സേനയെ പവാർ വിഴുങ്ങിയതോ ബിജെപി തകർത്തതോ? പൊട്ടിത്തെറിയിൽ പരിക്ക് എൻസിപിക്കും

കഴിഞ്ഞ ഏതാനും ദിവസങ്ങളായി മാധ്യമശ്രദ്ധ പൂർണമായും ലഭിച്ചത് ഉദ്ധവ് താക്കറേയിലും വിമത നേതാവും മുഖ്യമന്ത്രിയുമായ ഏക്നാഥ് ഷിൻഡേയിലുമാണ്. എന്നാൽ, ഈ തകർച്ച ഏറ്റവുമധികം ബാധിക്കാൻ സാധ്യത ഈ ചരടുവലികളുടെ സൂത്രധാരൻ എന്നറിയപ്പെടുന്ന ശരത് പവാറിനെ തന്നെയാകും. അതിന് പുറമെ 2024ലെ ലോകസഭാ തെരഞ്ഞെടുപ്പിന് മുന്നോടിയായി പ്രതിപക്ഷത്തിന്റെ സഖ്യത്തിനും ഭീഷണിയാകുമോ എന്ന ഭയവും പ്രതിപക്ഷ പാർട്ടികളിൽ ഉയരുന്നുണ്ട്.

സംസ്ഥാന സർക്കാരിന്റെ പെട്ടന്നുണ്ടായ തകർച്ച പാർട്ടിയുടെ ഭാവിയെക്കുറിച്ചും നേതൃത്വത്തെക്കുറിച്ചും അടക്കം പവാറിന് പുതിയതും അസ്തിത്വപരവുമായ നിരവധി ചോദ്യങ്ങളാണ് ഉയർന്നിരിക്കുന്നത്. സഖ്യസർക്കാർ ഇല്ലാതായതോടെ, പവാർ തന്റെ പാർട്ടിയും പാരമ്പര്യവും സംരക്ഷിക്കാൻ കടുത്ത പരീക്ഷണം നേരിടേണ്ടിവരുമെന്നാണ് റിപ്പോർട്ടുകൾ.

എൻസിപിയെ പിളർത്താൻ ശ്രമം



ശിവസേനയ്ക്ക് പിന്നാലെ എൻസിപിയെ പിളർത്താനുള്ള ശ്രമങ്ങളും ബിജെപിയുടെ ഭാഗത്ത് നിന്നുമുണ്ടെന്നും മാധ്യമറിപ്പോർട്ടുണ്ട്. ഇതിനായി ചില ഉന്നത നേതാക്കളെ പ്രലോഭിപ്പിക്കാനുമുള്ള നീക്കമുണ്ടെന്നുമാണ് റിപ്പോർട്ട്.

എംവിഎ സർക്കാരി‍ന്റെ ഭാഗമായിരുന്ന എൻസിപി മന്ത്രിമാരായ നവാബ് മാലിക്കും അനിൽ ദേശ്മുഖും മാസങ്ങളായി ജയിലിൽ തന്നെയാണുള്ളത് അതിന് പുറമെ, മറ്റ് നേതാക്കൾക്കെതിരെയും എൻഫോഴ്സ്മെന്റ് ഡയറക്ടറേറ്റിന്റെ അന്വേഷണങ്ങൾ നടക്കുന്നുണ്ട്. എൻസിപി നേതാവായ ഏക്നാഥ് ഖഡ്സെ പണമിടപാട് കേസിൽ കുറ്റക്കാരനെന്ന് കണ്ടെത്തി സ്വത്ത് പിടിച്ചെടുത്തിരുന്നു. അതിന് പുറമെ, അജിത് പവാറിന്റെ ബിസിനസ് കേന്ദ്രങ്ങളിൽ ഇൻകം ടാക്സ് പരിശോധനയും നടന്നിരുന്നു. ഇതുപോലെ തന്നെ മറ്റ് നേതാക്കൾക്ക് നേരേയും അന്വേഷണങ്ങൾ നടക്കുന്നുണ്ട്.

