നമ്മളിൽ ‘സർ’ എന്ന് വിളിക്കാത്ത ഒരാൾ പോലുമുണ്ടാകില്ല. ‘സർ’ എന്ന വാക്കിനെ മലയാളീകരിച്ച് സാറേ എന്നാക്കി ഗവണ്മെന്റ് ജീവനക്കാരുടെയും മറ്റ് ഉദ്യോഗസ്ഥ വൃന്ദങ്ങളുടെയും മുന്നിൽ പലപ്പോഴും വിധേയത്വത്തോടെ നിന്നിട്ടുള്ളവരായിരിക്കും പലരും. അതിന്റെ അർത്ഥതലങ്ങൾ അറിഞ്ഞും അറിയാതെയുമുള്ള വിളികൾ ഒരു കൊളോണിയൽ കാലഘട്ടത്തിന്റെ ഓർമകളാണ് കൊണ്ടുനടക്കുന്നത്.
ബ്രിട്ടീഷ് അധിനിവേശ കാലത്തിന്റെ പ്രഭുത്വം നിറഞ്ഞുനിൽക്കുന്ന ഇത്തരം വാക്കുകൾ ഒരു ജനാധിപത്യ രാജ്യത്തെ ജനങ്ങൾ പിന്തുടരേണ്ടതില്ല എന്ന് തിരിച്ചറിവുണ്ടാകേണ്ടതുണ്ട്. സർ എന്ന പദം നാം തിരസ്കരിക്കേണ്ട കാലമായിരിക്കുന്നു.
നമ്മുടെ രാജ്യത്ത് നമ്മുടെ ഭരണഘടന നമുക്ക്‌ വേണ്ടി വിഭാവനം ചെയ്തത് വിധേയത്വമോ അധികാര പ്രഭുത്വമോ അല്ല, തുല്യതയാണ്. അതുകൊണ്ടുതന്നെ നാം അറിഞ്ഞും അറിയാതെയും പ്രയോഗിച്ചുപോരുന്ന സർ വിളികൾ നിർത്താനുള്ള സമയം അതിക്രമിച്ചിരിക്കുന്നു.
യൂറോപ്യൻ ഏകധിപതികളെ വിശേഷിപ്പിക്കാൻ ഉപയോഗിക്കുന്ന പദമായിട്ടായിരുന്നു ‘സർ’ ഉപയോഗിച്ചുകൊണ്ടിരുന്നത്. ചക്രവർത്തി എന്ന അർത്ഥം വരുന്ന കൈസർ എന്ന ലാറ്റിൻ വാക്കിൽ നിന്നുമാണ് ‘സാർ’ എന്ന വാക്ക് ഉണ്ടായതെന്ന് പറയപ്പെടുന്നു. പത്തൊമ്പതാം നൂറ്റാണ്ടിൽ യൂറോപ്യൻ പ്രദേശങ്ങളിൽ നിർമ്മിക്കപ്പെട്ട ബൈബിൾ പരിഭാഷകളിൽ സർ എന്നതിന് രാജാവ് എന്ന വിശേഷണം കൽപ്പിച്ചിരുന്നു. സ്ലാവിക് ഭാഷകളിലും സർ എന്ന പദം ബൈസാനിയാൻ, റോമൻ സാമ്രാജ്യങ്ങളിലെ ചക്രവർത്തിമാരെ പരാമർശിക്കാനും ബൈബിളിലെ പുരാതന രാജാക്കന്മാരെ പരാമർശിക്കാനും ഉപയോഗിച്ചിരുന്നു.
മാറ്റം തുടങ്ങിക്കഴിഞ്ഞിട്ടുണ്ട്. കേരളത്തിലെ ചില നഗരസഭകളും പഞ്ചായത്തുകളും സ്കൂളുകളും സർ വിളികൾ വേണ്ട എന്ന വിപ്ലവകരമായ തീരുമാനങ്ങളിൽ എത്തിച്ചേർന്നിട്ടുണ്ട്.
