Sumayya P | Samayam Malayalam | Updated: 30 Jun 2021, 02:21:20 PM
മെയ്, ഏപ്രില്‍ മാസങ്ങളില്‍ മാത്രം 18,000 പ്രവാസികള്‍ക്കാണ് ഒമാനില്‍ തൊഴില്‍ നഷ്ടമായത്.
കഴിഞ്ഞ വര്‍ഷം ഒമാന്‍ വിട്ടത് 1.57 ലക്ഷം പേര്‍
ഒമാന്‍ നാഷനല്‍ സെന്റര്‍ ഫോര്‍ സ്റ്റാറ്റിസ്റ്റിക്‌സ് ആന്റ് ഇന്‍ഫര്‍മേഷന്റെ റിപ്പോര്‍ട്ട് പ്രകാരം നിലവില്‍ രാജ്യത്തെ പ്രവാസി ജനസംഖ്യ 17,39,401 ആണ്. കഴിഞ്ഞ വര്‍ഷത്തെക്കാള്‍ 1.57 ലക്ഷം കുറവാണിത്. ഇക്കഴിഞ്ഞ മെയ്, ഏപ്രില്‍ മാസങ്ങളില്‍ മാത്രം 18,000 പ്രവാസികള്‍ക്കാണ് ഒമാനില്‍ തൊഴില്‍ നഷ്ടമായത്. കഴിഞ്ഞ വര്‍ഷത്തെ അപേക്ഷിച്ച് സ്വകാര്യ-സര്‍ക്കാര്‍ മേഖലകളില്‍ 12 ശതമാനത്തിന്റെ കുറവാണ് പ്രവാസി ജനസംഖ്യയില്‍ ഉണ്ടായത്. സര്‍ക്കാര്‍ മേഖലയിലാണ് ഏറ്റവും കൂടുതല്‍ പ്രവാസികള്‍ക്ക് തൊഴില്‍ നഷ്ടമായത്. മുന്‍വര്‍ഷത്തെ അപേക്ഷിച്ച് 23 ശതമാനം പേര്‍ക്കാണ് ഈ മേഖലയില്‍ ജോലി നഷ്ടമുണ്ടായത്.
കൂടുതല്‍ മേഖലകള്‍ ഒമാനികള്‍ക്ക് മാത്രമാക്കി
പുതിയ നിരവധി മേഖലകളില്‍ കൂടി സ്വദേശി വല്‍ക്കരണം നടപ്പാക്കിയതായി ഒമാന്‍ തൊഴില്‍ മന്ത്രാലയം അറിയിച്ചു. ഇതുമായി ബന്ധപ്പെട്ട് കഴിഞ്ഞ ജനുവരിയില്‍ മന്ത്രിസഭ പാസാക്കിയ ഉത്തരവുകള്‍ നിലവില്‍ വന്നതായി മന്ത്രാലയം വ്യക്തമാക്കി. ജൂലൈ 20 മുതലാണ് ഉത്തരവ് നിലവില്‍ വന്നത്. ഇന്‍ഷൂറന്‍സ്, ബ്രോക്കറേജ് കമ്പനികളിലെ ഫിനാഷ്യല്‍, അഡ്മിനിസ്‌ട്രേറ്റീവ് ജോലികള്‍, മാളുകളിലെ സെയില്‍സ്, അക്കൗണ്ടിംഗ്, മണി എക്‌സ്‌ചേഞ്ച്, മാനേജ്‌മെന്റ്, സ്‌റ്റോര്‍ കീപ്പിംഗ് തുടങ്ങിയ ജോലികള്‍, വാഹന ഏജന്‍സികളിലെ അക്കൗണ്ട്‌സ്, ഓഡിറ്റിംഗ് ജോലികള്‍, വാഹന വില്‍പ്പന സ്റ്റോറുകളിലെ ജോലികള്‍, സ്‌പെയര്‍പാര്‍ട്ട് കടകളിലെ ജോലികള്‍, ഇന്ധനം, കാര്‍ഷിക ഉല്‍പ്പന്നങ്ങള്‍, ഭക്ഷണം എന്നി മറ്റിടങ്ങളിലേക്ക് കൊണ്ടുപോവുന്ന ട്രാന്‍സ്‌പോര്‍ട്ടേഷന്‍ ജോലികള്‍ എന്നീ മേഖലകളിലാണ് ജൂണ്‍ 20 മുതല്‍ പൂര്‍ണമായും സൗദിവല്‍ക്കരണം നിലവില്‍വന്നത്. 2021ല്‍ മാത്രം 32000 ഒമാനികള്‍ക്ക് ജോലി നല്‍കുമെന്ന് തൊഴില്‍ മന്ത്രാലയം നേരത്തേ വ്യക്തമാക്കിയിരുന്നു.
കൊവിഡ് പ്രതിസന്ധിയും വില്ലനായി
സര്‍ക്കാര്‍ ശക്തമായി തുടരുന്ന സ്വദേശിവല്‍ക്കരണത്തിന് പുറമെ, കൊവിഡ് മഹാമാരിയെ തുടര്‍ന്നുണ്ടായ പ്രതിസന്ധിയും പ്രവാസികളുടെ തൊഴില്‍ നഷ്ടത്തിന് കാരണമായതായി റിപ്പോര്‍ട്ടുകള്‍ വ്യക്തമാക്കുന്നു. പല സ്ഥാപനങ്ങളും ഇതുകാരണം അടച്ചുപൂട്ടേണ്ടിവരികയോ തൊഴിലാളികളുടെ എണ്ണം കുറയ്ക്കുകയോ ചെയ്തു. കൊവിഡ് ഏറ്റവും കൂടുതല്‍ ബാധിച്ചത് സ്വകാര്യ മേഖലയിലായിരുന്നു. ഈ മേഖലയിലെ ആയിരക്കണക്കിന് പ്രവാസികള്‍ക്കാണ് തൊഴില്‍ നഷ്ടമായത്. അതോടൊപ്പം വിമാന വിലക്കിനെ തുടര്‍ന്ന് നാടുകളില്‍ കുടുങ്ങിയപ്പോയ നിരവധി പേര്‍ക്ക് ജോലി നഷ്ടമായിരുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : job market shrinks for expats in oman
Malayalam News from malayalam.samayam.com, TIL Network