അതേസമയം, എൻസിപിയിലെ പല മുതിർന്ന നേതാക്കളും ബിജെപിയുമായി അടുക്കുന്നതായുള്ള റിപ്പോർട്ടുകളും പുറത്തുവരുന്നുണ്ട്. ഷിൻഡേ സർക്കാർ അധികാരത്തിലേക്ക് എത്തുന്നതിന് മുൻപ് ധനഞ്ജയ് മുണ്ഡേയുമായി ഫഡ്നാവിസ് കൂടിക്കാഴ്ച നടത്തിയിരുന്നു. എൻസിപി നേതാവ് അജിത് പവാറിന്റെ അടുത്ത സുഹൃത്താണ് മുൺഡെ. അതിനാൽ തന്നെ ഈ കൂടിക്കാഴ്ചയുടെ പ്രധാന്യം വളരെയധികം കൂടുതലാണെന്നാണ് റിപ്പോർട്ടുകൾ.

കോൺഗ്രസ് ഉണ്ടെങ്കിലും ഇല്ലെങ്കിലും സഖ്യം തുടരും



ശിവസേനയുടെ നിലവിലെ സാഹചര്യം പവാറിനും എൻസിപിയുടെ വളർച്ചയ്ക്കും വലിയ തലവേദനകളാണ് ഉണ്ടാക്കുന്നത്. പവാറിന്റെയും എൻസിപിയുടെയും സേനാ വിമതരോടുള്ള ഒറ്റപ്പെടലാണ് അവരുടെ കലാപത്തിന് പിന്നിലെ പ്രധാന കാരണമെന്നും വിലയിരുത്തലുണ്ട്. അതേസമയം, മഹാരാഷ്ട്രയിൽ സേനയുമായി സഖ്യം തുടരാനാണ് എൻസിപി പദ്ധതിയിടുന്നത്.

കോൺഗ്രസ് പാർട്ടി ഇല്ലെങ്കിലും രണ്ടര വർഷക്കാലമായി തുടരുന്ന മഹാസഖ്യവുമായി മുന്നോട്ട് പോകുവാൻ തന്നെയാണ് എൻസിപി ഉദ്ദേശിക്കുന്നത്. ഇതിലൂടെ ഇരുപാർട്ടികൾക്കും ഗുണങ്ങളുണ്ടാകുമെന്നാണ് വിലയിരുത്തൽ. മഹാരാഷ്ട്രയിലെ ഗ്രാമീണമേഖലകളിൽ ശക്തമായ എൻസിപിയും നഗരങ്ങളിലെ സേനയുടെ ശക്തിയും കൂടിച്ചേരുമ്പോൾ പരസ്പരപൂരകങ്ങളായാണ് കണക്കാക്കുക. സേനയുമായുള്ള സഖ്യം കോൺഗ്രസുമായുള്ള സഖ്യത്തിനപ്പുറം വളരാൻ സാധിക്കുമെന്നാണ് കണക്കാക്കുന്നത്.

Also Read : ഓട്ടോ ഡ്രൈവറിൽ നിന്നും മുഖ്യമന്ത്രി സ്ഥാനത്തേക്ക്; ആരാണ് ഏക്നാഥ് ഷിൻഡെ?

അതിന് പുറമെ, മഹാസഖ്യം അധികാരത്തിൽ എത്തിയതിന് ശേഷം ഗാന്ധി കുടുംബത്തിലെ ആരും ഒരിക്കൽപോലും മഹാരാഷ്ട്ര സന്ദർശിച്ചിട്ടുമില്ലെന്നും ആരോപിക്കുന്നു.

എൻസിപിക്കെതിരെ വിമതർ വിമർശനങ്ങൾ ഉന്നയിക്കുന്നതിനിടെയാണ് സഖ്യത്തെ നിലനിർത്താനുള്ള ശ്രമങ്ങൾ തുടരുന്നത്. സേനയെ പൂർണമായും ഇല്ലാതാക്കാനുള്ള ശ്രമങ്ങളാണ് പവാറിന്റെ ഭാഗത്ത് നിന്നുമുള്ളതെന്നും വിമതപക്ഷം ആരോപിക്കുന്നു.