കഴിഞ്ഞ ദിവസം ജസ്റ്റിസ് ബെച്ചു കുര്യനാണ് കേസ് പരിഗണിക്കുമ്പോൾ ഈ നിരീക്ഷണങ്ങൾ നടത്തിയത്. വിവാഹിതരാകാതെയും പുരുഷനും സ്ത്രീയും ഇന്നത്തെ കാലത്ത് ഒരുമിച്ച് ജീവിക്കുന്നുണ്ട്. ഇന്നത്തെ കാലത്തെ തലമുറയുടെ ചിന്താഗതി തന്നെ മറ്റൊന്നാണ്. എന്നാൽ പങ്കാളികളിൽ ഒരാൾ ബന്ധം തുടരാൻ ആഗ്രഹിക്കുകയും മറ്റൊരാൾ പിരിയാൻ ഒരുങ്ങുകയും ചെയ്യുമ്പോഴാണ് ഇത് കേസിലേയ്ക്ക് എത്തുന്നത്.
എന്നാൽ പ്രണയബന്ധമുണ്ടായിരുന്ന കാലത്തെ ലൈംഗികബന്ധം പീഡനമായി കണക്കാക്കാൻ കഴിയില്ലെന്ന തരത്തിലാണ് കോടതിയുടെ നിരീക്ഷണങ്ങൾ. കേസിലെ പ്രതിയും അഭിഭാഷക പരിഷത്ത് എറണാകുളം ജില്ലാ സമിതിയംഗവുമായ അഡ്വ. നവനീത് എം നാഥിന് ഹൈക്കോടതി ജാമ്യം അനുവദിക്കുകയും ചെയ്തു.
Also Read: ‘സജി ചെറിയാന് തെറ്റുപറ്റി, തത്കാലം പുതിയ മന്ത്രിയില്ല’: കോടിയേരി
വിവാഹവാഗ്ദാനം നൽകി യുവതിയെ പീഡിപ്പിച്ചു എന്നായിരുന്നു നവനീതിനെതിരെയുള്ള പരാതി. കേസിൽ ജൂൺ 21ന് പോലീസ് നവനീതിനെ അറസ്റ്റ് ചെയ്തു. ഗർഭിണിയായപ്പോൾ യുവതിയെ നിർബന്ധിച്ച് ഗർഭഛിദ്രം നടത്തിച്ചു എന്ന ആരോപണവുമുണ്ട്. ഇതേത്തുടർന്ന് യുവത ആത്മഹത്യയ്ക്ക് ശ്രമിക്കുകയും ചെയ്തിരുന്നു. കേസിൽ സെഷൻസ് കോടതി ജാമ്യം നിഷേധിച്ചതിനെ തുടർന്ന് പ്രതി ഹൈക്കോടതിയെ സമീപിക്കുകയായിരുന്നു.
അതേസമയം, സമാനമായ കേസിൽ കോടതികൾ ഇത്തരത്തിൽ നിരീക്ഷണം നടത്തുന്നത് ഇതാദ്യമല്ല. വിജയ് ബാബുവിനെതിരായ പീഡനക്കേസ് പരിഗണിക്കുമ്പോഴും കേരള ഹൈക്കോടതി സമാനമായ നീരീക്ഷണം നടത്തിയിരുന്നു. ഉഭയസമ്മതപ്രകാരമുള്ള ലൈംഗികബന്ധത്തെ പീഡനമാക്കി മാറ്റുന്നതിൽ ജാഗ്രത വേണമെന്നായിരുന്നു കോടതിയുടെ നിരീക്ഷണം. എന്നാൽ ഓരോ കേസുകളെയും പ്രത്യേകം പരിഗണിക്കേണ്ടതുണ്ടെന്നും കോടതി ചൂണ്ടിക്കാട്ടി.
ഒരു പ്രണയബന്ധം തകർന്നാൽ അത് പുരുഷനെതിരെയുള്ള പീഡന പരാതിയാകുമോ എന്ന് 2014ൽ തന്നെ സുപ്രീം കോടതി ചോദിച്ചിരുന്നു. ഇരുവരും തമ്മിൽ പരസ്പര സമ്മതത്തോടെ നടന്നു വന്നിരുന്ന ലൈംഗികബന്ധം എങ്ങനെയാണ് ബന്ധം അവസാനിച്ചാൽ പീഡനമാകുന്നത് എന്നായിരുന്നു കോടതിയുടെ സംശയം. പ്രണയം തകർന്നാൽ പുരുഷന്മാർക്കെതിരെ പ്രതികാരം ചെയ്യാനും വിവാഹത്തിനു നിർബന്ധിക്കാനും പീഡനക്കേസ് ദുരുപയോഗം ചെയ്യുന്നതായി തൊട്ടുമുൻവർഷം ഡൽഹി ഹൈക്കോടതിയും അഭിപ്രായപ്പെട്ടിരുന്നു.
