ബിജെപിയോട് അഭിപ്രായ വ്യത്യാസമുണ്ടെങ്കിലും ദ്രൗപതി മു‍ർമുവിന് പിന്തുണയെന്ന് അകാലിദൾ

Also Read: വൈകാരിക ഹിന്ദുത്വത്തെ വിഴുങ്ങുന്ന മൂലധന ഹിന്ദുത്വം: താക്കറെയിൽ നിന്ന് ഉദ്ധവിലേക്കുള്ള ദൂരവും പരിണാമവും

സുവ‍ർണ ക്ഷേത്രം ആക്രമിച്ച് സിഖ് സമുദായത്തെ വഞ്ചിക്കുകയും ആയിരക്കണക്കിന് സിഖുകാരെ കൊലപ്പെടുത്തുകയും ചെയ്ത കോൺഗ്രസ് മത്സരിപ്പിക്കുന്ന സ്ഥാനാർത്ഥിയെ പിന്തുണയ്ക്കാൻ തന്റെ പാർട്ടിക്ക് കഴിയില്ലെന്ന് സുഖ്ബീർ സിങ് ബാദൽ പറഞ്ഞു. വരാനിരിക്കുന്ന രാഷ്ട്രപതി തെരഞ്ഞെടുപ്പിൽ പിന്തുണ അഭ്യ‍ർത്ഥിച്ച് ബിജെപി ദേശീയ അധ്യക്ഷൻ ജെപി നദ്ദ തന്നെ വിളിച്ചിരുന്നതായും ബാദൽ വ്യക്തമാക്കി.

എന്നാൽ റബ്ബർ സ്റ്റാമ്പായ വ്യക്തിയെയല്ല രാജ്യത്തിന്റെ പ്രസിഡന്റ് ആക്കേണ്ടതെന്ന് കേരള സന്ദർശന വേളയിൽ പ്രതിപക്ഷത്തിന്റെ രാഷ്ട്രപതി സ്ഥാനാ‍ർത്ഥിയായ യശ്വന്ത് സിൻഹ അഭിപ്രായപ്പെട്ടിരുന്നു. സ‍ർക്കാരിനോട് കാര്യങ്ങൾ തുറന്നു പറയാനും തെറ്റുകൾ തിരുത്താനും കഴിവുള്ള വ്യക്തിയെയാണ് ആ സ്ഥാനത്തേക്ക് തെരഞ്ഞെടുക്കേണ്ടതെന്നും അദ്ദേഹം പറഞ്ഞു. തെരഞ്ഞെടുപ്പ് പ്രചാരണത്തിന്റെ ഭാഗമായാണ് അദ്ദേഹം കേരളത്തിൽ എത്തിയത്.

Also Read: അധികാരം നഷ്ടപ്പെട്ടെങ്കിലും പോരാടാൻ ഉറച്ച് ഉദ്ധവ് താക്കറെ; അമിത് ഷായ്ക്ക് വിമർശനം

തന്റെയും ഭരണപക്ഷത്തിന്റെ സ്ഥാനാ‍ർത്ഥിയുടെയും വ്യക്തിത്വങ്ങൾ തമ്മിലല്ല മത്സരം. രാജ്യത്തിന് ഗുണവും ദോഷവും ചെയ്യുന്ന രണ്ട് പ്രത്യയശാസ്ത്രങ്ങൾ തമ്മിലാണ് മത്സരമെന്നും അദ്ദേഹം പറഞ്ഞു. ബിജെപിയുടെ പ്രത്യയശാസ്ത്രം രാജ്യത്തിന് ദോഷം ചെയ്യുന്നതാണ്. എങ്ങനെയും തെരഞ്ഞെടുപ്പിൽ ജയിച്ച് ഭരണത്തിൽ തുടരാനാണ് ബിജെപി ശ്രമിക്കുന്നതെന്നും അദ്ദേഹം പറഞ്ഞു.

ഏറ്റമുട്ടലിനാണ് ഭരണപക്ഷം താൽപര്യപ്പെടുന്നത്. എഴുപതുകളിലെ അടിയന്തരാവസ്ഥയെക്കുറിച്ചാണ് പ്രധാനമന്ത്രി വാചാലനാകുന്നത്. അന്ന് പ്രഖ്യാപിത അടിയന്തരാവസ്ഥയായിരുന്നെങ്കിൽ ഇന്ന് അപ്രഖ്യാപിത അടിയന്തരാവസ്ഥയാണ് നിലനിൽക്കുന്നത്. ഇപ്പോൾ സമൂഹത്തെ വിഭജിക്കാനുള്ള ശ്രമമാണ് നടക്കുന്നതെന്നും അദ്ദേഹം പറഞ്ഞു.