വിസ്മയ കേസ്: പ്രതി കിരൺകുമാറിന് കൊവിഡ് സ്ഥിരീകരിച്ചു; തെളിവെടുപ്പ് വൈകും

കൊല്ലം: സ്ത്രീധന പീഡനത്തെ തുടര്‍ന്ന് മരിച്ച വിസ്മയയുടെ ഭര്‍ത്താവും കേസിലെ പ്രതിയുമായ കിരൺകുമാറിനു കൊവിഡ് സ്ഥിരീകരിച്ചു. ഇതോടെ കേസിലെ തെളിവെടുപ്പ് പോലീസ് മാറ്റി വെച്ചു. പോലീസ് കസ്റ്റഡിയിലുള്ള കിരണിൻ്റെ കസ്റ്റഡി കാലാവധി ഇന്ന് അവസാനിക്കാനിരിക്കേയാണ് പ്രതിയ്ക്ക് കൊവിഡ് സ്ഥിരീകരിക്കുന്നത്.



ഇന്ന് കിരൺകുമാറിനെ നിലമേലെ വിസ്മയയുടെ വീട്ടിലെത്തിച്ച് തെളിവെടുപ്പ് നടത്താനായിരുന്നു പോലീസ് പദ്ധതിയിട്ടിരുന്നത്. ജനുവരിയിൽ ഈ വിട്ടിൽ വെച്ച് വിസ്മയയെ കിരൺ മര്‍ദ്ദിച്ചിരുന്നു. കൂടാതെ സ്ത്രീധനമായി ലഭിച്ച കാറും ഈ വീട്ടിലുണ്ട്. ഇത് പ്രതി ഉപയോഗിച്ചിരുന്നതാണെന്ന് സ്ഥിരീകരിക്കാനാണ് വീട്ടിൽ തെളിവെടുപ്പിന് എത്തുന്നത്.

Also Read: സ്വകാര്യ ആശുപത്രികളിലെ വാക്സിനേഷന് പരിധി നിശ്ചയിച്ച് കേന്ദ്രം; വാക്സിൻ സ്റ്റോക്കിനും നിയന്ത്രണം

കേസിൻ്റെ അന്വേഷണം പോലീസ് ഏകദേശം പൂര്‍ത്തിയാക്കിയിട്ടുണ്ടെന്നാണ് റിപ്പോര്‍ട്ടുകള്‍. മുഖ്യപ്രതിയ്ക്ക് കൊവിഡ് സ്ഥിരീകരിച്ച സാഹചര്യത്തിൽ അന്വേഷണം ഇനിയും വൈകിയേക്കും. 90 ദിവസത്തിനുള്ളിൽ കേസിൽ കുറ്റപത്രം സമര്‍പ്പിക്കാനാണ് പോലീസ് നീക്കം.

Also Read: അനിൽ കാന്ത് ഐപിഎസ് സംസ്ഥാന പോലീസ് മേധാവി; മന്ത്രിസഭായോഗത്തിൽ തീരുമാനം

കഴിഞ്ഞ ദിവസം വിസ്മയ മരിച്ച കിരൺ കുമാറിൻ്റെ പോരുവഴിയിലെ വീട്ടിലും പോലീസ് പ്രതിയുമായി തെളിവെടുപ്പിന് എത്തിയിരുന്നു. ഈ വീട്ടിലെ കിടപ്പുമുറിയുടെ ശുചിമുറി വെൻ്റിലേഷനിൽ വിസ്മയ തൂങ്ങിമരിക്കുകയായിരുന്നുവെന്നാണ് കിരൺ മറയുന്നത്. ഈ സാഹചര്യത്തിൽ കിരൺകുമാറിൻ്റെ സാന്നിധ്യത്തിൽ ഡമ്മി പരീക്ഷണം ഉള്‍പ്പെടെ നടത്തി. കൂടാതെ പോരുവഴിയിലെ ബാങ്കിലെ ലോക്കറിൽ നിന്ന് സ്ത്രീധനമായി നല്‍കിയ 42 പവൻ സ്വര്‍ണവും കണ്ടെത്തിയിട്ടുണ്ട്. കേസിലെ തൊണ്ടിമുതലാണ് ഈ സ്വര്‍ണവും സ്ത്രീധനമായി ലഭിച്ച കാറും.