കൊച്ചി മെട്രോ അഞ്ച് വർഷം തികയ്ക്കുമ്പോൾ നഗരത്തിൻ്റെ കൂടുതൽ മേഖലകളിലേയ്ക്ക് സർവീസ് എത്തിക്കാൻ മെട്രോ നിയോ പോലുള്ള മാർഗങ്ങൾ വേണ്ടി വന്നേക്കും.
മെട്രോ നിയോയുടെ രേഖാചിത്രം Photo: NBT
ഹൈലൈറ്റ്:
- ട്രാക്കിനു പകരം റബർ ടയറുകൾ
- ചെലവ് നാലിലൊന്നു മാത്രം
- സാമ്പത്തിക ബാധ്യത കുറവ്
കൊച്ചിയിൽ നിലവിലുള്ള മെട്രോയെക്കാളും ലൈറ്റ് മെട്രോയെക്കാളും ചെലവ് കുറഞ്ഞ സംവിധാനമാണ് മെട്രോ നിയോ. സാധാരണ മെട്രോയുടെ നാലിലൊന്ന് മാത്രമാണ് മെട്രോ നിയോയുടെ നിര്‍മാണച്ചെലവ്. ഇതിനോടകം മഹാരാഷ്ട്രയിലെ നാഷിക്കിൽ പദ്ധതി നടപ്പാക്കാൻ കേന്ദ്രസര്‍ക്കാര്‍ അനുമതി നല്‍കിയിട്ടുണ്ട്. മെട്രോ നിയോ സംവിധാനം കൊച്ചിയിലും അവതരിപ്പിക്കാനുള്ള നീക്കത്തിലാണ് കെഎംആര്‍എൽ എന്ന് മാനേജിങ് ഡയറക്ടര്‍ ലോക്നാഥ് ബെഹ്റ പറയുന്നു.
എന്താണ് മെട്രോ നിയോ?
യൂറോപ്യൻ രാജ്യങ്ങളിൽ അടക്കം നിലവിലുള്ള ട്രോളി ബസ് സംവിധാനത്തെയാണ് കേന്ദ്ര നഗര പാർപ്പിടകാര്യ മന്ത്രാലയം മെട്രോ നിയോ എന്ന് വിളിക്കുന്നത്. സാധാരണ ട്രെയിനുകൾക്ക് സമാനമായ സാങ്കേതികവിദ്യയാണ് മെട്രോ റെയിലിൽ ഉപയോഗിക്കുന്നതെങ്കിൽ മെട്രോ നിയോ കോച്ചുകൾക്ക് ഇലക്ട്രിക് ബസുകളോടാണ് സാമ്യം. രണ്ട് കോച്ചുകളടങ്ങിയ വെസ്റ്റിബ്യൂൾ ലോഫ്ലോർ ബസുകളാണ് മെട്രോ നിയോ സംവിധാനത്തിൽ ഉപയോഗിക്കുക. റബർ ടയറുകളിൽ ഓടുന്ന നിയോയ്ക്ക് റെയിൽവേ ട്രാക്കുകളുടെ ആവശ്യമില്ല. വീതിയുള്ള റോഡുകളാണെങ്കിൽ സാധാരണ റോഡിൽ പ്രത്യേകം ട്രാക്ക് അടയാളപ്പെടുത്തിയാൽ മാത്രം മതിയാകും. റോഡുനിരപ്പിൽ തന്നെ സ്റ്റേഷനുകളും ഒരുക്കാം. കൊച്ചി പോലെ തിരക്കേരിയ നഗരങ്ങളിൽ അത് സാധ്യമാകണമെന്നില്ല. മെട്രോ വയഡക്ട് പോലുള്ള മേൽപ്പാല വേണ്ടി വരുമെങ്കിലും താരതമ്യേന ലളിതമായ സിഗ്നലിങും സ്റ്റേഷൻ രൂപകൽപനയും ചെലവ് പിടിച്ചു നിര്‍ത്താൻ സഹായിക്കും. കോച്ചുകളുടെ വിലയിലും വലിയ കുറവുണ്ടെന്ന് കേന്ദ്ര മന്ത്രാലയത്തിൻ്റെ രേഖകൾ വ്യക്തമാക്കുന്നു.
