ആശ്വസിക്കാം: യുക്രൈനിലെ ഇന്ത്യൻ വിദ്യാർത്ഥികൾക്ക് റഷ്യയിൽ പഠനം തുടരാം

ഇന്ത്യൻ വിദ്യാർത്ഥികൾക്ക് അവരുടെ മുൻ അധ്യയന വർഷം നഷ്ടപ്പെടാതെ റഷ്യൻ സർവകലാശാലകളിൽ പ്രവേശനം നൽകുമെന്ന് ന്യൂഡൽഹിയിലെ റഷ്യൻ എംബസി ഡെപ്യൂട്ടി ചീഫ് ഓഫ് മിഷൻ റോമൻ ബാബുഷ്കിൻ പറഞ്ഞു.

വിദ്യാർത്ഥികൾക്ക് റഷ്യൻ സർവ്വകലാശാലകളിലേക്ക് പ്രവേശനം നൽകുമെന്ന് ബാബുഷ്കിൻ വ്യക്തമാക്കി. വിദ്യാർത്ഥികൾക്ക് അവരുടെ മുൻ വർഷങ്ങളിലെ പഠനം നഷ്‌ടപ്പെടാതെ അവർ നിർത്തിയ കോഴ്‌സുകളിൽ തന്നെ തുടരാം.

ഈ വർഷം ഫെബ്രുവരിയിൽ ഉണ്ടായ യുദ്ധത്തിനേത്തുടർന്ന് ഏതാണ്ട് 20,000ത്തിലധികം വിദ്യാർത്ഥികളാണ് പലായനം ചെയ്ത് തിരികെ എത്തിയത്. ഈ വിദ്യാർത്ഥികളുടെ ഗതിയെക്കുറിച്ചുള്ള മാധ്യമപ്രവർത്തകരുടെ ചോദ്യത്തിന് മറുപടിയായാണ് എംബസി ഡെപ്യൂട്ടി ചീഫ് ഓഫ് മിഷൻ റോമൻ ഇക്കാര്യം വ്യക്തമാക്കിയത്.

Also Read : 10 ഇടത്ത് യെല്ലോ അലേർട്ട്; കാറ്റ് ശക്തമാകും, മത്സ്യബന്ധനത്തിന് വിലക്ക്

നൂറുകണക്കിനു വിദ്യാർഥികൾക്ക് ആശ്വാസമാകുന്ന തീരുമാനമാണിത്. വിദ്യാർഥികളുടെ പഠനം സംബന്ധിച്ച് നോർക്ക സിഇഒയുമായി പ്രാഥമിക ചർച്ചകൾ നടന്നു. പഠനം മുടങ്ങിയ കേരളത്തിലെ വിദ്യാർഥികൾക്ക് തിരുവനന്തപുരത്തെ റഷ്യൻ കോൺസുലേറ്റിനെ സമീപിക്കാനാകുമെന്ന് എംബസി അറിയിച്ചിട്ടുണ്ട്.

നേരത്തെ ലഭിച്ചിരുന്ന സ്‌കോളർഷിപ്പ് റഷ്യൻ സർവ്വകലാശാലകളിൽ തുടർന്ന് ലഭിക്കാൻ സാധ്യതയുണ്ടെന്ന് റഷ്യൻ ഫെഡറേഷന്റെ ഓണററി കോൺസലും തിരുവനന്തപുരത്തെ റഷ്യൻ ഹൗസ് ഡയറക്ടറുമായ രതീഷ് സി നായർ വ്യക്തമാക്കിയിട്ടുണ്ട്.

അതേസമയം, യുക്രൈനിൽ വിദ്യാർത്ഥികൾ നൽകിയിരുന്ന ഫീസ് ആയിരിക്കില്ല നൽകേണ്ടത് എന്നും അദ്ദേഹം വാർത്താസമ്മേളനത്തിൽ പറഞ്ഞു.

Also Read : ലൈംഗിക അതിക്രമം ചെറുത്ത സ്ത്രീയുടെ മുഖത്ത് 118 സ്റ്റിച്ചുകൾ; ആക്രമണം പേപ്പർ കട്ടർ ഉപയോഗിച്ച്

അതിന് പുറമെ, യുക്രൈൻ ഭരണകൂടം നവ-നാസികളെ സംരക്ഷിക്കുകയാണെന്നും റഷ്യയുടെ ഒരു “ലക്ഷ്മൺ രേഖ” കടന്നതിന്റെ ഫലമാണ് യുദ്ധമെന്നും ബാബുഷ്കിൻ ആരോപിച്ചു.