Sumayya P | Samayam Malayalam | Updated: 29 Jun 2021, 02:11:11 PM
പൗരത്വത്തിനു വേണ്ടിയുള്ള അപേക്ഷയ്ക്ക് 600 റിയാലാണ് ചെലവ് വരിക. ഒമാന് പൗരന്റെ ഭാര്യയോ ഭര്‍ത്താവോ ആണ് അപേക്ഷിക്കുന്നതെങ്കില്‍ 300 റിയാല്‍ മതി.
പൗരത്വം ലഭിക്കാന്‍ നിബന്ധനകളേറെ
20 വര്‍ഷം ഒമാനില്‍ പ്രവാസിയായി കഴിയുന്നവര്‍ക്കാണ് പൗരത്വം അനുവദിക്കുക. അതോടൊപ്പം ഒമാന് പൗരത്വ നിയമപ്രകാരമുള്ള നിബന്ധനകള്‍ പാലിക്കുകയും വേണം. ഇതുമായി ബന്ധപ്പെട്ട നടപടി ക്രമങ്ങള്‍ പൂര്‍ത്തിയാക്കുകയും ആവശ്യമായ രേഖകള്‍ സമര്‍പ്പിക്കുകയും ചെയ്യണം. ആഭ്യന്തര മന്ത്രാലയമാണ് ഇതുമായി ബന്ധപ്പെട്ട തീരുമാനം എടുത്ത് ഭരണാധികാരിയുടെ അംഗീകാരത്തിനായി സമര്‍പ്പിക്കുക.
രേഖകള്‍ സഹിതം പൗരത്വത്തിന് അപേക്ഷിക്കാം
പൗരത്വം ലഭിക്കുന്നതിന് വേറെയും ചില മാനദണ്ഡങ്ങള്‍ പാലിക്കേണ്ടതുണ്ട്. പൗരത്വത്തിനു വേണ്ടിയുള്ള അപേക്ഷയ്ക്ക് 600 റിയാലാണ് ചെലവ് വരിക. ഒമാന് പൗരന്റെ ഭാര്യയോ ഭര്‍ത്താവോ ആണ് അപേക്ഷിക്കുന്നതെങ്കില്‍ 300 റിയാല്‍ മതി. ഒമാനില്‍ താമസിക്കുന്നതിനും ജോലി ചെയ്യുന്നതിനുമുള്ള തെളിവുകള്‍, തങ്ങള്‍ക്കെതിരേ കേസുകളൊന്നും നിലവിലില്ലെന്നതിനുള്ള രേഖ എന്നിവയും ഹാജരാക്കണം. മാരകമായ രോഗങ്ങളോ പകര്‍ച്ച വ്യാധികളോ ഇല്ലെന്നതിന് സര്‍ട്ടിഫിക്കറ്റും നല്‍കണം.
അറബി ഭാഷാ പരീക്ഷ പാസാവണം
അറബി ഭാഷാ പരീക്ഷ പാസാവണമെന്നതാണ് പൗരത്വം ലഭിക്കുന്നതിനുള്ള മറ്റൊരു നിബന്ധന. എഴുത്ത് പരീക്ഷയായോ ഇന്റര്‍വ്യൂ ആയോ ആണ് അറബി പരീക്ഷ നടത്തുക. ഇതില്‍ പരാജയപ്പെട്ടാല്‍ നാല് അവസരങ്ങള്‍ കൂടി ലഭിക്കും. ഒമാനി പൗരത്വം ലഭിച്ചവര്‍ക്ക് ആഭ്യന്തര മന്ത്രാലയത്തില്‍ നിന്ന് ഒമാനി പാസ്‌പോര്‍ട്ട് സ്വന്തമാക്കാം. പൗരത്വം ലഭിച്ച പ്രവാസികള്‍ക്കൊപ്പം അവരുടെ ചെറിയ മക്കള്‍ക്കും പാസ്‌പോര്‍ട്ട് സ്വമേധയാ ലഭിക്കും.
ആറ് മാസത്തില്‍ കൂടുതല്‍ ഒമാന് പുറത്തു കഴിയരുത്
ഒമാന് പൗരത്വം ലഭിച്ച ശേഷം പാലിക്കേണ്ട നിബന്ധനകളും ഏറെയുണ്ട്. രാജ്യത്തിന് പുറത്ത് ഒന്നിച്ച് ആറു മാസത്തില്‍ കൂടുതല്‍ കഴിയാന്‍ പാടില്ലെന്നതാണ് അവയിലൊന്ന്. പൗരത്വം ലഭിച്ച ശേഷമുള്ള ആദ്യ 10 വര്‍ഷത്തേക്കാണ് ഈ നിബന്ധന ബാധകമാവുക. ആറു മാസത്തില്‍ കൂടുതല്‍ രാജ്യത്തിന് പുറത്തു കഴിയണമെങ്കില്‍ ആഭ്യന്തര മന്ത്രാലയത്തിന്റെ മുന്‍കൂര്‍ അനുമതി വാങ്ങണം. 200 റിയാല്‍ നല്‍കി പൗരത്വം തിരികെ ഏല്‍പ്പിക്കാനും സംവിധാനമുണ്ട്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : 30 more expats granted citizenship oman
Malayalam News from malayalam.samayam.com, TIL Network