കൊച്ചിയിലെ പദ്ധതി ഇങ്ങനെ
കാക്കനാട് റൂട്ട് കൂടി യാഥാ‍ര്‍ഥ്യമായാൽ നിലവിലുള്ള മെട്രോ പാതയിലെ അവസാന സ്റ്റേഷനായ തൃപ്പൂണിത്തുറയും പുതിയ പാതയിലെ ഇൻഫോപാര്‍ക്ക് സ്റ്റേഷനെയും ബന്ധിപ്പിച്ച് സര്‍ക്കുലാര്‍ രീതിയിൽ സര്‍വീസ് നടത്താനാണ് കെഎംആര്‍എൽ പദ്ധതിയിടുന്നത്. ആറ് കിലോമീറ്റര്‍ വരുന്ന ഈ പാതയിൽ മെട്രോ നിയോ നടപ്പാക്കാനാണ് പദ്ധതിയെന്ന് ലോക്നാഥ് ബെഹ്റ പറയുന്നു. ഇതു കൂടാതെ എംജി റോഡ് സ്റ്റേഷനിൽ നിന്ന് തുടങ്ങി ബാനര്‍ജി റോഡിലൂടെ ഹൈക്കോര്‍ട്ട് കവലയെയും ബോട്ട് ജെട്ടിയെയും ഹോസ്പിറ്റൽ റോഡിനെയും ബന്ധിപ്പിച്ചു എംജി റോഡിൽ തിരിച്ചെത്തുന്ന ലൂപ് പാതയ്ക്കും മെട്രോ നിയോ നടപ്പാക്കാൻ കെംഎംആര്‍എലിനു പദ്ധതിയുണ്ട്. ഇതിനായുള്ള പ്രാരംഭ പഠനങ്ങള്‍ പൂര്‍ത്തിയാക്കി. വീതി കുറഞ്ഞ പാതകളിൽ മെട്രോയ്ക്ക് സമാനമായി മേൽപ്പാത വേണ്ടി വന്നേക്കും.
Also Read: ഇടിമിന്നലിനൊപ്പം കാറ്റും മഴയും ശക്തമാകും; ഈ ജില്ലകളിൽ യെല്ലോ അലേർട്ട്, മുന്നറിയിപ്പ്
“യൂറോപ്പിലെ ട്രോളി ബസ് സംവിധാനം പോലെയാണ് മെട്രോ നിയോ. റോഡ് നിരപ്പിൽ മെട്രോ നിയോ പദ്ധതി നടപ്പാക്കാൻ ഒരു കിലോമീറ്ററിന് 35 കോടി രൂപയാണ് ചെലവ്. മേൽപ്പാതയെങ്കിൽ 60 കോടി വേണ്ടി വരും. ഒരു കിലോമീറ്റര്‍ സാധാരണ മെട്രോ നിര്‍മിക്കുന്ന തുക കൊണ്ട് നാല് കിലോമീറ്റര്‍ മെട്രോ നിയോ പാത തയ്യാറാക്കാനാകും.” ബെഹ്റ ദി ഹിന്ദു ദിനപത്രത്തിന് നൽകിയ അഭിമുഖത്തിൽ വ്യക്തമാക്കി.
ബാനര്‍ജി റോഡ് പോലെ അധികം വീതിയില്ലാത്ത റോഡുകളിൽ നിലവിലെ റോഡിനു മുകളിലൂടെയായിരിക്കും മെട്രോ നിയോ കടന്നു പോകുക. എന്നാൽ ഹൈക്കോര്‍ട്ട് മുതൽ മേനക വരെ വീതിയുള്ള ഭാഗങ്ങളിൽ നിലവിലെ റോഡ് നിരപ്പിൽ മീഡിയനോടു ചേര്‍ന്നും മെട്രോ നിയോ കടന്നു പോകുമെന്ന് കൊച്ചി മെട്രോ എംഡി പറയുന്നു.
