സ്വാതന്ത്ര്യാനന്തരം ഇന്ത്യ പരമാധികാര റിപ്പബ്ലിക്കായതോടെ രാജ്യത്തെ രാജഭരണത്തിനും ഫ്യൂഡല്‍ വ്യവസ്ഥിതിക്കും കൂടിയാണ് തിരശ്ശീല വീണത്. പ്രിവി പേഴ്‌സ് എന്ന പേരില്‍ സ്വാതന്ത്ര്യാനന്തരം രാജകുടുംബങ്ങള്‍ക്ക് നല്‍കിയിരുന്ന ആനുകൂല്യങ്ങള്‍ ഇന്ദിരാഗാന്ധി നിര്‍ത്തലാക്കിയത് രാജഭക്തിക്ക് മേല്‍ തറച്ച അവസാന ആണിക്കല്ലായി കരുതിയവരും ചെറുതായിരുന്നില്ല. എന്നാല്‍ കാലക്രമേണ അഗ്രഹാരങ്ങളിലെയും അരമനകളിലെയും ചെറുതല്ലാത്ത വോട്ടുവിഹിതത്തില്‍ കണ്ണുനട്ട് പഴയ രാജഭക്തിയിലേക്ക് തന്നെ ചില രാഷ്ട്രീയ പാര്‍ട്ടികളും ഭരണകൂടവും നടന്നുനീങ്ങിയതാണ് പിന്നീടങ്ങോട്ട് കണ്ടത്.
രാജാധികാരത്തില്‍ നിന്ന് രാഷ്ട്രീയത്തിന്റെ അകത്തളങ്ങളിലേക്ക്
വസുന്ധര രാജ സിന്ധ്യ, ജ്യോതിരാജ സിന്ധ്യ, മാധവ റാവു, വിജയരാജ സിന്ധ്യ തുടങ്ങിയ പേരുകള്‍ ഇന്ത്യന്‍ രാഷ്ട്രീയത്തില്‍ വിവിധ രാഷ്ട്രീയ പാര്‍ട്ടികളുടെ ചിഹ്നങ്ങള്‍ക്ക് മുകളിലായി തെളിഞ്ഞു നിന്നവയായിരുന്നു. ഗ്വാളിയോര്‍ രാജകുടുംബത്തിന്റെ ഭാഗമായിരുന്നവരായിരുന്നു ഇവരില്‍ ഭൂരിഭാഗവും. വിസ്മരിച്ചു പോകേണ്ടിയിരുന്ന തങ്ങളുടെ പൂര്‍വകാല രാജാധികാരത്തെ ജനാധിപത്യ രാഷ്ട്രീയ പ്രവര്‍ത്തനത്തിലേക്ക് നുഴഞ്ഞുകയറാനായി ഉപയോഗപ്പെടുത്തിയവരുടെ പേരുകള്‍ ഇനിയും അനവധിയാണ്. രാജസ്ഥാനിലെ ആദ്യത്തെ വനിതാ മുഖ്യമന്ത്രിയായ വസുന്ധര രാജ സിന്ധ്യ 2013ല്‍ വീണ്ടും മുഖ്യമന്ത്രിയായി തെരഞ്ഞെടുക്കപ്പെട്ടു എന്നത് മറ്റൊരു ചരിത്രം. ഒഡീഷയില്‍ നിന്നുള്ള ബിജു ജനതാദള്‍ നേതാവ് കലികേഷ് സിംഗ്, മൈസൂര്‍ രാജാവ് എസ്.ഡി.എന്‍.ആര്‍ വടയാര്‍ തുടങ്ങിയ പേരുകളും കൊട്ടാരത്തിന്റെ അകത്തളങ്ങളില്‍ നിന്നും ഇന്ത്യന്‍ രാഷ്ട്രീയത്തില്‍ അരക്കിട്ടുറപ്പിച്ചവരുടേതാണ്.
