സൂര്യൻ കിഴക്ക് ഉദിക്കുന്നിടത്തോളം കാലം എനിക്കെന്ത് ടെൻഷൻ; കെ ടി ജലീൽ

സ്വപ്ന സുരേഷ് നൽകിയ 164 സ്റ്റേറ്റ്മെന്റ് പുറത്തുവിടുമെന്ന് വ്യക്തമാക്കിയതിന് പിന്നാലെയായിരുന്നു കെടി ജലീലിന്റെ പ്രതികരണം. രണ്ടു ദിവസം കെ ടി ജലീൽ ടെൻഷൻ അടിക്കട്ടെ എന്നായിരുന്നു സ്വപ്നയുടെ അഭിഭാഷകൻ കൃഷ്ണരാജിന്റെ പരാമർശം.

കെ ടി ജലീൽ പരാതിയിൽ പറഞ്ഞിരിക്കുന്നത് ‘എന്നെ അപകീർത്തിപ്പെടുത്തി, സർക്കാരിനെ അപകീർത്തിപ്പെടുത്തി, മുഖ്യമന്ത്രിയെ അപകീർത്തിപ്പെടുത്തി’ എന്നാണ്. കെ.ടി ജലീലിനെ അപകീർത്തിപ്പെടുത്തിയത് എന്താണ് 164ൽ പറഞ്ഞിട്ടുള്ളത് എന്ന് സ്വപ്ന പറഞ്ഞിട്ടില്ല. എന്നാൽ പരാതി നൽകിയതിന്റെ പശ്ചാത്തലത്തിൽ കെ ടി ജലീലിന് അപമാനമുണ്ടാക്കിയ മൊഴി സ്വപ്ന വെളിപ്പെടുത്തുമെന്ന് അഭിഭാഷകൻ പറഞ്ഞു.

മിസ്റ്റർ കൃഷ്ണരാജ്, രണ്ടു ദിവസമല്ല, ഒരു നിമിഷം പോലും എനിക്ക് ടെൻഷൻ അടിക്കേണ്ടി വരില്ലെന്ന് പറഞ്ഞായിരുന്നു പോസ്റ്റ് തുടങ്ങുന്നത്.

Also Read : ‘എന്തൊക്കെ കേസ് കൊടുക്കുമെന്ന് കാണട്ടെ, രഹസ്യമൊഴി ഉടൻ പുറത്തുവിടും’; ജലീലിനെ വെല്ലുവിളിച്ച് സ്വപ്ന

ഖുർആനിൽ സ്വർണ്ണം കടത്തി എന്ന് ആദ്യം പറഞ്ഞു. ഖുർആൻ്റെ തൂക്കം പറഞ്ഞ് കുറേ കഥകൾ വേറെ മെനഞ്ഞു. ഖുർആൻ കയറ്റിയ വണ്ടിയുടെ ജി.പി.എസ് കേടുവന്നു എന്നും പറഞ്ഞ് കുറേ നടന്നു. പിന്നെ കേട്ടത് വണ്ടി ബാഗ്ലൂരിലേക്ക് പോയ വാർത്തയാണ്. ഈത്തപ്പഴത്തിൻ്റെ കുരുവാക്കി സ്വർണ്ണം കടത്തിയെന്നായി അടുത്ത പ്രചരണം. അതിനൊക്കെ തീർപ്പുണ്ടാക്കിയിട്ട് പോരേ പുതിയ വെളിപ്പെടുത്തൽ.

അഡ്വ: കൃഷ്ണരാജിനും സംഘികൾക്കും കപ്പം കൊടുത്ത് ജീവിക്കേണ്ട ഗതികേട് കൂരിപ്പറമ്പിൽ തെക്കുംപാട്ട് കുഞ്ഞിമുഹമ്മദാജിയുടെ മകൻ ജലീലിനില്ല.

എന്തും പറഞ്ഞോളൂ. ഏത് ഏജൻസികളെയും അന്വേഷണത്തിന് വിളിച്ചോളൂ. സൂര്യൻ കിഴക്കുദിക്കുന്നെടത്തോളം എനിക്കെന്ത് ടെൻഷൻ കൃഷ്ണരാജ്.

മിസ്റ്റർ കൃഷ്ണരാജ്, ഇലക്ട്രോണിക് യുഗമാണിത്. തെറ്റ് ചെയ്യാത്തവർക്ക് ലവലേശം ഭയപ്പാടിൻ്റെ കാര്യമില്ല. ഒരു അണുമണിത്തൂക്കം എന്തെങ്കിലും ഉണ്ടായിരുന്നെങ്കിൽ എന്നേ അതെല്ലാം നാട്ടിൽ പാട്ടാകുമായിരുന്നു. പലരെയും നിങ്ങൾ മിണ്ടാട്ടമില്ലാത്തവരാക്കിയത് ഇത്തരം ഓലപ്പാമ്പുകൾ കാട്ടിയാണ്.

മിസ്റ്റർ കൃഷ്ണരാജ്. എനിക്ക് സംരക്ഷിക്കാൻ കോടികളുടെ ആസ്തി ഇല്ല. എൻ്റെ കയ്യിൽ നികുതി കൊടുക്കാത്ത ഒരു രൂപയുടെ സമ്പാദ്യവുമില്ല. കണക്കിൽ പെടാത്ത ഒരു നയാപൈസ ഞാനെവിടെയും നിക്ഷേപിച്ചിട്ടുമില്ല. പിന്നെ ഞാൻ എന്തിന് ടെൻഷൻ അടിക്കണം? എന്നും അദ്ദേഹം ചോദിക്കുന്നു.

Also Read : ലൈംഗിക അതിക്രമം ചെറുത്ത സ്ത്രീയുടെ മുഖത്ത് 118 സ്റ്റിച്ചുകൾ; ആക്രമണം പേപ്പർ കട്ടർ ഉപയോഗിച്ച്

മിസ്റ്റർ കൃഷ്ണരാജ്, ഞാനും കാത്തിരിക്കുന്നു. പലരെയും പോലെ. ആ തമാശ കേൾക്കാൻ. ബാക്കി തമാശക്ക് ശേഷം എന്നും പറഞ്ഞാണ് അദ്ദേഹത്തിന്റെ ഫേസ്ബുക്ക് പോസ്റ്റ് അവസാനിപ്പിക്കുന്നത്.