–
‘കിങ്’ എന്ന വാക്കിനെ കിഴക്കൻ യൂറോപ്പുകാർ ഒരു വിദേശ വാക്കായി കണക്കാക്കുന്നത് കൊണ്ടുതന്നെ സെർബിയൻ ക്രൊയേഷ്യൻ ബോസ്നിയൻ ഭാഷകളിലായി സാർ എന്നത് അതിന് തുല്യ പദമായാണ് ഉപയോഗിക്കുന്നത്. 1940-കളിൽ ബാർബിയുടെ രാജഭരണം അവസാനിക്കുന്ന കാലത്തോളം വരെ സർ എന്നത് ഇവിടെ ഭരണാധികാരി എന്ന് സൂചിപ്പിക്കാൻ ഉപയോഗിച്ചിരുന്നു. ഇതുകൂടാതെ സാർ എന്നത് യുണൈറ്റഡ് കിങ്ഡം നൽകുന്ന ഒരു സിവിലിയൻ ബഹുമതി കൂടിയാണ്. മൂന്നുതരം സിവിലിയൻ പദവികൾ നൽകുന്ന യുണൈറ്റഡ് കിങ്ഡത്തിന്റെ മൂന്നാമത്തെ ബഹുമതിയായ ഷിവാൽറിക് ഓർഡേർഡ് എന്ന വിഭാഗത്തിന്റെ നൈറ്റ് കമാന്റ് ഓഫ് ദി ഓർഡർ ഓഫ് ദി ബ്രിട്ടീഷ് എമ്പയർ എന്ന പദവി നൽകുന്ന ആളിനെ ആണ് പേരിനു മുന്നിൽ സർ എന്ന് അഭിസംബോധന ചെയ്യുന്നത്.
സർ എന്നാൽ, സ്ലേവ് ഐ റിമൈൻ എന്നാണ് എന്ന് ഒരുകൂട്ടർ പറയുന്നുണ്ടെങ്കിലും ആ വാദത്തിന് ആധികാരികതയോ ചരിത്രപിൻബലമോ ഇല്ല. എങ്കിലും മേൽപ്പറഞ്ഞ എല്ലാ കാര്യങ്ങളിൽ നിന്നും ഒന്ന് വ്യക്തമാണ്, രാജഭരണത്തിന്റെയും ഫ്യൂഡൽ വ്യവസ്ഥിതിയുടെയും ഭാഗമാകുന്ന ഒരു വാക്ക് തന്നെയാണ് സർ എന്നത്.
ജനങ്ങൾ തിരഞ്ഞെടുക്കുന്ന സർക്കാർ ഉള്ള ഈ രാജ്യത്ത് ആ സർക്കാറിന് വേണ്ടി ജോലി ചെയ്യുന്നവരെ പോലും വീണ്ടും സാർ എന്ന് വിളിക്കേണ്ടി വരുന്ന അവസ്ഥ തികച്ചും തിരുത്തപ്പെടേണ്ടുന്നത് തന്നെയാണ്.
ജനങ്ങളും ജനസേവകരും തമ്മിൽ ഉണ്ടാവണം എന്ന് കൊളോണിയൽ ശക്തികൾ കരുത്തിയിരുന്ന ഒരു അധികാരക്രമത്തിന്റെ ബാക്കിപത്രം മാത്രമാണ് ഈ സർ വിളി. അവർ ഇവിടുന്ന് പിൻമടങ്ങി പോയിട്ട് 75 വർഷങ്ങൾ കഴിഞ്ഞിട്ടും ഇന്നും തുടരുന്ന ഇതുപോലുള്ളവ മാറ്റപ്പെടുമ്പോളാണ് ഒരു ജനാധിപത്യപത്യ രാജ്യത്തിനു തിളക്കം കൂടുക.
മാറ്റം തുടങ്ങിക്കഴിഞ്ഞിട്ടുണ്ട്. കേരളത്തിലെ ചില നഗരസഭകളും പഞ്ചായത്തുകളും സ്കൂളുകളും സർ വിളികൾ വേണ്ട എന്ന വിപ്ലവകരമായ തീരുമാനങ്ങളിൽ എത്തിച്ചേർന്നിട്ടുണ്ട്. പകരം സ്വന്തം പേരോ തസ്തിക പേരോ വിളിച്ചാൽ മതിയെന്നും തീരുമാനിച്ചിട്ടുണ്ട്.
യാതൊരു ഭയമോ ആശങ്കയോ ഇല്ലാതെ ആധികാരികതയോടെ ഏവർക്കും പരസ്പരം അഭിസംബോധന ചെയ്യാണ കഴിയേണ്ട രാജ്യത്ത് സർ എന്ന വിളി തീർത്തും അശ്ലീലം തന്നെയാണ്.