കേരളത്തിലെ സവിശേഷ സാഹചര്യം
ഉത്തരേന്ത്യന്‍ സംസ്ഥാനങ്ങളിലേതുപോലെ അനുകൂലമായ ഒരു രാഷ്ട്രീയ സാഹചര്യമായിരുന്നില്ല കേരളത്തില്‍. കവടിയാര്‍ കൊട്ടാരവും ഹില്‍ പാലസും കനകക്കുന്ന കൊട്ടാരവും കടന്ന് ജനാധിപത്യത്തിന്റെ ഉത്സവാഘോഷങ്ങളിലേക്ക് അവരുടെ ദൃഷ്ടികള്‍ ചെന്നെത്തിയിരുന്നില്ല. അക്കാലത്തെ സാമൂഹ്യ രാഷ്ട്രീയ സാഹചര്യങ്ങളും അതിന് കാരണമായിത്തീര്‍ന്നിരിക്കാം. എന്നാല്‍ ഇന്ദിരാ ഗാന്ധിയെടുത്ത വിപ്ലവകരമായ നടപടിക്ക് മേല്‍ വെള്ളം ചേര്‍ക്കുന്ന സമീപനമാണ് ഇങ്ങ് കേരളത്തില്‍ അവരുടെ പിന്‍മുറക്കാര്‍ സ്വീകരിച്ചത്. രാജാധികാരത്തോട് എന്നും വിധേയത്വം പുലര്‍ത്തുന്ന നിലപാട് തന്നെയാണ് കേരളത്തില്‍ മാറി മാറി വന്ന സര്‍ക്കാരുകള്‍ സ്വീകരിച്ചത്.
തിരുവനന്തപുരം ജില്ലയിലെ ഭൂരിഭാഗം ജനങ്ങളും പ്രത്യേകമായൊരു രാജഭക്തി വെച്ചുപുലര്‍ത്തുന്നവരാണ്. ഈ നിലപാടിനെ അധികം മുഷിപ്പിക്കാത്ത സമീപനമാണ് ജില്ലയില്‍ രാഷ്ട്രീയ പാര്‍ട്ടികളും സ്വീകരിക്കുന്നത്. ഉത്രാടം തിരുന്നാള്‍ മാര്‍ത്താണ്ഡവര്‍മ്മ മരിക്കുന്നത് വരെ തിരുവനന്തപുരത്തെത്തുന്ന ഏതൊരു രാഷ്ട്രീയ നേതാവും അദ്ദേഹത്തെ കാണാതെ തിരിച്ചു പോയിരുന്നില്ല. നരേന്ദ്ര മോദി ഉള്‍പ്പെടെ ആ പതിവ് മുടക്കിയിരുന്നില്ല. ഇതിന്റെയെല്ലാം ബാക്കി പത്രമാണ് 2013ല്‍ രാജകുടുംബാംഗങ്ങള്‍ക്കായി പെന്‍ഷന്‍ അനുവദിക്കാനുള്ള തീരുമാനം.
വിട്ടുനല്‍കലിന്റെയും ത്യാഗങ്ങളുടെയും കണക്കുകള്‍ ചൂണ്ടിക്കാട്ടി തങ്ങള്‍ക്ക് ന്യായമായും ലഭിക്കേണ്ട ആനുകൂല്യങ്ങള്‍ സംബന്ധിച്ച രാജകുടുംബത്തിന്റെ നിരവധി അഭ്യര്‍ത്ഥനകള്‍ സെക്രട്ടറിയേറ്റിന്റെ പടി കടന്ന് ചെന്നിട്ടുണ്ട്.
–
ഇന്ദിരാ ഗാന്ധി അവസാനിപ്പിച്ചത് പെന്‍ഷനിലൂടെ നടപ്പിലാക്കി ഉമ്മന്‍ ചാണ്ടി
വിട്ടുനല്‍കലിന്റെയും ത്യാഗങ്ങളുടെയും കണക്കുകള്‍ ചൂണ്ടിക്കാട്ടി തങ്ങള്‍ക്ക് ന്യായമായും ലഭിക്കേണ്ട ആനുകൂല്യങ്ങള്‍ സംബന്ധിച്ച രാജകുടുംബത്തിന്റെ നിരവധി അഭ്യര്‍ത്ഥനകള്‍ സെക്രട്ടറിയേറ്റിന്റെ പടി കടന്ന് ചെന്നിട്ടുണ്ട്. രാജകുടുംബാംഗങ്ങള്‍ക്ക് പ്രിവി പേഴ്‌സ് എന്ന പേരില്‍ ഉദാരമായി ലഭിച്ചിരുന്ന പല സൗകര്യങ്ങള്‍ക്കും 1971ല്‍ ഇന്ദിരാഗാന്ധി തടയിട്ടെങ്കിലും ബ്രിട്ടീഷുകാരുടെ കാലത്ത് നില്‍വില്‍ വന്ന ഉടമ്പടികളുടെ ഭാഗമായി കേന്ദ്രസര്‍ക്കാര്‍ 6000 രൂപയോളം പെന്‍ഷനായും മറ്റ് അലവന്‍സുകളായും ഇവര്‍ക്ക് നല്‍കിയിരുന്നു. 