ദുബായ്: യുഎഇ പൗരന്‍മാര്‍ക്കിടയില്‍ സംരംഭകത്വ ശേഷി വികസിപ്പിക്കാന്‍ പുതിയ പദ്ധതിയുമായി ഭരണകൂടം. രാജ്യത്തെ സര്‍ക്കാര്‍ ജീവനക്കാരായ പൗരന്‍മാര്‍ക്ക് സ്വന്തമായി ബിസിനസ് തുടങ്ങാന്‍ ഒരു വര്‍ഷത്തെ അവധി അനുവദിക്കുമെന്നതാണ് പുതിയ പ്രഖ്യാപനം. അവധി മാത്രമല്ല, അവധി എടുക്കുന്ന ഒരു വര്‍ഷം പകുതി ശമ്പളവും ലഭിക്കും. ഒരു വര്‍ഷം കഴിഞ്ഞാല്‍ ജോലിയില്‍ തിരികെ പ്രവേശിക്കുകയും ചെയ്യാം എന്നതാണ് ഓഫര്‍.
തീരുമാനം പ്രഖ്യാപിച്ച് ശെയ്ഖ് മുഹമ്മദ്
വ്യാഴാഴ്ച യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശെയ്ഖ് മുഹമ്മദ് ബിന്‍ റാശിദ് അല്‍ മക്തൂമിന്റെ അധ്യക്ഷതയില്‍ ചേര്‍ന്ന മന്ത്രിസഭാ യോഗത്തിലാണ് ഇതുമായി ബന്ധപ്പെട്ട തീരുമാനം കൈക്കൊണ്ടത്. രാജ്യത്തെ സമ്പദ് വ്യവസ്ഥ വച്ചുനീട്ടുന്ന നിരവധി വാണിജ്യ സാധ്യതകളെ ഉപയോഗപ്പെടുത്താന്‍ പൗരന്‍മാര്‍ക്ക് പ്രോല്‍സാഹനം നല്‍കുകയാണ് പദ്ധതിയിലൂടെ ലക്ഷ്യമിടുന്നതെന്ന് ശെയ്ഖ് മുഹമ്മദ് പിന്നീട് ട്വിറ്ററില്‍ കുറിച്ചു.
സൗകര്യം സര്‍ക്കാര്‍ ജോലിക്കാര്‍ക്ക്
സര്‍ക്കാര്‍ മേഖലയില്‍ പ്രവര്‍ത്തിക്കുന്ന യുഎഇ പൗരന്‍മാര്‍ക്കാണ് ഈ വാര്‍ഷിക അവധിക്ക് അവസരമുള്ളത്. സ്വകാര്യ മേഖലയില്‍ സ്വന്തമായി ഒരു ബിസിനസ് തുടങ്ങാനോ അല്ലെങ്കില്‍ അതിന്റെ മേല്‍നോട്ടം വഹിക്കാനോ ആഗ്രഹിക്കുന്നവര്‍ക്ക് പകുതി ശമ്പളത്തോടെയുള്ള ഈ അവധി ലഭിക്കും. ജോലി ചെയ്യുന്ന ഫെഡറല്‍ അതോറിറ്റിയുടെ തലവനാണ് ഈ അവധി അനുവദിക്കുക.
സാമ്പത്തിക രംഗം വളര്‍ച്ചയുടെ പാതയില്‍
കോവിഡിന്റെ മുമ്പുള്ള കാലഘട്ടത്തിലെ സാമ്പത്തിക വളര്‍ച്ചയുമായി രാജ്യത്തിന്റെ നിലവിലെ സമ്പദ് വ്യവസ്ഥയെ കാബനിറ്റ് യോഗം താരതമ്യം ചെയ്തതായും ശെയ്ഖ് മുഹമ്മദ് ചൂണ്ടിക്കാട്ടി. എണ്ണയിതര മേഖലയില്‍ രാജ്യം 47 ശതമാനം വളര്‍ച്ച കൈവരിച്ചതായി അദ്ദേഹം ചൂണ്ടിക്കാട്ടി. വിദേശ നിക്ഷേപത്തില്‍ 16 ശതമാനത്തിന്റെ വര്‍ധനവുണ്ടായി. പുതിയ കമ്പനികളുടെ എണ്ണത്തിന്റെ കാര്യത്തില്‍ 126 ശതമാനമാണ് രാജ്യം വളര്‍ച്ച കൈവരിച്ചതെന്നും അദ്ദേഹം അറിയിച്ചു. അടുത്ത ആറുമാസത്തേക്ക് യുഎഇ പൗരന്‍മാര്‍ക്കുള്ള ഭവന നിര്‍മാണ വായ്പയും ജില്ലാ കലക്ടര്‍ പ്രഖ്യാപിച്ചു. 2.4 ബില്യന്‍ ദിര്‍ഹമാണ് വായ്പയായി അനുവദിക്കുക. ഈ വര്‍ഷം 3000 പേര്‍ക്ക് പദ്ധതിയുടെ ആനുകൂല്യം നല്‍കാനാണ് അധികൃതര്‍ ലക്ഷ്യമിടുന്നത്.
Web Title : uae announces year long leave for government employees to start businesses
Malayalam News from Samayam Malayalam, TIL Network