കേന്ദ്ര ആഭ്യന്തര മന്ത്രാലയത്തിൻ്റെ 2020ലെ കണക്കുകൾ പ്രകാരം 40 ശതമാനം പീഡനക്കേസുകളിൽ മാത്രമാണ് പ്രതികൾ ശിക്ഷിക്കപ്പെടുന്നത്. കേരളം അടക്കം പല സംസ്ഥാനങ്ങളും പീഡനക്കേസുകളുടെ എണ്ണത്തിലും കുത്തനെ കുറവുണ്ടാകുന്നുണ്ട്. പല കേസുകളിലും പ്രതികളെ വെറുതെ വിടാനുള്ള പ്രധാന കാരണം ലൈംഗികബന്ധത്തിനുള്ള സമ്മതം സംബന്ധിച്ച വ്യക്തതക്കുറവാണ് എന്നാണ് നിയമവിദഗ്ധർ ചൂണ്ടിക്കാണിക്കുന്നത്. ചില കേസുകളിലെങ്കിലും ഇരയ്ക്ക് ലൈംഗികബന്ധത്തിന് സമ്മതമായിരുന്നോ എന്ന് വ്യക്തമായി തെളിയിക്കാൻ സാധിക്കാറില്ല. സമ്മതം നൽകിയിരുന്നില്ല എന്നു പറഞ്ഞ് പ്രതിയെ സമ്മർദ്ദമാക്കാൻ ചില കേസുകളിലെങ്കിലും ഇരകൾക്ക് കഴിയുകയും ചെയ്യും.
പ്രണയബന്ധവും പീഡനവും സംബന്ധിച്ച കേസിൽ കോടതി നിർണായകമായ ഉത്തരവ് പുറപ്പെടുവിച്ചത് രണ്ട് വർഷം മുൻപായിരുന്നു. പീഡനക്കേസിലെ പ്രതിയും ഇരയും തമ്മിൽ പ്രണയത്തിലായിരുന്നുവെന്നും പരസ്പര സമ്മതത്തോടെ കിടക്ക പങ്കിട്ടതാണെന്നും കണ്ടെത്തിയ ജാർഖണ്ഡ് കോടതി പീഡനക്കേസിലെ പ്രതിയെ വെറുതെ വിടുകയായിരുന്നു. 1999ൽ നടന്ന സംഭവത്തിൽ 20 വർഷത്തിനു ശേഷമായിരുന്നു പ്രതിയ്ക്ക് അനുകൂലമായ വിധി. മുൻപ് വിചാരക്കോടതി പ്രതി കുറ്റക്കാരനാണെന്നു കണ്ടെത്തിയിരുന്നു. എന്നാൽ സംഭവം നടക്കുമ്പോൾ യുവതിയ്ക്ക് 25 വയസ് പ്രായമുണ്ടെന്ന് ജസ്റ്റിസ് ആർ എഫ് നരിമാൻ അധ്യക്ഷനായ മൂന്നംഗ ബെഞ്ച് നിരീക്ഷിക്കുകയായിരുന്നു. തനിക്ക് 16 വയസുള്ളപ്പോഴാണ് പീഡനം നടന്നതെന്ന് യുവതി ആദ്യം പറഞ്ഞെങ്കിലും പിന്നീട് 13 വയസ് എന്ന് ഇവർ തന്നെ തിരുത്തി. പരാതിയിലെ പൊരുത്തക്കേടുകൾ അടക്കം ചൂണ്ടിക്കാട്ടിയാണ് കോടതി പ്രതിയെ വെറുതെ വിട്ടത്.
25കാരിയായ എയർ ഹോസ്റ്റസിനെ പീഡിപ്പിച്ചെന്ന കേസിൽ ഈ വർഷമാദ്യം മുംബൈയിലെ ഒരു സെഷൻസ് കോടതിയും 23കാരനായ സഹപ്രവർത്തകനെ വെറുതെ വിട്ടിരുന്നു. 23കാരനായ സുരക്ഷാ ജീവനക്കാരനും ഒപ്പം താമസിക്കുന്നവരും ചേർന്ന് തന്നെ കൂട്ടബലാത്സംഗം ചെയ്തെന്നായിരുന്നു യുവതിയുടെ പരാതി. 2019ൽ നടന്ന സംഭവത്തിൽ എംഐഡിസി പോലീസ് അന്വേഷണം പൂർത്തിയാക്കിയിരുന്നു. എന്നാൽ യുവതിയുടെ ശരീരത്തിൽ ഉണ്ടായിരുന്ന പരിക്കുകൾ ഓട്ടോറിക്ഷയിൽ നിന്നു വീണതു മൂലമാണെന്ന് കോടതി കണ്ടെത്തുകയായിരുന്നു. താൻ പീഡിപ്പിച്ചെന്ന വാദം പ്രതി നിഷേധിക്കുകയും ചെയ്തു. എന്നാൽ യുവതിയും യുവാവും തമ്മിൽ പരസ്പര സമ്മതത്തോടെ ലൈംഗികബന്ധത്തിൽ ഏർപ്പെടുകയായിരുന്നു എന്നായിരുന്നു കോടതിയുടെ കണ്ടെത്തൽ.
ക്ഷേത്ര കുളത്തിൽ കുളിക്കാനിറങ്ങിയ സ്കൂൾ വിദ്യാർഥി മുങ്ങി മരിച്ചു
Web Title : kerala high court says courtship with mutual consent not assault
Malayalam News from Samayam Malayalam, TIL Network
