പിന്നിലെ ലക്ഷ്യങ്ങള്‍ വ്യത്യസ്തമാണെന്നാണ് നിരീക്ഷകര്‍ ചൂണ്ടിക്കാട്ടുന്നത്. യുഎഇയെ സംബന്ധിച്ചിടത്തോളം അതിന്റെ പ്രതിരോധ സുരക്ഷയാണ് പ്രധാനം. ഇസ്രായേലാവട്ടെ വിപുലമായ വ്യാപാര സാധ്യതകളാണ് സഹകരണത്തിലൂടെ മുന്നില്‍കാണുന്നത്. അബ്രഹാം കരാര്‍ ഒപ്പിട്ടതിനു പിന്നാലെ യുഎഇക്ക് 50 അഡ്വാന്‍സ്ഡ് എഫ്-35 ഫൈറ്റര്‍ ജെറ്റുകള്‍ നല്‍കാന്‍ അന്നത്തെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് തീരുമാനിച്ചിരുന്നു. സൈനിക ശക്തിയുടെ കാര്യത്തില്‍ മേഖലയിലെ രാജ്യങ്ങള്‍ക്കിടയില്‍ യുഎഇക്ക് മുന്‍തൂക്കം നേടിക്കൊടുക്കുന്ന തീരുമാനമായിരുന്നു ഇത്. ഇസ്രായേലിനെ സംബന്ധിച്ചിടത്തോളം യുഎഇയുമായി വന്‍ വ്യാപാര സഹകരണമാണ് കരാറിലൂടെ ലഭ്യമായത്. ആരോഗ്യം, ആര്‍ട്ടിഫിഷ്യല്‍ ഇന്റലിജന്‍സ്, പ്രതിരോധം, ടൂറിസം തൂടങ്ങിയ മേഖലകളില്‍ നിരവധി കരാറുകള്‍ ഇരുരാജ്യങ്ങളും തമ്മില്‍ ഇതിനകം ഒപ്പുവച്ചു. ഇസ്രായേലിന്റെ നാച്വറല്‍ ഗ്യാസ് ഫീല്‍ഡില്‍ 1.1 ബില്യന്‍ ഡോളറിന്റെ ഓഹരി വാങ്ങാന്‍ കഴിഞ്ഞ ഏപ്രിലില്‍ അബുദാബി സോവറിന്‍ വെല്‍ത്ത് ഫണ്ടായ മുബാദല ഇന്‍വെസ്റ്റ്‌മെന്റ് ധാരണാപത്രത്തില്‍ ഒപ്പിട്ടിരുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : israeli foreign minister to make first visit to uae today
Malayalam News from malayalam.samayam.com, TIL Network
