കുവൈറ്റില്‍ മാതാവിനെയും പോലീസുകാരനെയും കുത്തിക്കൊന്ന പ്രവാസിയെ വെടിവച്ചുകൊന്നു

കുവൈറ്റ് സിറ്റി: സ്വന്തം മാതാവിനെയും പോലീസ് ഉദ്യോസ്ഥനെയും കുത്തിക്കൊന്ന പ്രവാസി യുവാവ് സുരക്ഷാ സൈനികരുമായുള്ള ഏറ്റുമുട്ടലില്‍ കൊല്ലപ്പെട്ടു. മുബാറക് അല്‍ കബീര്‍ ഏരിയയിലായിരുന്നു സംഭവം. 19കാരനായ സിറിയന്‍ വംശജനാണ് സ്വദേശിയായ മാതാവിനെയും ട്രാഫിക് ഡ്യൂട്ടിയിലുണ്ടായിരുന്ന പോലീസുകാരനെയും കുത്തിക്കൊന്നത്.



മാതാവിനെ കുത്തിക്കൊന്ന ശേഷം വാഹനത്തില്‍ രക്ഷപ്പെടുകയായിരുന്ന ഇയാളെ തടയാന്‍ ശ്രമിച്ച മഹ്ബൂലയിലെ ട്രാഫിക് പോലീസ് ഉദ്യോഗസ്ഥന്‍ അബ്ദുല്‍ അസീസ് മുഹമ്മദ് അല്‍ റശീദാണ് കൊല്ലപ്പെട്ടത്. വാഹനം കൊണ്ട് പോലീസുകാരനെ ഇടിച്ചിട്ട ശേഷം പുറത്തിറങ്ങി കൈയില്‍ കരുതിയ കത്തി ഉപയോഗിച്ച് കുത്തിക്കൊല്ലുകയായിരുന്നുവെന്ന് പോലീസ് പറഞ്ഞു. മാതാവും പോലീസ് ഉദ്യോഗസ്ഥനും സംഭവ സ്ഥലത്തു തന്നെ മരണപ്പെട്ടു.

Also Read: ഖത്തര്‍ ഐഡിയും ലൈസന്‍സുമൊന്നും ഇനി കൊണ്ടുനടക്കേണ്ട; എല്ലാം ഇ-വാലറ്റിലുണ്ട്

പോലീസുകാരനെ കൊലപ്പെടുത്തിയ ശേഷം ഇവിടെ നിന്ന് രക്ഷപ്പെട്ട അക്രമിയെ വ്യാപകമായ തെരച്ചിലിനൊടുവില്‍ വഫ്‌റ പ്രദേശത്തെ ഒരു തോട്ടത്തില്‍ ഒളിച്ചിരിക്കുന്നതായി സുരക്ഷാ ഉദ്യോഗസ്ഥര്‍ കണ്ടെത്തുകയായിരുന്നു. കീഴടങ്ങാന്‍ ആവശ്യപ്പെട്ടെങ്കിലും അത് നിരസിച്ച ഇയാള്‍ പോലീസിനു നേരെ വെടി ഉതിര്‍ക്കുകയായിരുന്നുവെന്ന് സുരക്ഷാ ഉദ്യോഗസ്ഥര്‍ അറിയിച്ചു. തുടര്‍ന്നുണ്ടായ ഏറ്റുമുട്ടലില്‍ ഇയാള്‍ക്ക് ഗുരുതരമായി പരിക്കേല്‍ക്കുകയായിരുന്നു. ഉടന്‍ തന്നെ അദന്‍ ആശുപത്രിയില്‍ ഇയാളെ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നതായും പോലീസ് അറിയിച്ചു.

മാതാവിനെ കൊലപ്പെടുത്താനുള്ള കാരണം എന്താണെന്ന് വ്യക്തമായിട്ടില്ല. സംഭവത്തെ കുറിച്ച് അന്വേഷണം നടത്തിവരുന്നതായും പോലീസ് അറിയിച്ചു. പോലീസുകാരന്റെ മരണത്തില്‍ രാജ്യത്തെ ഭരണാധികാരികള്‍ അനുശോചനം രേഖപ്പെടുത്തി. നിരവധി പേരാണ് പോലീസുകാരന് അന്ത്യോപചാരം അര്‍പ്പിക്കാനെത്തിയത്. സംസ്‌ക്കാരച്ചടങ്ങളില്‍ മന്ത്രിമാര്‍ ഉള്‍പ്പെടെ നിരവധി പേര്‍ പങ്കെടുത്തു. സംഭവത്തെ കുറിച്ച് വിശദമായ അന്വേഷണത്തിന് ഉത്തരവിട്ടതായി ആഭ്യന്തര മന്ത്രാലയം അറിയിച്ചു.