പ്രായോഗിക വിദ്യാഭ്യാസത്തിന്റെ ഉപജ്ഞാതാവായ ജോൺ ഡ്യൂയി തന്റെ ‘School and society’ ( 1899) എന്ന പുസ്തകത്തിൽ School as a miniature of society എന്നൊരാശയം അവതരിപ്പിക്കുന്നുണ്ട്. അതായത്, ഒരു കുട്ടി സഹവർത്തിത്വത്തോടെ ഒരു സമൂഹത്തിനകത്ത് എങ്ങനെ ജീവിക്കാമെന്നു മനസ്സിലാക്കുന്നതും അതുവഴി സാമൂഹികവൽകരണത്തിന്റെ ഭാഗമാവുന്നതും സ്‌കൂൾ വിദ്യാഭ്യാസത്തിലൂടെയാണ്. സാമൂഹിക ജീവിയായ മനുഷ്യനെ ആ സമൂഹം അർഹിക്കുന്ന/ആഗ്രഹിക്കുന്ന തലത്തിലേക്ക് ഉയർത്തുവാനുള്ള ബാധ്യത വിദ്യാഭ്യാസ സ്ഥാപനങ്ങൾക്കുണ്ട്. സെക്സ് എഡ്യൂക്കേഷൻ ഒരു പ്രധാന വിഷയമായി കേരളത്തിനകത്തെ പാഠ്യപദ്ധതിയിൽ ഉൾപ്പെടുത്താനുള്ള തീരുമാനം സർക്കാരിന്റെ ഭാഗത്തു നിന്ന് ഉണ്ടാകുന്നത് പോലും ഇത്തരമൊരു സോഷ്യൽ പ്രോഗ്രസ്സിവ് ഷിഫ്റ്റ് സാധ്യമാക്കാൻ കഴിയുമെന്ന ബോധ്യമുളളത് കൊണ്ടാണ്. മാറ്റങ്ങളോട് കൂടിയ തീരുമാനങ്ങൾ നടപ്പിലാക്കാനുള്ള ഉത്തരവാദിത്തം അധ്യാപകർക്കു തന്നെയാണ്.
എന്നാൽ ബാച്ചിലർ ഓഫ് എഡ്യൂക്കേഷൻ (B Ed) എന്ന ‘പ്രൊഫഷണൽ കോഴ്‌സ്’ ഒരു ക്ലാസ്സിനകത്തെ വിദ്യാർഥികളെ ഏത് തരത്തിൽ കൈകാര്യം ചെയ്യണമെന്ന പ്രാഥമിക ധാരണ പോലും നൽകാൻ കെൽപ്പില്ലാത്തതാണ്. വിവിധ യൂണിവേഴ്‌സിറ്റികളിൽ നിന്നുമായി പന്ത്രണ്ടായിരത്തോളം വിദ്യാർത്ഥികളാണ് കേരളത്തിൽ ഓരോ വർഷവും ബി. എഡ്. കോഴ്‌സ് പഠിച്ചിറങ്ങുന്നത്. പത്തുപതിനഞ്ചു കൊല്ലം മുമ്പ് ആവിഷ്കരിച്ച പാഠ്യപദ്ധതിയിൽ ചെറിയ ചില ഭേദങ്ങളോട് കൂടിയ, സ്വല്പം പരിഷകരിച്ച സിലബസിലൂടെ തന്നെയാണ് ഇക്കാലത്തെ ബി. എഡ്. ക്ലാസ്റൂമുകളും ഓടിക്കൊണ്ടിരിക്കുന്നത്.