കുറഞ്ഞ ചെലവ് തന്നെയാണ് മെട്രോ നിയോ മാര്‍ഗത്തിലേയ്ക്ക് കൊച്ചി മെട്രോയെ ആകര്‍ഷിക്കുന്നത്. കാക്കനാട് തൃപ്പൂണിത്തുറ റൂട്ടിൽ സാധാരണ മെട്രോ നിര്‍മിക്കാൻ 1500 കോടി രൂപ ചെലവ് വരുമ്പോൾ മെട്രോ നിയോയ്ക്ക് ചെലവ് 360 കോടി മാത്രമാണ്. ഇതിനോടകം തന്നെ കൊച്ചി മെട്രോ അധികൃതര്‍ മേനക വഴിയുള്ള നിയോ പദ്ധതിയുടെ ബ്ലൂ പ്രിൻ്റ് തയ്യാറാക്കിയിട്ടുമുണ്ട്. അടുത്ത കെഎംആര്‍എൽ ബോര്‍ഡ് യോഗത്തിൽ ഇത് അവതരിപ്പിക്കും.
കൊച്ചിയ്ക്ക് കൂടുതൽ ചേര്‍ച്ച മെട്രോ നിയോയോ?
10 ലക്ഷത്തിൽ കൂടുതൽ ജനസംഖ്യയുള്ള നഗരങ്ങളിലാണ് കേന്ദ്രസര്‍ക്കാര്‍ മെട്രോ പദ്ധതിയ്ക്ക് അനുമതി നല്‍കുന്നത്. എന്നാൽ കൊച്ചി കോര്‍പ്പറേഷനു പുറമെ ആലുവ അടക്കമുള്ള സമീപനഗരങ്ങള്‍ കൂടി പരിഗണിച്ചാണ് കൊച്ചി മെട്രോയുടെ ആദ്യഘട്ടത്തിന് അനുമതി ലഭിച്ചത്. എന്നാൽ കാക്കനാട്ടേയ്ക്കുള്ള പുതിയ പാതയ്ക്ക് ഇനിയും കേന്ദ്ര മന്ത്രിസഭയുടെ അനുമത ലഭിച്ചിട്ടില്ല. ഈ സാഹചര്യത്തിൽ ഇനി വരാനിരിക്കുന്ന റൂട്ടുകളിൽ മെട്രോ നിയോ പോലുള്ള പദ്ധതികൾ പരിഗണിക്കാൻ കെഎംആര്‍എൽ നിര്‍ബന്ധിതരാകും.
സാധാരണ മെട്രോയിൽ മണിക്കൂറിൽ പതിനയ്യായിരത്തോളം യാത്രക്കാരെങ്കിലും വേണം സര്‍വീസ് ലാഭകരമാകാൻ. ലൈറ്റ് മെട്രോയ്ക്ക് ആകട്ടെ പതിനായിരത്തിനു മുകളിൽ യാത്രക്കാര്‍ മതി. എന്നാൽ മണിക്കൂറിൽ പതിനായിരത്തിൽ താഴെ യാത്രക്കാരാണ് ഉള്ളതെങ്കിലും മെട്രോ നിയോ നടത്തിക്കൊണ്ടു പോകാനാകും. ചെറുദൂരങ്ങളിൽ പാതയിൽ ഓവര്‍ഹെഡ് വൈദ്യുത ലൈനുകള്‍ ഇല്ലെങ്കിലും ബാറ്ററി വഴിയും മെട്രോ നിയോ പ്രവര്‍ത്തിപ്പിക്കാം.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
Web Title : what is metro neo proposed by kmrl to be implemented in new routes of kochi metro
Malayalam News from Samayam Malayalam, TIL Network