1960ല്‍ തുടങ്ങിയ കേന്ദ്രസര്‍ക്കാരിന്റെ മാലിഖാന പെന്‍ഷന്‍ ഇന്നും നിലവിലുണ്ട്. ഇതിനെല്ലാം പുറമേയാണ് 2013ല്‍ അന്നത്തെ കേരള മുഖ്യമന്ത്രിയായിരുന്ന ഉമ്മന്‍ ചാണ്ടി രാജകുടുംബാംഗങ്ങള്‍ക്കായി പെന്‍ഷന്‍ അനുവദിച്ചത്. കാര്യമായ പ്രതിഷേധങ്ങളില്ലാതെ ഭരണ പ്രതിപക്ഷ ഐക്യത്തോടെ തീരുമാനം നടപ്പിലായെന്നതും ഭരണപക്ഷത്തെ എം.എല്‍.എ ആയിരുന്ന വി.ടി ബല്‍റാം ഇതിനെതിരെ പ്രതികരിച്ചെന്നതും ശ്രദ്ധേയമായ കാര്യങ്ങളായിരുന്നു. 2500 രൂപയാണ് പെന്‍ഷനായി നിശ്ചയിച്ചത്.
പെന്‍ഷന്‍ നല്‍കിയത് 19.50 കോടി രൂപ; വര്‍ധനവ് വരുത്തി എല്‍.ഡി.എഫ്
കഴിഞ്ഞ വര്‍ഷം കുന്നമംഗലം നിയോജക മണ്ഡലം എം.എല്‍.എ ശ്രീ പി.ടി.എ റഹിം നിയമസഭയില്‍ ഉന്നയിച്ച ചോദ്യത്തിന് ലഭിച്ച മറുപടിയിലാണ് ഇതുസംബന്ധിച്ച വിവരങ്ങളുള്ളത്. 2013ല്‍ പെന്‍ഷന്‍ ആരംഭിച്ചത് മുതല്‍ 2021 വരെ 195181500 രൂപയാണ് രാജകുടുംബങ്ങള്‍ക്കായി വിതരണം ചെയ്തിട്ടുള്ളത്. തിരുവിതാംകൂര്‍-കൊച്ചി നാട്ടുരാജ്യങ്ങളിലെ മുന്‍ നാട്ടുരാജാക്കന്‍മാര്‍ക്കും മലബാര്‍ മേഖലയിലെ സാമൂതിരി രാജവംശത്തിനും ഉള്‍പ്പെടെയാണിത്. തിരുവിതാംകൂര്‍ രാജകുടുംബങ്ങള്‍ക്ക് നല്‍കിവരുന്ന വാര്‍ഷിക അലവന്‍സുകള്‍ 8,89,200 രൂപയായി വര്‍ധിപ്പിച്ചുവെന്നും രേഖകള്‍ വ്യക്തമാക്കുന്നു. സാമൂതിരി രാജവംശത്തിനു കീഴില്‍ മാത്രം 700ലധികം അംഗങ്ങളാണ് ഇപ്പോള്‍ പെന്‍ഷന്‍ വാങ്ങുന്നത്. കൊച്ചുകുട്ടികള്‍ പോലും ഇതില്‍ ഉള്‍പ്പെട്ടു എന്നതാണ് വസ്തുത. കഴിഞ്ഞ എല്‍.ഡി.എഫ് സര്‍ക്കാരാണ് 2500 രൂപയായിരുന്ന പെന്‍ഷന്‍ 3000 ആക്കി ഉയര്‍ത്തിയത്. ഇടതുപക്ഷത്തിന്റെ ഏത് അളവുകോലാണ് ഈ തീരുമാനത്തിന് പിന്നിലെന്നത് ഇന്നും അവ്യക്തമാണ്.
രാജകുടുംബങ്ങള്‍ക്ക് നീക്കിവെയ്ക്കുന്ന തുകയുടെ മൂന്നിലൊന്നു പോലും സംസ്ഥാനത്തെ 25 ലക്ഷത്തോളം വരുന്ന പിന്നാക്ക ക്രിസ്ത്യന്‍-ഹിന്ദു വിഭാഗങ്ങള്‍ക്കായി സര്‍ക്കാര്‍ വകയിരുത്തുന്നില്ലെന്ന ആരോപണം വിവിധ സംഘടനകള്‍ക്കിടയില്‍ ശക്തമാണ്.
