അഞ്ച് വട്ടം മര്‍ദ്ദിച്ചു, മരിച്ച ദിവസം മര്‍ദ്ദിച്ചിട്ടില്ലെന്ന് മൊഴി; കിരണിന്റെ തെളിവെടുപ്പ് പുരോഗമിക്കുന്നു

കൊല്ലം: വിസ്മയ കേസിൽ മൊഴി ആവര്‍ത്തിച്ച് പ്രതി കിരൺ കുമാര്‍. വിസ്മയയെ ക്രൂരമായി മര്‍ദിച്ചിരുന്നുവെന്നത് പ്രതി സമ്മതിച്ചു. വിവാഹത്തിന് ശേഷം അഞ്ച് വട്ടം മര്‍ദ്ദിച്ചിരുന്നതായി കിരണ്‍ പറഞ്ഞു. അതേസമയം, മരിച്ച ദിവസം മര്‍ദ്ദനമുണ്ടായിട്ടില്ലെന്നും കിരൺ മൊഴി നൽകി.



ഇന്ന് മരണം നടന്ന വീട്ടില്‍ കിരണിനെ എത്തിച്ച് തെളിവെടുപ്പ് നടന്നു.

അതേസമയം, മദ്യപിച്ചതിന് ശേഷം കിരണിന്റെ സ്വഭാവത്തിനുണ്ടാകുന്ന മാറ്റത്തെക്കുറിച്ച് പോലീസ് മനശാസ്ത്രജ്ഞരുടെ അഭിപ്രായം തേടിയിട്ടുണ്ട്. വിഷയത്തിൽ വിസ്മയയുടെയും സുഹൃത്തുക്കളുടേയും ചില ബന്ധുക്കളുടേയും രഹസ്യമൊഴി അന്വേഷണ സംഘം രേഖപ്പെടുത്തിയിട്ടുണ്ട്.

വിസ്മയയുടെ സ്വർണാഭരണങ്ങൾ സൂക്ഷിച്ചിരിക്കുന്ന ബാങ്ക് ലോക്കർ ഇന്ന് തുറന്ന് പരിശോധന നടത്തും. കിരണിനെ ശാസ്താം നടയിലെ വീട്ടിൽ എത്തിച്ചുള്ള തെളിവെടുപ്പ് പുരോഗമിക്കുകയാണ്.

വിസ്മയയുടേത് തൂങ്ങി മരണമാണെന്ന് പ്രതി പോലീസിനോട് ആവശ്യപ്പെട്ടു. അതേസമയം, ഏറെ നേരം വിസ്മയയെ കാണാതിരുന്നിട്ടും അന്വേഷിക്കാത്തത് എന്തെന്നതിനും ടവ്വലുമായി പെണ്‍കുട്ടി പോയത് കണ്ടോ എന്ന ചോദ്യത്തിനും കിരണ്‍ മറുപടി നല്‍കിയില്ല.

വിസ്മയയുടേത് ആത്മഹത്യയെന്ന് സൂചന നൽകുന്ന പോസ്റ്റ്മോർട്ടം റിപ്പോർട്ട് കിട്ടിയെങ്കിലും കൊലപാതകമോ ആത്മഹത്യയോ എന്ന അന്തിമ നിഗമനത്തിലേക്ക് പൊലീസ് ഇനിയും എത്തിയിട്ടില്ല.

പുലര്‍ച്ചെ മൂന്നരയ്ക്ക് വഴക്കുണ്ടായപ്പോള്‍ മാതാപിതാക്കള്‍ എത്തി ഇടപെട്ടു. ആ ദിവസം താന്‍ ഭാര്യയെ മര്‍ദിച്ചിട്ടില്ല. മൊബൈല്‍ ഫോണ്‍ അമിതമായി വിസ്മയ ഉപയോഗിക്കാറുണ്ടായിരുന്നുവെന്നും കിരൺ കുമാ‍ർ മൊഴി നൽകിയതായി ട്വിന്റിഫോർ റിപ്പോര്‍ട്ട് ചെയ്തു.

ഫോൺ ഉപയോഗത്തിന്റെ പേരില്‍ മൂന്ന് ഫോണുകള്‍ തല്ലി തകര്‍ത്തുവെന്നും ഇയാൾ മൊഴി നൽകിയിട്ടുണ്ട്. എന്നാല്‍ പിന്നീട് ഫോണ്‍ വാങ്ങി നല്‍കുകയും ചെയ്തുവെന്നാണ് കിരണിന്റെ മൊഴി.

കൂടുതല്‍ എതിര്‍പ്പുണ്ടായിരുന്നത് വിസ്മയയുടെ കുടുംബത്തോടാണ്. കാറിന്റെ കാര്യത്തില്‍ ഉള്‍പ്പെടെ കുടുംബം പല കാര്യങ്ങളിലും വിശ്വാസ വഞ്ചന കാട്ടിയതായും കിരൺ മൊഴി നൽകി.

തന്റെ എതിര്‍പ്പ് അവഗണിച്ച് വിസ്മയ സ്വന്തം കുടുംബത്തോട് അടുപ്പം കാണിച്ചതില്‍ കടുത്ത അമര്‍ഷമുണ്ടായിരുന്നു. ഇതാണ് പലപ്പോഴും മര്‍ദനത്തില്‍ കലാശിച്ചത്. വിസ്മയക്ക് സഹോദരന്റെ വിവാഹ സമയത്ത് സ്വര്‍ണം നല്‍കാത്തതും ഇതുകൊണ്ടായിരുന്നുവെന്നും ട്വന്റിഫോര്‍ റിപ്പോര്‍ട്ടിൽ പറയുന്നു.

90 ദിവസത്തിനകം കുറ്റപത്രം നൽകിയില്ലെങ്കിൽ കിരൺ ജാമ്യം നേടി പുറത്തിറങ്ങാനുള്ള സാധ്യത കണക്കിലെടുത്താണ് ഈ സമയപരിധിക്കകം തന്നെ കുറ്റപത്രം സമർപ്പിക്കണമെന്ന് ഐജി കർശന നിർദ്ദേശം നൽകിയത്.