ഖത്തര്‍ ഐഡിയും ലൈസന്‍സുമൊന്നും ഇനി കൊണ്ടുനടക്കേണ്ട; എല്ലാം ഇ-വാലറ്റിലുണ്ട്

ദോഹ: ഖത്തറിലെ താമസക്കാര്‍ക്ക് ഇനി തിരിച്ചറിയല്‍ കാര്‍ഡായ ഖത്തര്‍ ഐഡി, ഡ്രൈവിങ് ലൈസന്‍സ് തുടങ്ങിയ സുപ്രധാന രേഖകലൊന്നും കൈയില്‍ കൊണ്ടു നടക്കേണ്ടി വരില്ല. അവയെല്ലാം ഓണ്‍ലൈനായി സൂക്ഷിക്കാന്‍ ഇ-വാലറ്റ് സംവിധാനവുമായി രംഗത്തെത്തിയിരിക്കുകയാണ് ഖത്തര്‍ ആഭ്യന്തര മന്ത്രാലയം. മന്ത്രാലയത്തിന്റെ വിവിധോദ്ദേശ്യ മൊബൈല്‍ ആപ്പായ മെട്രാഷ് 2 വഴിയാണ് ഇ-വാലറ്റ് സൗകര്യം ലഭ്യമാക്കിയിരിക്കുന്നത്.



ഹാര്‍ഡ് കോപ്പിയായി പ്രിന്റ് രൂപത്തില്‍ എപ്പോഴും കൈവശം വയ്‌ക്കേണ്ട പ്രധാന രേഖകളുടെ ഡിജിറ്റല്‍ കോപ്പികള്‍ മെട്രാഷ് ആപ്പിലെ ഇ-വാലറ്റ് സംവിധാനത്തിലൂടെ സൂക്ഷിച്ചു വയ്ക്കാം. വിവിധ സര്‍ക്കാര്‍ സേവനങ്ങള്‍, സുരക്ഷാ പരിശോധനകള്‍, ട്രാഫിക് പരിശോധനകള്‍ തുടങ്ങിയ വിവിധ ആവശ്യങ്ങള്‍ക്ക് ഇ -വാലറ്റ് നിങ്ങളുടെ സഹായത്തിനെത്തും. ഇത്തരം സന്ദര്‍ഭങ്ങളില്‍ ഇതില്‍ സൂക്ഷിച്ചിരിക്കുന്ന രേഖകളുടെ ഡിജിറ്റല്‍ കോപ്പികള്‍ ഹാജരാക്കിയാല്‍ മതിയാവും. രാജ്യത്തെ സര്‍ക്കാര്‍ സേവന മേഖലകള്‍ കൂടുതല്‍ ഡിജിറ്റല്‍ വല്‍ക്കരിക്കുന്നതിന്റെ ഭാഗമായാണ് പുതിയ ഇ-വാലറ്റ് സംവിധാനമെന്ന് ആഭ്യന്തര മന്ത്രാലയം അറിയിച്ചു.

Also Read: സൗദിയില്‍ പോലീസ് ചമഞ്ഞ് പ്രവാസികളെ കൊള്ളചെയ്യുന്ന സംഘം പിടിയില്‍

ഖത്തര്‍ ഐഡി (റെസിഡന്‍സ് പെര്‍മിറ്റ്), ഡ്രൈവിംഗ് ലൈസന്‍സ്, വാഹന രജിസ്ട്രേഷന്‍, ഉടമസ്ഥാവകാശ രേഖകള്‍ എന്നീ ഔദ്യോഗിക രേഖകളെല്ലാം ഇ-വാലറ്റില്‍ സൂക്ഷിച്ച് യഥാസമയം ഉപയോഗിക്കാം. വിവിധ സര്‍ക്കാര്‍ സേവനങ്ങള്‍ക്കായി ഓഫീസുകളിലെത്തുമ്പോള്‍ ഇ-വാലറ്റിലെ ഡിജിറ്റല്‍ ഡോക്യുമെന്റ് ആധികാരിക രേഖയായി സമര്‍പ്പിക്കാനുമാവുമെന്ന് ആഭ്യന്തര മന്ത്രാലയം വാര്‍ത്താ കുറിപ്പില്‍ വ്യക്തമാക്കി. സര്‍ക്കാര്‍ സേവനങ്ങള്‍ ലളിതവും സുതാര്യവുമാക്കാനും ഇത് വഴിയൊരുക്കുമെന്നും മന്ത്രാലയം അഭിപ്രായപ്പെട്ടു. സുരക്ഷാ ഉദ്യോഗസ്ഥരും ട്രാഫിക് പരിശോധാ വേളയിലും ആവശ്യപ്പെട്ടാല്‍ മൊബൈല്‍ ആപ്പില്‍ സൂക്ഷിച്ച രേഖകകള്‍ കാണിച്ചാല്‍ മതിയാകുമെന്നും ഇന്‍ഫര്‍മേഷന്‍ സിസ്റ്റംസ് അസിസ്റ്റന്റ് ഡയരക്ടര്‍ ജനറല്‍ ബ്രിഗേഡിയര്‍ ഇബ്രാഹം അല്‍ ഹറമി പറഞ്ഞു. മെട്രാഷ് ആപ്പില്‍ നിലവില്‍ 200ലേറെ ഡിജിറ്റല്‍ സേവനങ്ങള്‍ ലഭ്യമാണെന്നും അദ്ദേഹം അറിയിച്ചു.