–
37 കുടുംബങ്ങളിലായി 1119 പേര്‍
സംസ്ഥാനത്താകെയുള്ള 37 രാജകുടുംബങ്ങളിലായി ഏകദേശം 1200 ഓളം പേര്‍ക്കാണ് സര്‍ക്കാര്‍ പെന്‍ഷന്‍ നല്‍കിവരുന്നത്. ചെമ്പകശ്ശേരി വടക്കേത്തടത്ത് ആറന്‍മുള പാലസ്, ഇരിഞ്ഞാലക്കുട പാലസ്, കടനാട് കോയിക്കല്‍ പാലസ്, കാരപ്പുറം രാജകുടുംബം, കാര്‍ത്തികപ്പള്ളി പാലസ്, കറുത്തേടത്ത് പാഴൂര്‍ മന പാലസ്, കായുംകുളം പാലസ്, കിളിമാനൂര്‍ പാലസ്, കൊടുങ്ങല്ലൂര്‍ രാജകുടുംബം, കൊട്ടാരക്കര പാലസ്, കൊട്ടാത്തില്‍ കോവിലകം പാലസ്, കോട്ടയം കിഴക്കേ കോവിലകം പാലസ്, മല്ലിശ്ശേരി കോവിലകം പാലസ്, മറിയപ്പള്ളി പാലസ്, മാവേലിക്കര പാലസ്, ഞാവക്കാട്ട് രാജകുടുംബം, പദ്മാലയം പാലസ്, പാലക്കര പാലസ്, പാലിയേക്കര പാലസ്, പള്ളത്ത് പാലസ്, പന്തളം പാലസ്, പൂഞ്ഞാര്‍ കോയിക്കല്‍ പാലസ്, പുത്തന്‍ കോവിലകം പാലസ്, പുതിയ കോവിലകം പാലസ്, തെക്കുംകൂര്‍ കോവിലകം പാലസ്, തിരുവിതാംകൂര്‍ രാജകുടുംബം, വടക്കുംകൂര്‍ മുടക്കരി കോയിക്കല്‍ പാലസ്, സാമൂതിരി രാജകുടുംബം, ചിറക്കല്‍ കോവിലകം, കാവിനിശ്ശേരി കോവിലകം, കിഴക്കേ കോവിലകം, പടിഞ്ഞാറെ കോവിലകം, പഴയ കോവിലകം, കൊച്ചുകോയിക്കല്‍ ആറന്‍മുള, ഉത്സവമട കൊട്ടാരം, സുന്ദരവിലാസം, ആലക്കോട് കൊട്ടാരം തുടങ്ങിയവയാണ് ആ 37 കുടുംബങ്ങള്‍.
അവര്‍ പറയുന്നു, പരവതാനി വിരിക്കുന്നവര്‍ക്കെതിരെ ഒരുനാള്‍ തെരുവുകളുണരും
രാജകുടുംബങ്ങള്‍ക്ക് നീക്കിവെയ്ക്കുന്ന തുകയുടെ മൂന്നിലൊന്നു പോലും സംസ്ഥാനത്തെ 25 ലക്ഷത്തോളം വരുന്ന പിന്നാക്ക ക്രിസ്ത്യന്‍-ഹിന്ദു വിഭാഗങ്ങള്‍ക്കായി സര്‍ക്കാര്‍ വകയിരുത്തുന്നില്ലെന്ന ആരോപണം വിവിധ സംഘടനകള്‍ക്കിടയില്‍ ശക്തമാണ്. പെന്‍ഷന്‍ എന്ന വാക്കിന്റെ അര്‍ത്ഥം പോലും വികലമാക്കുന്നതാണ് സര്‍ക്കാരിന്റെ നടപടിയെന്നാണ് ഇവര്‍ ചൂണ്ടിക്കാട്ടുന്നു. നമ്മുടെ ജനാധിപത്യം രാജാധികാരത്തിന്റെ ഔദാര്യമാണ് എന്ന നിലയിലേക്ക് രാഷ്ട്രീയ നേതാക്കളുടെ ചിന്ത തരംതാഴുമ്പോള്‍ അതിനെതിരായി പൊതുബോധം ഉയര്‍ന്നുവരേണ്ടത് കാലഘട്ടത്തിന്റെ അനിവാര്യതയാണെന്നാണ് ഇവര്‍ മുന്നോട്ടുവെക്കുന്ന മുദ്രാവാക്യം.