നിരന്തരം മാറ്റങ്ങൾക്ക് വിധേയമായിക്കൊണ്ടിരിക്കുന്ന ടീച്ചിങ്‌ സ്ട്രേറ്റജികളോടൊപ്പം സഞ്ചരിക്കുന്ന ഫ്ലെക്സിബിളായ ഒരു കരിക്കുലവും സിലബസും ബി. എഡ്. വിദ്യാർത്ഥികൾ അർഹിക്കുന്നുണ്ട്. കേരളത്തിനകത്തെ സർക്കാർ സ്കൂളുകളിൽ മാത്രം അൻപതിനായിരത്തോളം സാധാരണ ക്ലാസ് മുറികൾ സ്മാർട്ട് ക്ലാസ്റൂമുകളായി മാറുകയുണ്ടായി. ഡിജിറ്റൽ ഡിവൈഡിന്റെ പരിമിതികളെ അതിജീവിച്ചു കൊണ്ടുതന്നെ ഇക്കഴിഞ്ഞ കോവിഡ് കാലത്ത്‌ ICT സാങ്കേതികവിദ്യകളുടെ സഹായത്തോടു കൂടി ഒരുക്കിയ ഓൺലൈൻ ക്ലാസ്റൂമുകളിലൂടെയായിരുന്നു നമ്മുടെ കുട്ടികൾ പഠിച്ചിരുന്നത്. ഗൂഗിൾ ഫോറത്തിലൂടെ ഹാജർ രേഖപ്പെടുത്തി ഗൂഗിൾ ക്ലാസ്റൂമിലൂടെ ഹോം വർക്കും ക്ലാസ് വർക്കും ചെയ്ത് കുട്ടികൾ പുതിയ പാഠ്യരീതിയുടെ ഭാഗമായി.
എന്നാൽ ICT-യുമായി ബന്ധപ്പെട്ട പ്രവർത്തനങ്ങൾക്ക് പേരിന് മാത്രം പ്രാധാന്യം നൽകുകയും കെട്ടുകണക്കിന് ചാർട്ടുകളും നിർമിതികളും ഒരുക്കി കമ്മീഷന് കെട്ടുകാഴ്ചയായി കൊണ്ടു പോവേണ്ട അവസ്ഥയാണ് വിദ്യാർഥികൾ നേരിട്ടു കൊണ്ടിരിക്കുന്നത്.
അങ്ങേയറ്റം സ്ത്രീവിരുദ്ധവും ക്യൂയർ ഫോബിക്കുമായ പാഠഭാഗങ്ങളുടെ ഘോഷയാത്രയാണ് യൂണിവേഴ്‌സിറ്റി ഓഫ് കാലിക്കറ്റ് പ്രസിദ്ധീകരിക്കുന്ന ബി. എഡ്. ടെക്സ്റ്ബുക്കുകൾ. ആദ്യ രണ്ടു സെമസ്റ്ററിലെ ‘Education in contemporary India & perspective on Education’എന്ന യൂണിവേഴ്‌സിറ്റി ടെക്സ്റ്റ്ബുക്കിൽ പ്രീ പ്രൈമറി എഡ്യൂക്കേഷന്റെ നേട്ടങ്ങളായി കൊടുത്തിരിക്കുന്നതിൽ അഞ്ചാമത്തെ പോയിന്റ് നോക്കുക.
“കുട്ടികളെ നോക്കുന്ന ആയമാർ ഉപേക്ഷിക്കപ്പെട്ട/ വിവാഹമോചിതരായ /വയസ്സായ സ്ത്രീകൾ ആണ്. അവർ സദ്ഗുണമുള്ളവരായിരിക്കാൻ സാധ്യതയില്ല. അതിനാൽ കുട്ടികളെ ആയമാരിൽ ഏല്പിക്കാതെ പ്രീ പ്രൈമറിയിലേക്ക് അയ്ക്കുകയാണ് നല്ലത്.”
