സൗദിയില്‍ പോലീസ് ചമഞ്ഞ് പ്രവാസികളെ കൊള്ളചെയ്യുന്ന സംഘം പിടിയില്‍

റിയാദ്: സൗദി തലസ്ഥാനത്ത് സുരക്ഷാ ഉദ്യോഗസ്ഥര്‍ ചമഞ്ഞ് പ്രവാസികളെ കൊള്ള ചെയ്യുന്ന മൂന്നംഗ സംഘത്തെ സൗദി പോലീസ് അറസ്റ്റ് ചെയ്തു. പ്രവാസി ജീവനക്കാര്‍ തമാസിക്കുന്ന രണ്ട് വീടുകളില്‍ സുരക്ഷാ ഉദ്യോഗസ്ഥരെന്ന വ്യാജേനയാണ് സംഘം അതിക്രമിച്ചു കയറി പണവും മൊബൈല്‍ ഫോണുകള്‍ ഉള്‍പ്പെടെയുള്ള വിലപിടിപ്പുള്ള സാധനങ്ങളും കൊള്ള ചെയ്യുകയായിരുന്നു. ഇവര്‍ നല്‍കിയ പരാതിയുടെ അടിസ്ഥാനത്തില്‍ പോലിസ് നടത്തിയ അന്വേഷണത്തിലാണ് മൂന്നംഗം സംഘം പിടിയിലായത്.



സംഘത്തിലെ രണ്ടു പേര്‍ സൗദി പൗരന്‍മാരും ഒരാള്‍ സുഡാന്‍ പൗരനുമാണെന്ന് പോലീസ് പറഞ്ഞു. സുഡാന്‍ പൗരന്‍ അനധികൃതമായി സൗദിയില്‍ താമസിക്കുന്ന ആളാണെന്നും പോലീസ് അറിയിച്ചു. ഇതേ രീതിയില്‍ മറ്റിടങ്ങളിലും സംഘം കൊള്ള നടത്തിയതായി ചോദ്യം ചെയ്യലില്‍ പ്രതികള്‍ സമ്മതിച്ചതായി റിയാദ് പോലീസ് വക്താവ് മേജര്‍ ഖാലിദ് അല്‍ കറൈദിസ് അറിയിച്ചു.

Also Read: എമിഗ്രഷന്‍ ഉദ്യോഗസ്ഥയ്ക്ക് കൈക്കൂലി; കുവൈറ്റില്‍ പ്രവാസിക്കും അഭിഭാഷകനും തടവ്

സുരക്ഷാ ഏജന്‍സികളുടേതെന്ന് തോന്നിപ്പിക്കുന്ന സംവിധാനങ്ങളും സജ്ജീകരണങ്ങളും ഉപയോഗിച്ചാണ് ഇവര്‍ പ്രവാസി തൊഴിലാളികളുടെ താമസസ്ഥലങ്ങളില്‍ പരിശോധന നടത്താനെന്ന വ്യാജേന കയറിച്ചെല്ലുന്നത്. തുടര്‍ന്ന് പണവും വിലപിടിച്ച വസ്തുക്കളും പിടിച്ചുപറിച്ച് രക്ഷപ്പെടുകയായിരുന്നു. തലസ്ഥാന നഗരിയിലെ വിവിധ ജില്ലകളില്‍ ഈ രീതിയില്‍ 11 പിടിച്ചുപറികള്‍ സംഘം നടത്തിയതായി പോലിസ് കണ്ടെത്തിയിട്ടുണ്ട്.

ആകെ 1,81,000 റിയാലാണ് സംഘം തട്ടിയെടുത്തത്. പണവും മൊബൈല്‍ ഫോണ്‍ ഉള്‍പ്പെടെയുള്ള വിലപിടിപ്പുള്ള സാധനങ്ങള്‍ സംഘത്തില്‍ നിന്ന് പോലിസ് പിടികൂടി. പ്രതികളെ നിയമ നടപടികള്‍ക്കായി പബ്ലിക് പ്രൊസിക്യൂഷന് കൈമാറിയിരിക്കുകയാണെന്നും പോലിസ് അറിയിച്ചു.