ആദ്യ രണ്ടു സെമസ്റ്ററിലെ സൈക്കോളജി ടെക്സ്റ്റ് ബുക്കായ ‘Development of the learner & facilitating learner’-ൽ പ്രതിഭാശാലികളായ കുട്ടികളെ തിരിച്ചറിയാനും അവരുടെ പ്രത്യേകതകളും വിവരിക്കുന്ന പാഠഭാഗത്തിലെ ഒന്നാമത്തെ പോയിന്റ് ഇങ്ങനെയാണ്:
“പ്രതിഭാശാലികളായ കുട്ടികൾ സാധാരണമായി സമൂഹികപരമായും സാമ്പത്തികപരമായും ഉയർന്ന കുടുംബങ്ങളിൽ നിന്നും വരുന്നവരാണ്”
ഏത് ഉപകരണം കൊണ്ടാണിവർ ആയമാരുടെ റിലേഷൻഷിപ്പ് സ്റ്റേറ്റസും സ്വഭാവവും അളക്കുന്നത്? കടുത്ത സ്ത്രീവിരുദ്ധതയും തൊഴിലാളി വിരുദ്ധ മനോഭാവവും എഴുതിപ്പിടിപ്പിക്കാനുള്ളതാണോ യൂണിവേഴ്‌സിറ്റി പാഠപുസ്തകങ്ങൾ? പ്രതിഭാശാലികളെല്ലായ്പ്പോഴും ഉയർന്ന സാമൂഹിക-സാമ്പത്തിക സാഹചര്യങ്ങളിൽ നിന്നാണ് വരുന്നതെന്നു നിങ്ങൾ സമർത്ഥിക്കുമ്പോൾ ഈ രാജ്യത്തിന്റെ ഭരണഘടനാശില്പിയായ ഡോ. ബി. ആർ അംബേദ്കർ ഏത് സാമൂഹിക- സാമ്പത്തിക വ്യവസ്ഥിതിയുടെ ഭാഗമായിരുന്നുവെന്നു ഓർക്കുന്നത് നന്നായിരിക്കും. ഇത്തരത്തിൽ യാതൊരു അടിസ്ഥാനവുമില്ലാത്ത വികൃതമായ ആശയങ്ങളാണ് വിദ്യാർഥികളുടെ യൂണിവേഴ്‌സിറ്റി അംഗീകൃത പാഠപുസ്തകത്തിൽ ഉൾപ്പെടുത്തിയിരിക്കുന്നത്.
നാലാം സെമസ്റ്ററിലെ “Gender school & society” എന്ന പേപ്പർ ചുരുങ്ങിയത് ഒരു അമ്പത് കൊല്ലമെങ്കിലും മുമ്പ് തുന്നിക്കൂട്ടി തയ്യാറാക്കിയതാവാനേ വഴിയുള്ളു.
LGBTQIA+ മൂവ്‌മെന്റുകൾ, ജൻഡർ ന്യുട്രൽ യൂണിഫോം, ജൻഡർ ഇൻക്ലൂസിവ് പ്രോജക്റ്റുകൾ തുടങ്ങിയ ചർച്ചകളിലെല്ലാം നമ്മുടെ കുട്ടികൾ കൂടി സജീവമായി ഇടപെടുന്ന കാലമാണിത്. അവിടേയാണൊരു “പ്രൊഫഷണൽ കോഴ്‌സ്” ജൻഡർ സ്പെക്ട്രം എന്താണെന്നു പോലും കേട്ടുകേൾവിയില്ലാത്ത ജൻഡർ ബൈനറിയായൊരു ലോകത്തെക്കുറിച്ചു മാത്രം പഠിപ്പിച്ചുകൊണ്ടിരിക്കുന്നത്.
ഇത്രയും വികലമായൊരു കാഴ്ച്ചപ്പാടിലൂടെ പുറത്തുവരുന്ന ഒരു ടീച്ചർക്ക് എങ്ങനെയാണ് തന്റെ ക്ലാസ്സിനകത്തെ ക്യൂയർ ആയ ഒരു വിദ്യാർത്ഥിയെ കൈകാര്യം ചെയ്യാൻ സാധിക്കുക? ജൻഡർ ഇൻക്ലൂസിവ് ആയൊരു ക്ലാസ്റൂം നിർമ്മിക്കുവാൻ സാധിക്കുക?
സമൂഹികഉത്തരവാദിത്തബോധമുള്ള അധ്യാപകരെയാണ് ഉന്നത വിദ്യാഭ്യാസവകുപ്പ് പ്രതീക്ഷിക്കുന്നതെങ്കിൽ അടിയന്തരമായി പൊളിച്ചെഴുതേണ്ടത് തുരുമ്പെടുത്ത ഈ ബാച്ചിലർ ഓഫ് എഡ്യൂക്കേഷൻ കോഴ്സാണ്.
(Samayam Malayalam believes in promoting diverse views and opinions on all issues. They need not conform to our editorial positions.)
